BCCI ଉପରେ ହେବ ଟଙ୍କାର ବର୍ଷା: ବିଲିୟନ ଡଲାରରୁ ଅଧିକ ହେବ ରୋଜଗାର!

ନୂଆଦିଲ୍ଲୀ: ବର୍ତ୍ତମାନ ସମୟରେ କ୍ରିକେଟ ଜଗତର ସବୁଠାରୁ ଧନୀ ଦେଶ ଭାବରେ ରାଜ୍ କରୁଛି ଭାରତୀୟ କ୍ରିକେଟ ବୋର୍ଡ । ଏହାପରେ ମଧ୍ୟ ଆହୁରି ଅଧିକ ଟଙ୍କା ରୋଜଗାର କରିବା ଦିଗରେ ଆଗେଇଛି ବିସିସିଆଇ । ଭାରତୀୟ କ୍ରିକେଟ ବୋର୍ଡ ଆଗାମୀ ୫ ବର୍ଷ ମଧ୍ୟରେ ପ୍ରାୟ ଏକ ଆରବ ଡଲାର ଆୟ କରିବା ନେଇ ଆଶା କରାଯାଉଛି । ଗତ ୫ ବର୍ଷରେ ଏହି ଆୟ ୯୪ କୋଟି ୪୦ ଲକ୍ଷ ଡଲାର ଥିବା ବେଳେ ଆଗାମୀ ସଂସ୍କରଣରେ ବିସିସିଆଇ ଆହୁରି ଅଧିକ ଟଙ୍କା ହାସଲ କରିପାରିବ ବୋଲି ଅନୁମାନ କରାଯାଉଛି ।

ଭାରତୀୟ କ୍ରିକେଟ ବୋର୍ଡର ୨୦୨୮ ପର୍ଯ୍ୟନ୍ତ ୫ ବର୍ଷୀୟ ଚକ୍ରରେ ଟିମ ଇଣ୍ଡିଆର ଘରୋଇ ମ୍ୟାଚ ପାଇଁ ଡିଜିଟାଲ ଅଧିକାରକୁ ପୃଥକ ଭାବରେ ବିକ୍ରି କରିବାର ଯୋଜନା ରହିଛି । ଏହାଦ୍ୱାରା ବିସିସିଆଇ ପ୍ରାୟ ୧ ଆରବ ଡଲାର(୮୨୦୦ କୋଟି ଟଙ୍କା) ମଧ୍ୟ ଆୟ କରିପାରେ ବୋଲି ଆଶା କରାଯାଉଛି । ନୂଆ ସିଜନରେ ଅଷ୍ଟ୍ରେଲିଆ ବିପକ୍ଷରେ ୨୧ଟି ଘରୋଇ ମ୍ୟାଚ ଖେଳିବ ଟିମ ଇଣ୍ଡିଆ । ସେଥି ମଧ୍ୟରେ ୫ଟି ଟେଷ୍ଟ, ୬ଟି ଦିନିକିଆ ଏବଂ ୧୦ଟି ଟି-୨୦ ମ୍ୟାଚ ରହିଛି । ସେହିପରି ଇଂଲଣ୍ଡ ବିପକ୍ଷରେ ମୋଟ ୧୮ଟି ମ୍ୟାଚ(୧୦ ଟେଷ୍ଟ, ୩ ଦିନିକିଆ ଏବଂ ୫ ଟି-୨୦) ଘରୋଇ ମ୍ୟାଚ ଖେଳିବ ଟିମ ଇଣ୍ଡିଆ । ତେବେ ଏହି ପାଞ୍ଚ ବର୍ଷ ସମୟ ମଧ୍ୟରେ ମୋଟ ୨୫ଟି ଟେଷ୍ଟ ମ୍ୟାଚ ସହିତ ୨୭ଟି ଦିନିକିଆ ଏବଂ ୩୬ଟି ଟି-୨୦ ମ୍ୟାଚ ଖେଳାଯିବାର ସୂଚୀ ରହିଛି । ଗତ ୫ ବର୍ଷରେ ଭାରତ ଷ୍ଟାର ଇଣ୍ଡିଆରୁ ୯୪ କୋଟି ୪୦ ଲକ୍ଷ ହାସଲ କରିଛି । ଏଥିରେ ଟିଭି ଏବଂ ଡିଜିଯାଲ ମିଡିଆରେ ପ୍ରତି ମ୍ୟାଚ ପାଇଁ ୬୦ କୋଟି ଟଙ୍କା ସାମିଲ ରହିଛି ।

ତେବେ ଏଥର ଟିଭି ଏବଂ ଡିଜିଟାଲ ପ୍ଲାଟଫର୍ମ ପାଇଁ ବୋର୍ଡ ପୃଥକ ପୃଥକ ଭାବରେ ନିଲାମୀ କରିବ ବୋଲି ଜାଣିବାକୁ ମିଳିଛି । ଆଇପିଏଲ ସମୟରେ ମିଡିଆ ରାଇଟ୍ସରୁ ବିସିସିଆଇକୁ ୪୮,୩୯୦ କୋଟି ଟଙ୍କା ଆୟ ହୋଇଥିଲା । ଏହି ନିଲାମୀ ପ୍ରକ୍ରିୟା ଅଇପିଏଲ ଭଳି ଇ-ନିଲାମୀ ଜରିଆରେ କରାଯିବ । ତେବେ ଏ ନେଇ ଜଣେ ପ୍ରସାରକ କହିଛନ୍ତି ଯେ, ବର୍ତ୍ତମାନ କୌଣସି ସଠିକ ଆକଳନ କରିବା ସମ୍ଭବ ନୁହେଁ । କିନ୍ତୁ ଗତ ସିଜନ ଅନୁସାରେ ଡଲାର ଏବଂ ଟଙ୍କାର ଅନୁପାତ ପରିବର୍ତ୍ତନ ହୋଇଯିବ । ଡିଜନି, ଷ୍ଟାର ଭାରତର ଘରୋଇ ମ୍ୟାଚ୍ ପାଇଁ ମୁଖ୍ୟ ପ୍ରତିଦ୍ୱନ୍ଦ୍ୱୀ ହେବେ ଏବଂ ସେପ୍ଟେମ୍ବରର ପ୍ରଥମ ସପ୍ତାହରେ ହେବାକୁ ଥିବା ନିଲାମ ପୂର୍ବରୁ ସୋନି ସହିତ ମିଶିଲେ ଜି ବିଡ୍ କରିପାରିବ।