କଂଗ୍ରେସରୁ ଇସ୍ତଫା ଦେଲେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚୌହ୍ୱାନ, BJPରେ ହେବେ ସାମିଲ
ନୂଆଦିଲ୍ଲୀ: ମହାରାଷ୍ଟ୍ରରେ ଲୋକସଭା ନିର୍ବାଚନ ପୂର୍ବରୁ କଂଗ୍ରେସକୁ ଏକ ବଡ଼ ଝଟକା ଲାଗିଛି । ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚୌହ୍ୱାନ କଂଗ୍ରେସରୁ ଇସ୍ତଫା ଦେଇଛନ୍ତି । ସେ ବିଧାୟକ ପଦରୁ ମଧ୍ୟ ଇସ୍ତଫା ଦେଇଛନ୍ତି । ଚହ୍ୱାନ୍ ଏବେ ବିଜେପିରେ ସାମିଲ ହୋଇପାରନ୍ତି ।
ବର୍ତ୍ତମାନ ଅଶୋକ ଚୌହ୍ୱାନଙ୍କ ସହ ୨ ରୁ ୪ ଜଣ କଂଗ୍ରେସ ବିଧାୟକ ଅଛନ୍ତି । ଏହି ବିଧାୟକମାନେ ମଧ୍ୟ ବିଜେପିରେ ଯୋଗଦେବାର ସମ୍ଭାବନା ରହିଛି । କଂଗ୍ରେସ କର୍ପୋରେଟରମାନେ ମଧ୍ୟ ବିଜେପିରେ ଯୋଗଦେବେ । ବିଜେପି ଅଶୋକ ଚୌହ୍ୱାନଙ୍କୁ ମହାରାଷ୍ଟ୍ରରୁ ରାଜ୍ୟସଭା ପଠାଇପାରେ ।
ଅଶୋକ ଚୌହ୍ୱାନଙ୍କ ଇସ୍ତଫା ପୂର୍ବରୁ ମିଲିନ୍ଦ ଦେଓରା ଏବଂ ବାବା ସିଦ୍ଦିକି କଂଗ୍ରେସରୁ ଇସ୍ତଫା ଦେଇଛନ୍ତି । ସିଦ୍ଦିକି ଅଜିତ ପାୱାର ଦଳର ଏନସିପିରେ ଯୋଗ ଦେଇଛନ୍ତି । ଅନ୍ୟପଟେ ଦେଓରା ସିନ୍ଦେ ଶିବସେନାରେ ଯୋଗ ଦେଇଛନ୍ତି ।
କାହିଁକି କଂଗ୍ରେସ ଛାଡିଛନ୍ତି?
ସୂଚନାନୁସାରେ, ଅଶୋକ ଚୌହ୍ୱାନ ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲଙ୍କ ଉପରେ ରାଗିଥିଲେ । ସୂତ୍ରରୁ ପ୍ରକାଶ ଯେ ତାଙ୍କୁ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଦଳ ପକ୍ଷରୁ କୁହାଯାଇଥିଲା । ତଥାପି ସେ ଏହାକୁ ମନା କରିଦେଇଥିଲେ । ସେ କହିଛନ୍ତି ଯେ ବିଜେପିର ଲହର ଲାଗୁଛି ।
ବିଧାନସଭା ବାଚସ୍ପତି ପଦ ଛାଡିବା କାରଣରୁ ନାନା ପାଟୋଲଙ୍କ ଉପରେ ଅଶୋକ ଚୌହ୍ୱାନ ମଧ୍ୟ ରାଗିଥିଲେ, ତାଙ୍କ ମତରେ ପାଟୋଲଙ୍କ କାରଣରୁ ମହାରାଷ୍ଟ୍ରରେ ସରକାର ଖସିଛି । ସୂତ୍ରରୁ ପ୍ରକାଶ ଯେ ଅଶୋକ ଚୌହ୍ୱାନ ନାନା ପାଟୋଲଙ୍କୁ ଅଧ୍ୟକ୍ଷ ପଦରୁ ହଟାଇ ତାଙ୍କୁ ମହାରାଷ୍ଟ୍ର କଂଗ୍ରେସର ସଭାପତି କରିବା ପାଇଁ ଦଳର ହାଇ କମାଣ୍ଡଙ୍କୁ କହିଛନ୍ତି ।
ଅଶୋକ ଚୌହ୍ୱାନଙ୍କ ଇସ୍ତଫା ମଧ୍ୟରେ ନାନା ପାଟୋଲ ଦିଲ୍ଲୀ ଛାଡିଛନ୍ତି ।
ଅଶୋକ ଚୌହ୍ୱାନ୨୦୦୮ ରୁ ୨୦୧୦ ପର୍ଯ୍ୟନ୍ତ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଥିଲେ । ତାଙ୍କ ପିତା ଶଙ୍କରରାଓ ଚୌହ୍ୱାନ ମଧ୍ୟ ମହାରାଷ୍ଟ୍ରର ସିଏମ୍ ଥିଲେ । ଚୌହ୍ୱାନ୨୦୧୫ ରୁ ୨୦୧୯ ପର୍ଯ୍ୟନ୍ତ ମହାରାଷ୍ଟ୍ର କଂଗ୍ରେସର ସଭାପତି ଥିଲେ । ୧୯୮୭ ରେ ସେ ପ୍ରଥମ ଥର ପାଇଁ ଲୋକସଭାର ସାଂସଦ ଭାବରେ ନିର୍ବାଚିତ ହୋଇଥିଲେ । ଏହା ପରେ ୧୯୯୯ ରୁ ୨୦୧୪ ପର୍ଯ୍ୟନ୍ତ ସେ ତିନିଥର ବିଧାୟକ ଥିଲେ । ୨୦୧୪ ରେ ଦ୍ୱିତୀୟ ଥର ପାଇଁ ସାଂସଦ ଭାବରେ ନିର୍ବାଚିତ ହୋଇଥିଲେ ।
