ସମାଲୋଚନା କଲେ ବିରାଟ କୋହଲି, ପରିବାର ରହଣି ନୀତି ଉପରେ ପୁନର୍ବିଚାର କରିପାରେ BCCI

ମୁମ୍ବାଇ: ଲମ୍ବା ଗସ୍ତରେ ପରିବାରକୁ ସାଙ୍ଗରେ ରଖିବା ନିୟମରେ ପରିବର୍ତନ ଆଣିପାରେ ବିସିସିଆଇ। ଭାରତୀୟ ଦଳର ବରିଷ୍ଠ ବ୍ୟାଟ୍ସମ୍ୟାନ ବିରାଟ କୋହଲି ଖୋଲାଖୋଲି ଭାବେ ଏହି ନିୟମକୁ ସମାଲୋଚନା କରିବା ପରେ ଏହି ନୀତିରେ ପରିବର୍ତ୍ତନ କରିବାକୁ ବିସିସିଆଇ ବିଚାର କରିପାରେ ବୋଲି ସୂତ୍ରରୁ ଜଣାପଡିଛି। ଅର୍ଥାତ ଯଦି ବୋର୍ଡରୁ ପୂର୍ବ ଅନୁମୋଦନ ଗ୍ରହଣ କରନ୍ତି ପରିବାର ସଦସ୍ୟମାନଙ୍କୁ ବର୍ତ୍ତମାନର ନିୟମ ଅପେକ୍ଷା ଅଧିକ ସମୟ ପାଇଁ ଖେଳାଳି ଏବଂ ସହାୟକ କର୍ମଚାରୀଙ୍କ ସହିତ ରହିବାକୁ ଅନୁମତି ଦିଆଯିବ।

ବିରାଟ କୋହଲି ବିସିସିଆଇର ଏହି ନିୟମ ପ୍ରତି ନିଜର ନିରାଶା ପ୍ରକାଶ କରିବା ପରେ ଏହି ଖବର ଆସିଛି। ଖେଳାଳିମାନେ ହାଇ ପ୍ରୋଫାଇଲ ମ୍ୟାଚ୍ ପରେ, ବିଶେଷକରି ବିଦେଶ ଗସ୍ତରେ, ସେମାନଙ୍କ ପ୍ରିୟଜନଙ୍କ ସହିତ ସମୟ ବିତାଇବା ଉପରେ ବିରାଟ ଗୁରୁତ୍ୱାରୋପ କରିଥିଲେ।

“ଖେଳାଳିମାନେ ଯଦି ଚାହାଁନ୍ତି ଯେ ସେମାନଙ୍କ ପରିବାର ଟୁରରେ ଅଧିକ ସମୟ ରହିବାକୁ ଚାହାଁନ୍ତି ତେବେ ଅନୁମତି ପାଇଁ ଆବେଦନ କରିପାରିବେ। ବିସିସିଆଇ ଉପଯୁକ୍ତ ମନେ କଲେ ନିଷ୍ପତ୍ତି ନେବ,” ବିସିସିଆଇର ଏକ ଶୀର୍ଷ ସୂତ୍ର କହିଛି।

୨୦୨୫ ପୂର୍ବରୁ ଅଷ୍ଟ୍ରେଲିଆର ବିପକ୍ଷ ଗସ୍ତରେ ଭାରତୀୟ ଦଳର ନୈରାଶ୍ୟଜନକ ପ୍ରଦର୍ଶନ ପରେ ବିସିସିଆଇ ବରିଷ୍ଠ ପୁରୁଷ ଦଳର ଖେଳାଳିମାନଙ୍କ ପାଇଁ ୧୦-ପଏଣ୍ଟ ଶୃଙ୍ଖଳାଗତ ନିର୍ଦ୍ଦେଶାବଳୀ ପ୍ରଚଳନ କରିଥିଲା। ଯେଉଁଥିରେ ପରିବାରକୁ ବିଦେଶ ଗସ୍ତରେ ଖେଳାଳିମାନଙ୍କ ସହିତ ସ୍ୱଳ୍ପ ସମୟ ରହିବାକୁ ଅନୁମତି ଦିଆଯାଇଥିଲା। ଅଷ୍ଟ୍ରେଲିଆ ଗସ୍ତ ପରେ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏବଂ ଅଧିନାୟକ ରୋହିତ ଶର୍ମାଙ୍କ ସହ ଏକ ସମୀକ୍ଷା ବୈଠକ ପରେ, କୋଭିଡ-୧୯ ମହାମାରୀ ସମୟରେ କୋହଳ କରାଯିବା ପରେ ପରିବାର ଯାତ୍ରା ଉପରେ ଏହି କଟକଣାଗୁଡ଼ିକୁ ପୁନଃ ପ୍ରଚଳନ କରାଯାଇଥିଲା।

ବୈଠକ ସମୟରେ, ପ୍ରଶିକ୍ଷକ ଗମ୍ଭୀର ଡ୍ରେସିଂ ରୁମରେ ସମନ୍ୱୟର ଅଭାବ ବିଷୟରେ ଚିନ୍ତା ପ୍ରକାଶ କରିଥିବା ଜଣାପଡ଼ିଛି, ଯାହା ବିସିସିଆଇକୁ କଠୋର ପଦକ୍ଷେପ କାର୍ଯ୍ୟକାରୀ କରିବାକୁ ପ୍ରେରଣା ଦେଇଥିଲା।