ଓଭରଟେକ୍ ବେଲେ ବାଇକକୁ ଧକ୍କା ଦେଇ ଓଲଟିଲା ବୋଲେରୋ, ୨ ଜଣ ଗୁରୁତର
ବ୍ରଜରାଜନଗର (ଭାସ୍କର ନ୍ୟୁଜ): ଗାନ୍ଧୀ ଛକ ବ୍ରଜରାଜନଗର ମୁଖ୍ୟ ରାସ୍ତାର ପାୱାର ହାଉସ୍ ଛକରେ ଏକ ବୋଲେରୋ ସହ ବାଇକ୍ ଧକ୍କା ହୋଇଛି । ଏହି ଦୁର୍ଘଟଣାରେ ବାଇକ୍ ଚାଳକ ଓ ଆଉ ଜଣେ ଗୁରୁତର ଆହତ ହୋଇଛନ୍ତି । ସୂଚନା ଅନୁଯାୟୀ ବାଇକ୍ ଚାଳକ ରାମପୁର ଅଞ୍ଚଳର ମନିଷ ଗୌଡ(୨୩) ଓ ଅନ୍ୟ ଜଣେ ତାର ସାଙ୍ଗ ଯକ୍ଷରାଜ କୁଅଁର (୨୫) ଗାନ୍ଧୀ ଛକପଟକୁ ଯାଉଥିବା ସମୟରେ ବିରୀତ ଦିଗରୁ ଆସୁଥିବା ଏକ ବୋଲେରୋ ଅନ୍ୟ ଏକ ଗାଡ଼ିକୁ ଓଭରଟେକ୍ କରିବାକୁ ଯାଇ ଭାରସାମ୍ୟ ହରାଇ ବାଇକ୍କୁ ସିଧା ସଳଖ ଧକ୍କା ଦେଇଥିଲା । ଫଳରେ ବୋଲେରୋଟି ରାସ୍ତା କଡକୁ ଓଲଟି ପଡିଥିଲା । ବୋଲେରୋ ଡ଼୍ରାଇଭର ଅଳ୍ପକେ ରକ୍ଷା ପାଇଯାଇଥିବାବେଳେ ବାଇକ୍ରେ ଥିବା ଦୁଇ ଜଣ ଗୁରୁତର ଆହତ ହୋଇଥିଲେ । ସଙ୍ଗେ ସଙ୍ଗେ ସ୍ଥାନୀୟ ଲୋକେ ପହଞ୍ଚି ଦୁଇ ଜଣଙ୍କୁ ସ୍ଥାନୀୟ ଖଲିଆକାନି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇ ସେଠାରେ ତାଙ୍କର ପ୍ରାଥମିକ ଚିକିତ୍ସାକଲା ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି । ଘଟଣାସ୍ଥଳରେ ବ୍ରଜରାଜନଗର ପୋଲିସ ପହଞ୍ଚି ଗାଡି ଦୁଇଟିକୁ ଜବତ କରି ବୋଲେରୋ ଡ଼୍ରାଇଭରକୁ ଥାନାରେ ଅଟକ ରଖି ପଚରାଉଚରା କରୁଛି ।
