କଡ଼ା ଆଭିମୁଖ୍ୟ ଗ୍ରହଣ କଲା DGCA, ଏଣିକି ସମସ୍ତ ବିମାନର ଯାଞ୍ଚ ହେବ ଇନ୍ଧନ ପ୍ରଣାଳୀ,୨୧ ଜୁଲାଇ ସୁଦ୍ଧା…
ନୂଆଦିଲ୍ଲୀ,୧୪ା୭: ଅହମ୍ମଦାବାଦରେ ଜୁନ୍ ୧୨ରେ ଘଟିଥିବା ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ରିପୋର୍ଟ ଆସିବା ପରେ ଏବେ ସିଭିଲ ଏଭିଏସନ୍ ମହାନିର୍ଦ୍ଦେଶାଳୟ (DGCA) ଖୁବ୍ ଶୀଘ୍ର ଏକ ନିର୍ଦ୍ଦେଶ ଜାରି କରିବାକୁ ଯାଉଛି। ଭାରତର ବିମାନ କମ୍ପାନୀଗୁଡ଼ିକୁ ଏଣିକି ସେମାନଙ୍କର ବୋଇଂ ୭୮୭ ବିମାନର ଇନ୍ଧନ ପ୍ରଣାଳୀ ଯାଞ୍ଚ କରିବାକୁ ପଡିବ। ଏୟାରକ୍ରାଫ୍ଟ ଦୁର୍ଘଟଣା ପ୍ରାଥମିକ ତଦନ୍ତ ରିପୋର୍ଟ ପରେ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରସ୍ତୁତ ହେଉଛନ୍ତି।
AAIBର ପ୍ରାଥମିକ ତଦନ୍ତ ରିପୋର୍ଟରେ କୁହାଯାଇଥିଲା ଯେ, AI-୧୭୧ର ଉଭୟ ଇଞ୍ଜିନର ଇନ୍ଧନ ସ୍ୱିଚ୍ ରନରୁ କଟଅଫ୍ ମୋଡକୁ ଆସିଥିଲା, ଯାହା ଯୋଗୁ ଏହି ଭୟଙ୍କର ଦୁର୍ଘଟଣା ଘଟିଥିଲା। ଏହି ମାମଲା ଏବେ ବି ତଦନ୍ତାଧୀନ। DGCA ସମସ୍ତ ଏୟାରଲାଇନ୍ସ ଅପରେଟରଙ୍କୁ ୨୧ ଜୁଲାଇ ୨୦୨୫ ସୁଦ୍ଧା ଯାଞ୍ଚ କାର୍ଯ୍ୟ ଶେଷ କରିବାକୁ ନିୟାମକ କାର୍ଯ୍ୟାଳୟ ଏବଂ ସମ୍ପୃକ୍ତ ଆଞ୍ଚଳିକ କାର୍ଯ୍ୟାଳୟକୁ ଏହାର ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛି। DGCA ସ୍ପଷ୍ଟ କରିଛି ଯେ, ସମୟସୀମା କଠୋର ଭାବରେ ପାଳନ କରିବା ବାଧ୍ୟତାମୂଳକ।
ଏହି ନିର୍ଦ୍ଦେଶ ୧୭ ଡିସେମ୍ବର ୨୦୧୮ରେ ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଦ୍ୱାରା ଜାରି ହୋଇଥିବା ଏକ ବୁଲେଟିନ୍ ଆଧାରରେ ଜାରି କରାଯାଇଛି। ଏଥିରେ ବୋଇଂ ଏବଂ ମ୍ୟାକଡୋନେଲ୍ ଡଗଲାସ୍ର ବିଭିନ୍ନ ମଡେଲ୍ରେ ଇନ୍ଧନ ନିୟନ୍ତ୍ରଣ ସ୍ୱିଚ୍ ଲକ୍ ସିଷ୍ଟମ୍ରେ ସମ୍ଭାବ୍ୟ ସମସ୍ୟା ବିଷୟରେ ସତର୍କ କରାଯାଇଥିଲା।
ଅହମ୍ମଦାବାଦ ବିମାନ ଦୁର୍ଘଟଣା ମାମଲାରେ ଶନିବାର ପ୍ରକାଶିତ ପ୍ରାରମ୍ଭିକ ରିପୋର୍ଟରେ କୁହାଯାଇଛି ଯେ, ଦୁର୍ଘଟଣାଗ୍ରସ୍ତ ବିମାନର ରକ୍ଷଣାବେକ୍ଷଣ ରେକର୍ଡ ସମ୍ପୂର୍ଣ୍ଣ ଠିକ୍ ଥିଲା। ଏହାର ସମସ୍ତ ଆବଶ୍ୟକୀୟ ଯାଞ୍ଚ ସମୟସୀମା ମଧ୍ୟରେ ସମାପ୍ତ ହୋଇଥିଲା। ଏଥିରେ ଏହା ମଧ୍ୟ କୁହାଯାଇଛି ଯେ ବିମାନର ଏକ ବୈଧ ବିମାନ ଉଡ଼ାଣ ପ୍ରମାଣପତ୍ର ଅଛି।
୨୦୧୯ରେ ଜାରି ହୋଇଥିବା ବୋଇଂ ନିର୍ଦ୍ଦେଶ ପରେ ବିମାନ କମ୍ପାନୀ ଏୟାର ଇଣ୍ଡିଆ ଗତ ଛଅ ବର୍ଷ ମଧ୍ୟରେ ଦୁଇଥର ସମ୍ପ୍ରତି ଦୁର୍ଘଟଣାଗ୍ରସ୍ତ ବୋଇଂ ୭୮୭-୮ ବିମାନର ‘ଥ୍ରୋଟଲ୍ କଣ୍ଟ୍ରୋଲ୍ ମଡ୍ୟୁଲ୍’ (TCM) ବଦଳାଇଥିଲା। TCM ରେ ଇନ୍ଧନ ନିୟନ୍ତ୍ରଣ କରୁଥିବା ସ୍ୱିଚ୍ ଅଛି। ଏୟାର ଇଣ୍ଡିଆର ସିଇଓ କହିଛନ୍ତି, ପ୍ରାରମ୍ଭିକ ରିପୋର୍ଟରେ କୌଣସି କାରଣ ଦିଆଯାଇନାହିଁ କିମ୍ବା କୌଣସି ସୁପାରିସ କରାଯାଇନାହିଁ।