କମିଶନରେଟ୍ ପୋଲିସ ପକ୍ଷରୁ ସତର୍କ ସୂଚନା: ଆପଣଙ୍କ ମୋବାଇଲକୁ ଆସୁଥିବା ନକଲି ଟ୍ରାଫିକ ଚାଲାଣ ମେସେଜ୍ ଲିଙ୍କ ଉପରେ କ୍ଲିକ୍ କରନ୍ତୁନି, ଆକାଉଣ୍ଟ ହ୍ୟାକ୍ ହୋଇଯିବ
ଭୁବନେଶ୍ୱର(ଓଡ଼ିଶା ଭାସ୍କର): ଦିନକୁ ଦିନ ସାଇବର କ୍ରାଇମ୍ ବଢ଼ିବାରେ ଲାଗିଛି । ଠକମାନେ ଠକାମିର ନୂଆ ନୂଆ ତରିକା ଆପଣାଉଛନ୍ତି । ନକଲି ଟ୍ରାଫିକ ଚାଲାଣ, ମିଛ ପୋଲିସ ଅଫିସର ଆଦି ତରିକା ଆପଣାଇ ସାଇବର ଫ୍ରଡମାନେ ଲୋକଙ୍କୁ ବୋକା ବନାଉଛନ୍ତି । ଅନେକ ଲୋକ ଜାଣତରେ ବି ଏଭଳି ଠକଙ୍କ ଜାଲରେ ପଡ଼ି ବର୍ବାଦ ହୋଇଥାନ୍ତି । ତେବେ ଲୋକଙ୍କର ମୋବାଇଲକୁ ନକଲି ଟ୍ରାଫିକ ଚାଲାଣ ମେସେଜ୍ ପଠାଇ ସାଇବର ଅପରାଧୀମାନେ ଲୋକଙ୍କୁ ସେମାନଙ୍କ ଜାଲରେ ଫସାଉଛନ୍ତି ।
ଟ୍ରାଫିକ ଚାଲାଣ କଟିଥିବା ଭାବି ଲୋକମାନେ ଉକ୍ତ ଲିଙ୍କରେ କ୍ଲିକ୍ କରିବା କ୍ଷଣି ସେମାନଙ୍କର ଆକାଉଣ୍ଟ ହ୍ୟାକ୍ ହୋଇଯାଉଛି । ଏହି ଇ-ଚାଲାଣ ଠକେଇ ମାମଲା ଏବେ କିଛି ରାଜ୍ୟରେ ଦେଖିବାକୁ ମିଳିଥିବା ବେଳେ ଏନେଇ ଓଡ଼ିଶା ପୋଲିସ ପକ୍ଷରୁ ସତର୍କ ସୂଚନା ଜାରି କରାଯାଇଛି । ସାଇବର ଠକମାନେ ଗାଡ଼ି ଓଭର ସ୍ପିଡ୍ ପାଇଁ ଚାଲାଣ କଟିଛି କହି ଗାଡ଼ି ଚାଳକଙ୍କ ନିକଟକୁ ଲିଙ୍କ ପଠାଉଛନ୍ତି । ଉକ୍ତ ଲିଙ୍କରେ କ୍ଲିକ୍ କରିବା ମାତ୍ରେ ଲୋକଙ୍କର ଆକାଉଣ୍ଟ ଖାଲି ହୋଇଯାଉଛି । ତେଣୁ ଠକମାନେ ପଠାଉଥିବା ଲିଙ୍କରେ କ୍ଲିକ୍ ନ କରିବାକୁ ପରାମର୍ଶ ଦିଆଯାଇଛି ।
ସେହିପରି ନକଲି ପୋଲିସ ଅଫିସରର ପରିଚୟ ଦେଇ ଲୋକଙ୍କୁ ମିଥ୍ୟା ଅପରାଧରେ ଫସାଇ ଦେବା ଆଳରେ ମଧ୍ୟ ଠକମାନେ ଲୋକଙ୍କୁ ଟଙ୍କା ମାଗୁଛନ୍ତି । ପାର୍ଟ ଟାଇମ୍ ଜବ ନାମରେ ଠକୁଥିବା ସାଇବର ଅପରାଧୀଙ୍କ ରାକେଟ ଏବେ ରାଜ୍ୟରେ ସକ୍ରିୟ ଥିବା ଜଣାପଡ଼ିଛି । ଅପରାଧୀମାନେ ସାମାଜିକ ଗଣମାଧ୍ୟମରେ ସେମାନଙ୍କର ଫେକ୍ ୱେବସାଇଟର ପ୍ରମୋସନ କରାଉଛନ୍ତି । ନକଲି ଓ ଅସଲି ୱେବସାଇଟର ହୋମପେଜରେ ଫରକ୍ ରହୁଛି । ସାଧାରଣ ଲୋକେ ଏହାର ଲିଙ୍କକୁ ନ ଦେଖି ଅସଲି ଭାବି କ୍ଲିକ୍ କରୁଛନ୍ତି । ଗତ ୫ ବର୍ଷ ମଧ୍ୟରେ ୧୦ରୁ ଅଧିକ ୱେବସାଇଟକୁ କ୍ଲୋନିଂ କରାଯାଇ ଠକେଇ ଘଟଣା ସାମ୍ନାକୁ ଆସିଛି । ଏହାର ମୂଳ ପର୍ଯ୍ୟନ୍ତ ପହଞ୍ଚିବାକୁ କ୍ରାଇମବ୍ରାଞ୍ଚ ସକ୍ଷମ ହୋଇପାରି ନାହିଁ ।
Cyber Scam Alert pic.twitter.com/LDdAQ3ZGpW
— COMMISSIONERATE POLICE (@cpbbsrctc) April 19, 2024
ସାବଧାନତା ହିଁ ଆପଣଙ୍କ ପରିଚୟ III#cybercopodisha #cybersafeodisha #OdishaPolice pic.twitter.com/udSCT5w56Q
— Cybercop Odisha (@cybercopodisha) April 19, 2024