ସରକାରଙ୍କୁ ଠକି BPL ଚାଉଳ ଖାଉଥିଲେ ଜମିଦାର, ଗାଁର ୬୩ ପରିବାରଙ୍କ ପାଖରେ ହେକ୍ଟର ହେକ୍ଟର ଜମି

ନୂଆଦିଲ୍ଲୀ: ମଧ୍ୟପ୍ରଦେଶ ଭୋପାଳର ନଲଖେଡ଼ା ଗାଁରେ ୨୪୦ ପରିବାର ବିପିଏଲ ବର୍ଗର ବୋଲି ଦର୍ଶାଯାଇଥିଲା। ଏମାନଙ୍କୁ ବିପିଏଲ ରାସନ କାର୍ଡ ଆଧାରରେ ରାସନ ମଧ୍ୟ ଦିଆଯାଉଥିଲା।

ସାରା ଗାଁ ବିପିଏଲ ଶ୍ରେଣୀରେ ଥିବାରୁ କେନ୍ଦ୍ରୀୟ ଉପଭୋକ୍ତା ମାମଲା, ଖାଦ୍ୟ ଏବଂ ସାଧାରଣ ଯୋଗାଣ ମନ୍ତ୍ରାଳୟର ଅଧିକାରୀଙ୍କର ସନ୍ଦେହ ହୋଇଥିଲା। ତାଙ୍କୁ ନିର୍ଦ୍ଦେଶରେ ଯାଞ୍ଚ କରାଯାଇଥିଲା।

ଯାଞ୍ଚରେ ଜଣାପଡ଼ିଥିଲା ଯେ, ବିପିଏଲ ସୂଚୀରେ ଗାଁର ୭୧ ପରିବାର ଅଛନ୍ତି। ୬୩ ପରିବାରଙ୍କ ପାଖରେ ଏକ ହେକ୍ଟରରୁ ଅଧିକ ଜମି ଅଛି। ଏଥିରେ ଅନେକ ଆୟକରଦାତା ମଧ୍ୟ ଅଛନ୍ତି। ଗାଁରେ କେବଳ ଛଅଟି ପରିବାର ଭୂମିହୀନ ଅଛନ୍ତି।

କଲେକ୍ଟର କୌଶଳେନ୍ଦ୍ର ବିକ୍ରମ ସିଂହଙ୍କ ଅନୁଯାୟୀ, ମନ୍ତ୍ରଣାଳୟର ନିର୍ଦ୍ଦେଶରେ, ଖାଦ୍ୟ ନିରୀକ୍ଷକ, ପଟୱାରୀ, ପଞ୍ଚାୟତ ସଚିବ ଏବଂ ଗ୍ରାମ ସେବକଙ୍କୁ ନେଇ ଏକ ତଦନ୍ତ ଦଳ ଗଠନ କରାଯାଇଛି। ଅନ୍ୟ ପରିବାର ବିଷୟରେ ସୂଚନା ସଂଗ୍ରହ କରାଯାଉଛି।

ତଦନ୍ତ ସମାପ୍ତ ହେବା ପରେ ସରକାରଙ୍କୁ ରିପୋର୍ଟ ପଠାଯିବ। ଅନିୟମିତତା ପାଇଁ ଯିଏ ଦାୟୀ ତାଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ। ଅଯୋଗ୍ୟ ଲୋକଙ୍କ ବିପିଏଲ୍ ରାସନ କାର୍ଡ ବାତିଲ କରାଯାଉଛି।

ଭାରତ ସରକାରଙ୍କ ଏକ ରାଷ୍ଟ୍ର ଏକ ରାସନ କାର୍ଡ ଯୋଜନା ଅଧୀନରେ, ବିପିଏଲ୍ ପରିବାର ଦେଶର ଯେକୌଣସି ସ୍ଥାନରୁ ରାସନ ନେଇପାରିବେ, କିନ୍ତୁ ଏଠାରେ ଥିବା ସେହି ବିପିଏଲ୍ ପରିବାର, ଯେଉଁମାନେ ଗାଁରେ ରହୁନାହାଁନ୍ତି, ସେମାନଙ୍କର ରାସନ ମଧ୍ୟ ନିୟମିତ ଭାବରେ ବଣ୍ଟନ କରାଯାଉଛି। ଜିଲ୍ଲା ଯୋଗାଣ ନିୟନ୍ତ୍ରକ ଚନ୍ଦ୍ରଭାନ ସିଂହ ଜାଦୌନଙ୍କ ଅନୁଯାୟୀ, ଏବେ ବିଭାଗ ଗାଁରେ ନ ଥିବା ପରିବାର କେଉଁଠାରୁ ରାସନ ନେଉଛନ୍ତି ତାହା ମଧ୍ୟ ତଦନ୍ତ କରୁଛି।