‘ବ୍ୟାଡମିଣ୍ଟନ ହେଉଛି ମୋ ପ୍ରଥମ ପ୍ରେମ’, ଏମିତି କିଛି କହି ଆନ୍ତର୍ଜାତୀୟ ବ୍ୟାଡମିଣ୍ଟନକୁ ଅଲବିଦା କହିଲେ ସାଇ ପ୍ରଣୀତ
ନୂଆଦିଲ୍ଲୀ: ଭାରତୀୟ ବ୍ୟାଡମିଣ୍ଟନ ଷ୍ଟାର ବି. ସାଇ ପ୍ରଣୀତ ଫ୍ୟାନ୍ସମାନଙ୍କୁ ବଡ଼ ଝଟକା ଦେଇଛନ୍ତି । ୩୧ ବର୍ଷ ବୟସରେ ଆନ୍ତର୍ଜାତୀୟ ବ୍ୟାଡମିଣ୍ଟନରୁ ସନ୍ୟାସ ନେବା ପାଇଁ ଘୋଷଣା କରିଛନ୍ତି ସାଇ ପ୍ରଣୀତ । ୨୦୧୯ ବିଶ୍ୱ ଚମ୍ପିଅନଶିପରେ ଇତିହାସ ରଚିଥିବା ସାଇ ହେଉଛନ୍ତି ଜଣେ ଷ୍ଟାର ସଟଲର । ବର୍ତ୍ତମାନ ସେ ଆମେରିକାର ଏକ କ୍ଲବରେ ମଖ୍ୟ ପ୍ରଶିକ୍ଷକ ଭାବେ ଯୋଗ ଦେବେ ।
ହାଇଦ୍ରାବାଦର ଷ୍ଟାର ଖେଳାଳି ବି. ସାଇ ପ୍ରଣୀତଙ୍କ ପାଇଁ ୨୦୧୯ ମସିହା ବେଶ ଖାସ ଥିଲା । ବିଶ୍ୱ ଚମ୍ପିଅନସିପ ସିଜିନରେ ସେ ବ୍ରୋଞ୍ଜ ପଦକ ଜିତିଥିଲେ । ସେତେବେଳେ ୩୬ ବର୍ଷ ପରେ ପ୍ରଥମ ଭାରତୀୟ ଭାବେ ଏହି ଉପଲବ୍ଧି ହାସଲ କରିଥିଲେ । ଏହା ପୂର୍ବରୁ ୧୯୮୩ରେ ପ୍ରକାଶ ପାଦୁକୋନ ବ୍ରୋଞ୍ଜ ପଦକ ଜିତିଥିଲେ । ସାଇ ପ୍ରଣୀତ ଇନଷ୍ଟାଗ୍ରାମ ମାଧ୍ୟମରେ ନିଜ ଚମତ୍କାର କ୍ୟାରିୟରକୁ ଅଲବିଦା କହି ଲେଖିଛନ୍ତି, ‘ମିଶ୍ରିତ ଭାବନା ସହ ଏହି ଶବ୍ଦ ମାଧ୍ୟମରେ ସେହି ଖେଳକୁ ଅଲବିଦା କହୁଛି ଯାହା ୨୪ ବର୍ଷ ପର୍ଯ୍ୟନ୍ତ ମୋ ପାଇଁ ସବୁକିଛି ଥିଲା । ଆଜି ଠାରୁ ମୁଁ ଏକ ନୂଆ ଅଧ୍ୟାୟ ଆରମ୍ଭ କରିବାକୁ ଯାଉଛି ଏବଂ ମୋର କ୍ରୀଡ଼ା ଯାତ୍ରା ପାଇଁ କୃତଜ୍ଞ । ବ୍ୟାଡମିଣ୍ଟନ ହେଉଛି ମୋ ପ୍ରଥମ ପ୍ରେମ ଏବଂ ସାଥି ମଧ୍ୟ । ଏହା ମୋ ଅସ୍ତିତ୍ୱକୁ ଅର୍ଥ ପ୍ରଦାନ କରିଛି । ଯେଉଁ ସବୁ ସ୍ମୃତି ଏବଂ ଚ୍ୟାଲେଞ୍ଜ ପାରି କରିଛି ତାହା ସବୁବେଳେ ମୋ ହୃଦୟରେ ରହିବ ।’
View this post on Instagram
ଡାହାଣହାତୀ ଏହି ଭାରତୀୟ ଶଟଲର ୨୦୧୩ ଥାଇଲାଣ୍ଡ ଓପନ୍ ଗ୍ରାଣ୍ଟ ପ୍ରି ଟୁର୍ଣ୍ଣାମେଣ୍ଟର ପ୍ରଥମ ରାଉଣ୍ଡରେ ସେ ୨୦୦୩ ଅଲ୍ ଇଂଲଣ୍ଡ ଚାମ୍ପିୟନ ମହମ୍ମଦ ହାଫିଜ ହାଶିମଙ୍କୁ ହରାଇ ଦେଇଥିଲେ । ଯାହା ପରେ ତାଙ୍କୁ ନେଇ ଜୋରଦାର ଚର୍ଚ୍ଚା ହେଇଥିଲା ।ସାଇ ପ୍ରଣୀତ ୨୦୦୮ରେ ମଧ୍ୟ କମନୱେଲଥ୍ ଗେମ୍ସରେ ପୁରୁଷ ଡବଲ୍ସରେ ବ୍ରୋଞ୍ଜ ମେଡାଲ ଜିତିଥିଲେ । ଏହାପରେ ୨୦୧୦ ବିଶ୍ୱ ଜୁନିୟର ଚାମ୍ପିୟନସିପ ସିଙ୍ଗଲ୍ସରେ ମଧ୍ୟ ସେ ବ୍ରୋଞ୍ଜ ମେଡାଲ ଜିତିଥିଲେ । ଏହାପରେ ୨୦୧୬ରେ ସେ ଲଗାତାର ଦୁଇଟି ମେଡାଲ ଜିତିଥିଲେ । ସାଇ ପ୍ରଣୀତ ନିଜ କ୍ୟାରିୟରରେ ଏକମାତ୍ର ଗୋଲ୍ଡ ମେଡାଲ ଜିତିଥିଲେ । ଭାରତରେ ହେଇଥିବା ସାଉଥ୍ ଏସିଆନ୍ ଗେମ୍ସର ଟିମ୍ ଇଭେଣ୍ଟରେ ସେ ସ୍ୱର୍ଣ୍ଣ ପଦକ ହାସଲ କରିଥିଲେ ।
