ବ୍ରିଟେନର ରାଜା ଚାର୍ଲ୍ସ ତୃତୀୟଙ୍କୁ ହେଲା କ୍ୟାନ୍ସର: ବକିଙ୍ଗହମ୍ ପ୍ୟାଲେସରୁ ସୂଚନା
ଲଣ୍ଡନ : ବ୍ରିଟେନର ରାଜା ଚାର୍ଲ୍ସ ତୃତୀୟ ଏବେ କ୍ୟାନ୍ସର ରୋଗରେ ପୀଡିତ ହୋଇଛନ୍ତି । ତାଙ୍କୁ କ୍ୟାନ୍ସର ହୋଇଥିବା ଏବେ ଖୁଲାସା ହୋଇଛି । ବ୍ରିଟିଶ ରାଜ ପରିବାର ଏହି ସୂଚନା ସୋସିଆଲ ମିଡିଆରେ ସେୟାର କରିଛି । ବକିଙ୍ଗହମ୍ ପ୍ୟାଲେସ୍ ଏକ ବିବୃତ୍ତିରେ କହିଛି ଯେ ପ୍ରୋଷ୍ଟେଟ୍ ବୃଦ୍ଧି ପାଇଁ ରାଜାଙ୍କ ଡାକ୍ତରୀ ପରୀକ୍ଷାରେ କ୍ୟାନ୍ସର ହୋଇଥିବା ଜଣାପଡିଛି ।
ବ୍ରିଟିଶ ରାଜାଙ୍କୁ କ୍ୟାନ୍ସର ହେବାର ଖବର ପାଇବା ପରେ ତାଙ୍କ ସମର୍ଥକମାନେ ଦୁଃଖିତ ହୋଇଛନ୍ତି । ରାଜାଙ୍କର ସମସ୍ତ ସାର୍ବଜନୀନ କାର୍ଯ୍ୟ ବାତିଲ କରିବାକୁ ଡାକ୍ତରମାନେ ପରାମର୍ଶ ଦେଇଛନ୍ତି । ତେବେ କିଙ୍ଗ ଚାର୍ଲ୍ସ କେଉଁ ପ୍ରକାର କ୍ୟାନ୍ସର ରୋଗରେ ପୀଡିତ ତାହା ସ୍ପଷ୍ଟ ହୋଇନାହିଁ ।
ବକିଙ୍ଗହମ୍ ପ୍ୟାଲେସର ଏକ ବିବୃତ୍ତିରେ କୁହାଯାଇଛି ଯେ, କ୍ୟାନ୍ସର ହୋଇଥିବା ଜଣାପଡିବା ପରେ ରାଜାଙ୍କର ନିୟମିତ ଚିକିତ୍ସା କାର୍ଯ୍ୟକ୍ରମ ଆରମ୍ଭ ହୋଇଛି । ଏହାରି ମଧ୍ୟରେ ଡାକ୍ତରମାନେ ତାଙ୍କୁ ସମସ୍ତ ଜନସାଧାରଣଙ୍କ କାର୍ଯ୍ୟକୁ ସ୍ଥଗିତ ରଖିବାକୁ ପରାମର୍ଶ ଦେଇଛନ୍ତି । ଏହାରି ମଧ୍ୟରେ ମହାରାଜା ପୂର୍ବପରି ରାଜ୍ୟର କାମ ଏବଂ ସରକାରୀ କାଗଜପତ୍ର ପରିଚାଳନା ଜାରି ରଖିବେ । ରାଜା ତାଙ୍କ ଚିକିତ୍ସା ବିଷୟରେ ସଂପୂର୍ଣ୍ଣ ସକାରାତ୍ମକ ଏବଂ ଯଥାଶୀଘ୍ର ପୂର୍ଣ୍ଣ ଜନସାଧାରଣ କାର୍ଯ୍ୟକଳାପକୁ ଫେରିବାକୁ ଆଗ୍ରହୀ ।
କିଙ୍ଗ ଚାର୍ଲ୍ସଙ୍କୁ ୭୫ ବର୍ଷ ବୟସ । ଏହି ବୟସରେ ସେ କର୍କଟ ରୋଗରେ ପୀଡିତ ହେବା ଚିନ୍ତାର ବିଷୟ । ରାଜା ଚାର୍ଲ୍ସଙ୍କ ସ୍ୱାସ୍ଥ୍ୟକୁ ନେଇ ରାଜ ପରିବାର ଚିନ୍ତିତ ଅଛନ୍ତି । ରାଣୀ ଏଲିଜାବେଥ୍ ଦ୍ୱିତୀୟଙ୍କ ମୃତ୍ୟୁ ପରେ ଗତ ବର୍ଷ ଚାର୍ଲ୍ସ ବ୍ରିଟେନର ରାଜା ହୋଇଥିଲେ । ସେ ୧୪ ନଭେମ୍ବର ୧୯୪୮ ରେ ଜନ୍ମଗ୍ରହଣ କରିଥିଲେ ।
