ସତର୍କ! ମହାକୁମ୍ଭ ୨୦୨୫ ପାଇଁ ବୁକିଂ ନାମରେ ଠକେଇ କରୁଛି ନକଲି ୱେବସାଇଟ୍, ପୋଲିସ ଲୋକଙ୍କୁ କଲା ସାବଧାନ୍

ନୂଆଦିଲ୍ଲୀ: ସୋମବାରଠାରୁ ଆସ୍ଥାର ମହାନ ପର୍ବ ମହାକୁମ୍ଭ ୨୦୨୫ ଆରମ୍ଭ ହେଉଛି । ୪୫ ଦିନ ଧରି ଚାଲିବାକୁ ଥିବା ଏହି ମେଳାରେ କୋଟି କୋଟି ଭକ୍ତ ଅଂଶଗ୍ରହଣ କରିବେ । ସ୍ପଷ୍ଟଭାବରେ ସାଇବର ଠକମାନେ ମଧ୍ୟ ଏହା ଉପରେ ନଜର ରଖିଛନ୍ତି । ମେଳା ପୂର୍ବରୁ ଅନେକ ନକଲି ୱେବସାଇଟ୍ ମେଳା ବୁକିଂ ଏବଂ ଦାନ ନାମରେ ଲୋକଙ୍କୁ ଠକୁଛନ୍ତି । ଏହାକୁ ଦୃଷ୍ଟିରେ ରଖି, ମହାରାଷ୍ଟ୍ରର ପିମ୍ପରି-ଚିଞ୍ଚୱାଡର ସାଇବର କ୍ରାଇମ୍ ପୋଲିସ ଲୋକମାନଙ୍କୁ ସତର୍କ କରିଛି । ପୋଲିସ କହିଛି ଯେ, ଲୋକଙ୍କୁ ଏପରି ନକଲି ୱେବସାଇଟ୍ ପ୍ରତି ସତର୍କ ରହିବାକୁ ପଡିବ ।

ପୋଲିସ ଜାରି କରିଛି ଆଡଭାଇଜରୀ:
ପୋଲିସ ଦ୍ୱାରା ଜାରି କରାଯାଇଥିବା ଆଡଭାଇଜରୀରେ କୁହାଯାଇଛି ଯେ, ମହାକୁମ୍ଭ ଯାଉଥିବା ଭକ୍ତଙ୍କ ଆସ୍ଥା ସହିତ ଖେଳିବା ପାଇଁ ଇଣ୍ଟରନେଟ୍ ଏବଂ ସୋସିଆଲ ମିଡିଆରେ ଅନେକ ନକଲି ୱେବସାଇଟ୍, ଲିଙ୍କ୍ ଏବଂ ଅନ୍ୟାନ୍ୟ ପ୍ଲାଟଫର୍ମ ସୃଷ୍ଟି କରାଯାଇଛି । ଏହା ଗୃହ ମନ୍ତ୍ରଣାଳୟର ଭାରତୀୟ ସାଇବର ଅପରାଧ ସମନ୍ୱୟ କେନ୍ଦ୍ର ନଜରକୁ ଆସିଛି । ଏହି କାରଣରୁ ପିମ୍ପରି-ଚିଞ୍ଚୱାଡ ସାଇବର ପୋଲିସ ଏପରି ଠକେଇ ବିଷୟରେ ଲୋକଙ୍କୁ ସତର୍କ କରିବା ପାଇଁ ପରାମର୍ଶ ଜାରି କରୁଛି ।

ଏହି ଉପାୟରେ ଠକେଇ ହୋଇପାରେ:
ପୋଲିସ କହିଛି ଯେ ଲୋକଙ୍କୁ ବିଭିନ୍ନ ଉପାୟରେ ଠକେଇ କରାଯାଇପାରିବ । କିଛି ନକଲି ୱେବସାଇଟ୍, ଲିଙ୍କ୍ ଏବଂ ପ୍ଲାଟଫର୍ମ ଦାନ ନାମରେ ଲୋକଙ୍କଠାରୁ ଟଙ୍କା ନେଇପାରନ୍ତି । ଏହା ବ୍ୟତୀତ ହୋଟେଲ, ଟେଣ୍ଟ ଏବଂ ଅନ୍ୟାନ୍ୟ ରହଣି ବ୍ୟବସ୍ଥା ନାମରେ ସେମାନଙ୍କୁ ଠକି ଦିଆଯାଇପାରେ । ଏହି ପ୍ଲାଟଫର୍ମଗୁଡ଼ିକ ମଧ୍ୟରୁ କିଛି ଲୋକଙ୍କୁ ଭାଇରସ୍ ଥିବା ଫାଇଲ୍ ଡାଉନଲୋଡ୍ କରିବାକୁ କହିପାରେ, ଯାହା ହ୍ୟାକର୍ସଙ୍କ ହାତରେ ବ୍ୟବହାରକାରୀଙ୍କ ଡିଭାଇସ୍ ଆକ୍ସେସ୍ ଛାଡ଼ିପାରେ ।

ଠକେଇରୁ ରକ୍ଷା ପାଇବା ପାଇଁ ଏହିସବୁ ପଦକ୍ଷେପ:

କୌଣସି ସନ୍ଦିଗ୍ଧ ୱେବସାଇଟ୍ ଏବଂ ଲିଙ୍କ୍ ଉପରେ କ୍ଲିକ୍ ନ କରିବାକୁ ପୋଲିସ ଲୋକମାନଙ୍କୁ ସତର୍କ କରାଇଛି । ମେଳା ସମ୍ବନ୍ଧୀୟ ସମସ୍ତ ସୂଚନା ପାଇଁ, ମେଳାର ସରକାରୀ ୱେବସାଇଟ୍ ପରିଦର୍ଶନ କରନ୍ତୁ । ଏହା ବ୍ୟତୀତ, କୌଣସି ଅଜଣା କିମ୍ବା ସନ୍ଦେହଜନକ ବ୍ୟକ୍ତିଙ୍କ ସହିତ ସମ୍ବେଦନଶୀଳ, ଆର୍ôଥକ ସୂଚନା ଏବଂ ପାସୱାର୍ଡ ସେୟାର କରନ୍ତୁ ନାହିଁ । ଯଦି ଆପଣଙ୍କୁ ଠକେଇ ସନ୍ଦେହ ହୁଏ, ତେବେ ନିକଟସ୍ଥ ପୋଲିସ ଷ୍ଟେସନ କିମ୍ବା ସାଇବର କ୍ରାଇମ ହେଲ୍ପଲାଇନ୍ ସହିତ ଯୋଗାଯୋଗ କରନ୍ତୁ ।