ଚୀନ ଉପରୁ ଟଳୁନି ବିପଦ, କରୋନା ପରେ ଏବେ ଦୁର୍ଘଟଣାରେ ଯାଉଛି ଲୋକଙ୍କ ଜୀବନ
ନୂଆଦିଲ୍ଲୀ:ଚାଇନା ଉପରୁ ବିପଦ ଟଳିବାର ନାଁ ନେଉଁ ନାହିଁ ।ସତେ ଯେପରି ଚୀନ ଉପରେ ଶନିଙ୍କ ଦଶା ପଡିଛି । କାରଣ ଚୀନରେ ପରିସ୍ଥିତି ସୁଧୁରିବାର ନାଁ ନେଉନାହିଁ । କରୋନା ତାଣ୍ଡବ ରଚିଚାଲିଥିବା ବେଳେ ଗୋଟିଏ ପରେ ଗୋଟିଏ ଦୁର୍ଘଟଣା ଖବର ମଧ୍ୟ ସାମ୍ନାକୁ ଆସୁଛି । ସୂଚନା ମୁତାବକ କିଛି ଦିନ ତଳେ ଚୀନରେ ସଡକ ଦୁର୍ଘଟଣାରେ ଲୋକ ପ୍ରାଣ ହରାଇଥିବା ବେଳେ ଆଜି ପୁଣି ଏକ ମମର୍ନ୍ତୁଦ ସଡକ ଦୁର୍ଘଟଣା ହୋଇଛି । ଏହି ଦୁର୍ଘଟଣାରେ ୧୭ ଜଣ ଲୋକଙ୍କ ମୃତ୍ୟୁ ହୋଇଛି ।
ପୂର୍ବ ଚୀନର ଜିଆଙ୍ଗସି ପ୍ରଦେଶର ନାନଚାଙ୍ଗ କାଉଣ୍ଟିରେ ରବିବାର ଦିନ ଏକ ଭୟଙ୍କର ସଡ଼କ ଦୁର୍ଘଟଣାରେ ଅତି କମରେ ୧୭ ଜଣଙ୍କର ମୃତ୍ୟୁ ଘଟିଥିବା ବେଳେ ୨୨ ଜଣ ଆହତ ହୋଇଛନ୍ତି। ନ୍ୟୁଜ୍ ଏଜେନ୍ସି AFP ଚୀନ୍ର ସରକାରୀ ଗଣମାଧ୍ୟମ ଏବଂ ସେଠାରେ ଥିବା ଅଧିକାରୀଙ୍କ ଉଦ୍ଧେଶ୍ୟରେ ଏହି ସୂଚନା ଦେଇଛି। ଚୀନ୍ର ରାଜ୍ୟ ଗଣମାଧ୍ୟମ CGTN କହିଛି ଯେ ଆହତମାନଙ୍କୁ ଡାକ୍ତରଖାନା ନିଆଯାଇଛି ଏବଂ ଦୁର୍ଘଟଣାର କାରଣ ଅନୁସନ୍ଧାନ କରାଯାଉଛି। ତେବେ ଏହି ସଡକ ଦୁର୍ଘଟଣା ସ୍ଥାନୀୟ ସମୟ ନାନଚାଙ୍ଗ କାଉଣ୍ଟିରେ ରାତି ୧ ଟା ପୂର୍ବରୁ ଘଟିଥିଲା ।
ଚୀନ୍ର ରାଜ୍ୟ ଗଣମାଧ୍ୟମ ସିସିଟିଭି କହିଛି ଯେ ଦୁର୍ଘଟଣାର କାରଣ ପୁଙ୍ଖାନୁପୁଙ୍ଖ ଅନୁସନ୍ଧାନ କରାଯାଉଛି।ଦୁର୍ଘଟଣାର ଖବର ପ୍ରଚାରିତ ହେବାର ପ୍ରାୟ ଏକ ଘଣ୍ଟା ପରେ ନାନଚାଙ୍ଗ କାଉଣ୍ଟି ଟ୍ରାଫିକ ପୋଲିସ ମୋଟର ଚାଳକମାନଙ୍କୁ ଏକ ଯାତ୍ରା ପରାମର୍ଶଦାତା ଜାରି କରି କହିଛି ଯେ ଏହି ଅଞ୍ଚଳରେ ‘ପାଗ ଖରାପ’ ଅନୁଭୂତ ହେଇଛି, ଯେଉଁ କାରଣରୁ ଦୃଶ୍ୟମାନତା ବହୁତ କମ୍ ଅଛି । ଯତ୍ନର ସହ ଗାଡି ଚଲାନ୍ତୁ । କାରଣ କମ୍ ଭିଜିବିଲିଟି ସହଜରେ ଟ୍ରାଫିକ୍ ଦୁର୍ଘଟଣା ଅଧିକ ଘଟାଇପାରେ।
ସୂଚନାମୁତାବକ କଡା ସୁରକ୍ଷା ନିୟନ୍ତ୍ରଣ ଅଭାବରୁ ଚାଇନାରେ ସଡ଼କ ଦୁର୍ଘଟଣା ସାଧାରଣ ଅଟେ। ଗତ ମାସରେ, ଚାଇନାର କେନ୍ଦ୍ରୀୟ ରାଜପଥରେ ମରାମତି କାର୍ଯ୍ୟ ସମୟରେ ଆବର୍ଜନା ଗଦା ହୋଇଥିବାରୁ କୁହୁଡ଼ିରେ ଦୃଶ୍ୟମାନତା ହେତୁ ଶହ ଶହ ଗାଡି ପରସ୍ପର ସହ ମୁହାଁମୁହିଁ ହୋଇଥିଲେ, ଏଥିରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଲୋକ ଆହତ ହୋଇଥିଲେ। ଗତ ବର୍ଷ ସେପ୍ଟେମ୍ବରରେ ଦକ୍ଷିଣ-ପଶ୍ଚିମ ଚାଇନାର ଗୁଇଜୋ ପ୍ରଦେଶର ଏକ ମୋଟରପଥରେ ଏକ ବସ୍ ଓଲଟି ପଡ଼ିବାରୁ ୨୭ଜଣ ଯାତ୍ରୀଙ୍କ ମୃତ୍ୟୁ ଘଟିଥିଲା। ବସ୍ ଏହି ସମସ୍ତ ଯାତ୍ରୀଙ୍କୁ କରାଣ୍ଟାଇନ୍ ସେଣ୍ଟରକୁ ନେଇ ଯାଉଥିଲା, ଯେଉଁଥିରେ କରୋନା ରୋଗୀ ଥିଲେ ।
