କେରଳରେ ପୁଣିଥରେ ‘ବ୍ରେନ୍ ଖାଉଥିବା’ ଏମିବାର ଆକ୍ରମଣ, ନେଇଗଲା ଆଉ ଜଣଙ୍କର ଜୀବନ
ନୂଆଦିଲ୍ଲୀ: କେରଳର କାସାରାଗୋଡ ଜିଲ୍ଲାରେ ବ୍ରେନ୍ ଖାଉଥିବା ଏମିବା’ ସଂକ୍ରମଣ ସନ୍ଦେହରେ ଆଉ ଜଣଙ୍କର ମୃତ୍ୟୁ ଘଟିଛି । ରିପୋର୍ଟ ଅନୁଯାୟୀ, ୩୮ ବର୍ଷୀୟ ମାଣିକନ୍ଦନ ରବିବାର (୨୨ ସେପ୍ଟେମ୍ବର ୨୦୨୪) ସନ୍ଧ୍ୟାରେ ଶେଷ ନିଶ୍ୱାସ ତ୍ୟାଗ କରିଥିଲେ ।
ମାଣିକନ୍ଦନ ନିକଟରେ ମୁମ୍ବାଇରୁ ଫେରି ଜ୍ୱରରେ ପୀଡିତ ଥିଲେ । ସେ ପ୍ରଥମେ କାସାରାଗୋଡର ସରକାରୀ ଜେନେରାଲ ହସ୍ପିଟାଲରେ ଚିକିତ୍ସିତ ହୋଇଥିଲେ, କିନ୍ତୁ ପରେ କନ୍ନୁରସ୍ଥିତ ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା, ଯେଉଁଠାରେ ଡାକ୍ତରମାନେ ନିଶ୍ଚିତ କରିଥିଲେ ଯେ ତାଙ୍କର ଏମିବିକ୍ ଏନସେଫାଲାଇଟିସର ଲକ୍ଷଣ ରହିଛି ।
ତେବେ ଗତ ଦୁଇ ମାସ ଧରି କେରଳରେ ବ୍ରେନ୍ ଖାଉଥିବା ଏମିବା ସଂକ୍ରମଣ ଦ୍ରୁତ ଗତିରେ ବ୍ୟାପିଯାଇଛି । ଏହି ସଂକ୍ରମଣର ପଞ୍ଚମ ସନ୍ଦିଗ୍ଧ ଶିକାର ହୋଇଥିବା ମାଣିକନ୍ଦନଙ୍କୁ ବିବେଚନା କରାଯାଉଛି । ଜୁଲାଇ ମାସରେ ଏହି ମାରାତ୍ମକ ସଂକ୍ରମଣ ବିଷୟରେ କେରଳ ସରକାର ଏକ ସତର୍କ ସୂଚନା ଜାରି କରିଥିଲେ, ଯେତେବେଳେ ଚାରି ପିଲାଙ୍କ ମଧ୍ୟରେ ଏମିବିକ ଏନସେଫାଲାଇଟିସ ରୋଗ ହୋଇଥିଲା, ସେଥିମଧ୍ୟରୁ ତିନିଜଣଙ୍କର ମୃତ୍ୟୁ ଘଟିଥିଲା ।
ବ୍ରେନ୍ ଖାଉଥିବା ଏମିବା କିମ୍ବା ଏମିବିକ୍ ଏନସେଫାଲାଇଟିସ୍ କ’ଣ?
‘ବ୍ରେନ୍ ଖାଉଥିବା ଏମିବା’ ଅତ୍ୟନ୍ତ ବିପଜ୍ଜନକ ଏବଂ ବିରଳ ସଂକ୍ରମଣ, ଯାହାକୁ ବୈଜ୍ଞାନିକ ରୂପରେ ନାଗଲେରିଆ ଫାଉଲେରୀ ଭାବରେ ଜଣାଶୁଣା । ଏହି ଏମିବା ସାଧାରଣତଃ ହ୍ରଦ, ମଧୁର ଜଳ, ନଦୀ, ଗରମ ପାଣିର ଝରଣା ଏବଂ ମାଟିରେ ଦେଖାଯାଏ । ଯେତେବେଳେ ଜଣେ ବ୍ୟକ୍ତି ଏହି ସ୍ଥାନଗୁଡିକୁ ଯାଆନ୍ତି, ସେ ହୁଏତ ଏହି ଏମିବା ସଂସ୍ପର୍ଶରେ ଆସିପାରନ୍ତି ଏବଂ ଏହା ଗୁରୁତର ରୋଗ ପ୍ରାଇମେରୀ ଏମିବିକ୍ ମେନିଙ୍ଗୋଏନ୍ସଫାଲାଇଟିସ୍ (ପିଏଏମ) ସୃଷ୍ଟି କରିପାରେ, ଯାହା ସ୍ନାୟୁ ପ୍ରଣାଳୀକୁ ପ୍ରଭାବିତ କରିଥାଏ ଏବଂ ଏହା ସାଂଘାତିକ ହୋଇପାରେ । ଏହି ଏମିବା ମସ୍ତିଷ୍କରେ ପ୍ରବେଶ କରେ ଏବଂ ଏହାକୁ ସଂକ୍ରମିତ କରେ, ତେଣୁ ଏହାକୁ ‘ବ୍ରେନ୍ ଖାଉଥିବା ଏମିବା’ କୁହାଯାଏ ।
