(VIDEO) ମନ୍ତ୍ରୀ ନବ ଦାସଙ୍କ ହତ୍ୟା ପରେ ଭୟରେ ଅଛନ୍ତି ବିଜେଡି ନେତା ସୌମ୍ୟରଞ୍ଜନ ପଟ୍ଟନାୟକ; କହିଲେ ମୋ ପିଏସ୍ଓ ହୋଇଯିବନିତ ଗୋପାଳ

କଟକ: ରାଜ୍ୟ ସ୍ୱାସ୍ଥ୍ୟମନ୍ତ୍ରୀଙ୍କ ଗୁଳିକାଣ୍ଡ ଘଟଣା ପରଠାରୁ ସାରା ରାଜ୍ୟରେ ହଇଚଇ ସୃଷ୍ଟି ହୋଇଛି । ସାଧାରଣ ଜନତାଙ୍କ ଠାରକୁ ।ରମ୍ଭ କରି ବ୍ୟବସାୟୀ ଏପରି ନେତା ମନ୍ତ୍ରୀମାନେ ମଧ୍ୟ ଭୟରେ ଅଛନ୍ତି । ଯାହାର ଖୋଦ ପ୍ରମାଣ ଦେଇଛନ୍ତି ଖଣ୍ଡପଡା ବିଧାୟକ ସୌମ୍ୟରଞ୍ଜନ ପଟ୍ଟନାୟକ । ଯାହାକୁ ନେଇ ବର୍ତ୍ତମାନ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଛି ।

ତେବେ ବିଧାୟକ ସୌମ୍ୟରଞ୍ଜନ ପଟ୍ଟନାୟକ ଆଜି କଟକରେ ହେଉଥିବା ଏକ କ୍ରାର୍ଯ୍ୟକ୍ରମରେ ଯୋଗ ଦେବା ସମୟରେ କହିଛନ୍ତି ଯେ, ସ୍ୱାସ୍ଥ୍ୟମନ୍ତ୍ରୀଙ୍କ ହତ୍ୟା ପରେ ମତେ ମଧ୍ୟ ଡର ଲାଗୁଛି ଏବଂ ମୁଁ ଭୟରେ ଅଛି । କାରଣ ନବ ଦାସଙ୍କ ଭଳି ମୋତେ ବି ପିଏସ୍ଓ ମିଳିଛି । ତେବେ ମୋ ପିଏସ୍ଓ ଆଉ ଗୋପାଳ ହୋଇଯିବନି ତ । ଯିଏ ମୋ ସହ ପ୍ରତିଟି ସମୟରେ ରହୁଛି । ମୋର ସବୁ ପ୍ଲାନ୍ ମୋ ପିଏସ୍ଓ କୁ ମଧ୍ୟ ଜଣାଅଛି । ଏଥିସହିତ ସବୁ ପ୍ରଚାର ସମୟରେ ମଧ୍ୟ ସେ ମୋ ସହ ରହୁଛି । ଆଉ ଏବେ ମୋ ପିଏସ୍ଓକୁ ନେଇ ମୋତେ ଭାରି ଡର ଲାଗିଲାଣି । ତେବେ ବିଧାୟକଙ୍କ ଏଭଳି ପ୍ରତିକ୍ରିୟା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି ।

ସୌମ୍ୟରଞ୍ଜନ କହିଛନ୍ତି କି ଓଡ଼ିଶା ଭଳି ରାଜ୍ୟରେ ଏହା ହେଉଛି ପ୍ରଥମ ଘଟଣା । ଯେଉଁଠି ସର୍ବସମ୍ମୁଖରେ ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ପରି ଲୋକଙ୍କୁ ଗୁଳି କରି ହତ୍ୟା କରାଯାଇଛି । ତେବେ ଏହି ଘଟଣାକୁ ମୁଁ ସହଜରେ ଗ୍ରହଣ କରିପାରୁ ନାହିଁ ଏବଂ ମୁଁ ଏହାକୁ ଘୋର ନିନ୍ଦା କରୁଛି । ଏତତ୍ ବ୍ୟତୀତ ସେ ଆହୁରି ମଧ୍ୟ କହିଛନ୍ତି ଯେ, ଏମିତି ଗୋଟେ ଦିନ ଆସିବ ମୋ ପିଏସ୍ଓ ମୋତେ ମାରି ଦେବନି ତ । କାରଣ ମୋତେ ବି ଗୋଟେ ପିଏସ୍ଓ ମିଳିଛି । ମୁ ଏଭଳି କଥାକୁ ଭାବି ଭାବି ମୋତେ ବି ଡର ଲାଗିଲାଣି । ତେବେ ନବ ଦାସ ତ ଜଣେ ମନ୍ତ୍ରୀ ଥିଲେ । କିନ୍ତୁ ମୁଁ ତ ମାତ୍ର ଜଣେ ବିଧାୟକ । ଜଣେ ପାୱାରଫୁଲ ମନ୍ତ୍ରୀଙ୍କୁ ଜଣେ ଏଏସ୍ଆଇ ଗୁଳିକରି ହତ୍ୟା କରିବା ଏକ ଆଶ୍ଚର୍ଯ୍ୟକର ଘଟଣା ବୋଲି କହିଛନ୍ତି ବିଧାୟକ ସୌମ୍ୟରଞ୍ଜନ ପଟ୍ଟନାୟକ ।

ଆଜି କଟକରେ ଏକ କାର୍ଯ୍ୟକ୍ରମରେ ଯୋଗ ଦେବା ଅବସରରେ ସୌମ୍ୟ କହିଛନ୍ତି, ବର୍ତ୍ତମାନ ଘଟଣାକୁ ନେଇ ବହୁତ ଗସିପ୍ ହେଉଛି । ତେଣୁ ପୋଲିସ ବାବୁମାନେ ଏହାର ତଦନ୍ତ କରି ଅସଲ କାରଣ ଖୋଜିବା ଦରକାର। ପୋଲିସ ଯେତେ ଶୀଘ୍ର ସତ ପଦାକୁ ଆଣିବ, ସେତେ ଶୀଘ୍ର ଏହି ଚର୍ଚ୍ଚା ବନ୍ଦ ହେବ ବୋଲି ସୌମ୍ୟ କହିଛନ୍ତି।