ଭୁବନେଶ୍ୱର,୨ା୪: ଭୁବନେଶ୍ୱର ଗ୍ରାମ୍ୟ ଉନୟନ ବିଭାଗର ସହକାରୀ ଯନ୍ତ୍ରୀ ନରେଶ କୁମାର ଦାସ ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡ଼ିଛନ୍ତି । ଜଣେ ଠିକାଦାରଙ୍କଠାରୁ ୭ ଲକ୍ଷ ଟଙ୍କାର ବିଲ୍ କରାଇ ଦେବାକୁ ଯନ୍ତ୍ରୀ ୧ ଲକ୍ଷ ଟଙ୍କା ଲାଞ୍ଚ ଦାବି କରୁଥିଲେ । ଉକ୍ତ ଟଙ୍କା ନ ଦେଲେ ବିଲ୍ କରାଇ ଦେବେ ନାହିଁ ବୋଲି କହୁଥିଲେ । ଏନେଇ ଅଭିଯୋଗକାରୀ (ଠିକାଦାର)ଭିଜିଲାନ୍ସର ଦ୍ୱାରସ୍ଥ ହୋଇଥିଲେ । ପୂର୍ବ ପ୍ରସ୍ତୁତି ଅନୁଯାୟୀ ଠିକାଦାର ଯନ୍ତ୍ରୀଙ୍କୁ ବୁଧବାର ଉକ୍ତ ଟଙ୍କା ଲାଞ୍ଚ ଦେଉଥିବାବେଳେ ଭିଜିଲାନ୍ସ ଧରିଥିଲା । ନରେଶଙ୍କୁ ଭିଜିଲାନ୍ସ ବିଭାଗର ଅଧିକାରୀମାନେ ଧରିବା ସହ ତାଙ୍କଠାରୁ ନଗଦ ୧ ଲକ୍ଷ ଲାଞ୍ଚ ଟଙ୍କା ଜବତ କରିଛନ୍ତି ।
ଉପରୋକ୍ତ ପରିମାଣ ବ୍ୟତୀତ ପରେ ଚଢ଼ାଉ ସମୟରେ ୧,୨୬,୦୦୦/- ଟଙ୍କା ଉଦ୍ଧାର କରାଯାଇଥିଲା । ମୋଟ ନଗଦ ୨,୨୬,୦୦୦/- ଟଙ୍କା ଜବତ କରିଛି ଭିଜିଲାନ୍ସ।
ଏହି ସମ୍ପର୍କରେ ଭୁବନେଶ୍ୱର ଭିଜିଲାନ୍ସ ପିଏସ୍ କେସ୍ ୫/୨୦୨୫ ୟୁ/ଏସ୍-୭ପିସି (ସଂଶୋଧନ) ଆଇନ, ୨୦୧୮ ଅଭିଯୁକ୍ତ ସହକାରୀ ଯନ୍ତ୍ରୀ ଦାସଙ୍କ ବିରୋଧରେ ରୁଜୁ ହେବା ସହ ଅଧିକ ତଦନ୍ତ ଜାରି ରହିଛି ।