ସିନ୍ଧୁ ଜଳ ଚୁକ୍ତିନାମା ପ୍ରତିବନ୍ଧକ ପରେ ପାକିସ୍ତାନ ଉପରେ ଆଉ ଏକ ପ୍ରହାର, ଭୟରେ ହେଉଛି ଘାରି
ନୂଆଦିଲ୍ଲୀ/ଇସଲାମାବାଦ,୨୩ା୫: ଏପ୍ରିଲ ୨୦୨୫ରେ ସିନ୍ଧୁ ଜଳ ଚୁକ୍ତିନାମା ସ୍ଥଗିତ ହେବା ପରେ, ଭାରତ ପଶ୍ଚିମ ନଦୀଗୁଡ଼ିକର ଜଳର ସର୍ବାଧିକ ବ୍ୟବହାର କରିବା ଦିଗରେ ଏକ ବଡ଼ ପଦକ୍ଷେପ ନେଇଛି। ବର୍ତ୍ତମାନ ସରକାର ଜମ୍ମୁ ଏବଂ କାଶ୍ମୀରର ମୁଖ୍ୟ ଜଳସେଚନ ପ୍ରକଳ୍ପ ରଣବୀର କେନାଲର ଲମ୍ବ ୬୦ କିଲୋମିଟରରୁ ୧୨୦ କିଲୋମିଟରକୁ ବୃଦ୍ଧି କରିବା ଯୋଜନାରେ ଦ୍ରୁତ ଗତିରେ କାମ କରୁଛନ୍ତି। ଏହି କେନାଲକୁ ଜମ୍ମୁର ଚାଷୀଙ୍କ ପାଇଁ ଜୀବନରେଖା ବୋଲି ବିବେଚନା କରାଯାଏ।
ଡୋଗ୍ରା ଶାସକ ମହାରାଜା ରଣବୀର ସିଂହଙ୍କ ରାଜତ୍ୱ କାଳରେ ୧୮୭୩ରୁ ୧୯୦୫ମଧ୍ୟରେ ରଣବୀର କେନାଲ ନିର୍ମାଣ କରାଯାଇଥିଲା। ଏହି କେନାଲ ଅଖନୁର ନିକଟବର୍ତ୍ତୀ ଚେନାବ ନଦୀରୁ ପାଣି ନେଇ ଜମ୍ମୁ ସହର, ଆରଏସ ପୁରା, ବିଷ୍ଣା, ସାମ୍ବା ଏବଂ କାଠୁଆର କିଛି ଅଂଶ ଦେଇ ଯାଏ। ଏହାର ପାଣିରେ ପ୍ରାୟ ୧୬ ହଜାର ହେକ୍ଟର ଜମି ଜଳସେଚନ ହୁଏ।
ସରକାରୀ ସୂତ୍ର ଅନୁସାରେ, କେନାଲର ଜଳ ବହନ କ୍ଷମତା ୪୦ କ୍ୟୁସେକରୁ ୧୫୦ କ୍ୟୁସେକକୁ ବୃଦ୍ଧି କରିବାର ଯୋଜନା ରହିଛି। ଏହା କେବଳ ଜଳ ସଙ୍କଟର ସମ୍ମୁଖୀନ ହେଉଥିବା ଅଞ୍ଚଳଗୁଡ଼ିକୁ ଆଶ୍ୱସ୍ତି ପ୍ରଦାନ କରିବ ନାହିଁ, ବରଂ ବିଦ୍ୟୁତ ଉତ୍ପାଦନକୁ ମଧ୍ୟ ବୃଦ୍ଧି କରିବ।
ରଣବୀର କେନାଲର ଏହି ସମ୍ଭାବ୍ୟ ସମ୍ପ୍ରସାରଣକୁ ନେଇ ପାକିସ୍ତାନରେ ଭୟର ବାତାବରଣ ରହିଛି। ପାକିସ୍ତାନୀ ଗଣମାଧ୍ୟମ ରିପୋର୍ଟ ଏବଂ ବିଶ୍ଳେଷକଙ୍କ ଅନୁସାରେ, ଯଦି ଭାରତ ଏହି ପ୍ରକଳ୍ପ ସମାପ୍ତ କରେ, ତେବେ ପାକିସ୍ତାନକୁ ପ୍ରବାହିତ ଚେନାବ ନଦୀର ଏକ ବଡ଼ ଅଂଶ ବନ୍ଦ ହୋଇପାରେ। ଏହି କାରଣରୁ ପାକିସ୍ତାନରେ କୃଷି ଏବଂ ପାନୀୟ ଜଳ ସଙ୍କଟ ଦେଖାଦେବାର ଆଶଙ୍କା ରହିଛି।