ଦିଲ୍ଲୀ ବିଧାନସଭା ନିର୍ବାଚନ: କେତେ ଟଙ୍କା ଖର୍ଚ୍ଚ କରିଥିଲେ ବିଧାୟକ, ADR ରିପୋର୍ଟରେ ପ୍ରକାଶ
ନୂଆଦିଲ୍ଲୀ,୮ା୫: ଦିଲ୍ଲୀରେ ଅନୁଷ୍ଠିତ ବିଧାନସଭା ନିର୍ବାଚନରେ ବିଧାୟକମାନେ କେତେ ଟଙ୍କା ଖର୍ଚ୍ଚ କରିଥିଲେ, ତାହା ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ADR)ର ରିପୋର୍ଟରେ ପ୍ରକାଶ ପାଇଛି। ଦିଲ୍ଲୀର ୬୯ ବିଧାୟକଙ୍କ ନିର୍ବାଚନ ରେକର୍ଡ ବିଶ୍ଳେଷଣ କରିବା ପରେ ADR ଏକ ରିପୋର୍ଟ ପ୍ରକାଶ କରିଛି, ଯାହା ଦର୍ଶାଉଛି ଯେ ୬୯ ଜଣଙ୍କ ମଧ୍ୟରୁ ୩୧ ଜଣ (୪୫ ପ୍ରତିଶତ) ନିଜ ନିଜ ନିର୍ବାଚନ ମଣ୍ଡଳୀରେ ନିର୍ଦ୍ଧାରିତ ସୀମାର ୫୦ ପ୍ରତିଶତରୁ କମ୍ ନିର୍ବାଚନ ଖର୍ଚ୍ଚ ଘୋଷଣା କରିଛନ୍ତି।
ADR ଅନୁଯାୟୀ, ଫେବୃଆରୀ ମାସରେ ବିଧାନସଭା ନିର୍ବାଚନରେ ବିଧାୟକମାନଙ୍କ ଦ୍ୱାରା ଖର୍ଚ୍ଚ ହୋଇଥିବା ହାରାହାରି ପରିମାଣ ୨୦.୭୯ଲକ୍ଷ ଟଙ୍କା ଥିଲା, ଯାହା ନିର୍ଦ୍ଧାରିତ ସୀମାର ୫୨ ପ୍ରତିଶତ। ରିପୋର୍ଟରେ କୁହାଯାଇଛି, ଦଳଗତ ହାରାହାରି ନିର୍ବାଚନ ଖର୍ଚ୍ଚ ଦର୍ଶାଉଛି ବିଜେପିର ୪୭ ଜଣ ବିଧାୟକଙ୍କ ହାରାହାରି ଖର୍ଚ୍ଚ ୨୪.୬୮ ଲକ୍ଷ ଟଙ୍କା (ଖର୍ଚ ସୀମାର ୬୧.୧ ପ୍ରତିଶତ), ଯେତେବେଳେ ଆମ ଆଦମୀ ପାର୍ଟି (AAP)ର ୨୨ ଜଣ ବିଧାୟକଙ୍କ ହାରାହାରି ଖର୍ଚ୍ଚ ୧୨.୪୮ ଲକ୍ଷ ଟଙ୍କା (ଖର୍ଚ ସୀମାର ୩୧.୨ ପ୍ରତିଶତ)।
ସର୍ବାଧିକ ଖର୍ଚ୍ଚ କରିଥିବା ବିଜେପି ବିଧାୟକ
ଏହା ସହିତ, ADR ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, ସର୍ବାଧିକ ଖର୍ଚ୍ଚ କରିଥିବା ଶୀର୍ଷ ତିନି ବିଧାୟକ ବିଜେପିର। ସେମାନଙ୍କ ମଧ୍ୟରେ, RK ପୁରମର ଅନିଲ କୁମାର ଶର୍ମା ସର୍ବାଧିକ ଖର୍ଚ୍ଚ କରିଛନ୍ତି, ୩୧.୯୧ ଲକ୍ଷ ଟଙ୍କା (ସୀମାର ୮୦ ପ୍ରତିଶତ), ଦ୍ୱାରକାର ପ୍ରଦ୍ୟୁମ୍ନ ସିଂହ ରାଜପୁତ ୩୧.୪୪ ଲକ୍ଷ ଟଙ୍କା (୭୯ ପ୍ରତିଶତ) ଏବଂ ଜନକପୁରୀର ଆଶିଷ ସୁଦ ୩୦.୬୮ ଲକ୍ଷ ଟଙ୍କା (୭୭ ପ୍ରତିଶତ)।
ସବୁଠାରୁ କମ୍ ଖର୍ଚ୍ଚ କରିଥିବା ପ୍ରାର୍ଥୀମାନେ AAPର
ରିପୋର୍ଟ ଅନୁସାରେ, ସବୁଠାରୁ କମ୍ ଖର୍ଚ୍ଚ କରିଥିବା ପ୍ରାର୍ଥୀମାନେ AAMର ଥିଲେ। ADR କହିଛି ଯେ ମାଟିଆ ମହଲର ଆଲେ ମହମ୍ମଦ ଇକବାଲ କେବଳ ୪.୫୩ ଲକ୍ଷ ଟଙ୍କା (୧୧ ପ୍ରତିଶତ), ସୀମା ପୁରୀର ବୀର ସିଂହ ଧିଙ୍ଗାନ ୬.୫ଲକ୍ଷ ଟଙ୍କା (୧୬ ପ୍ରତିଶତ) ଏବଂ ଦିଲ୍ଲୀ କ୍ୟାଣ୍ଟର ବୀରେନ୍ଦ୍ର ସିଂହ କାଡିଆନ ୬.୫୪ ଲକ୍ଷ ଟଙ୍କା (୧୬ ପ୍ରତିଶତ) ଖର୍ଚ୍ଚ କରିଛନ୍ତି।
୮୮ ବିଧାୟକ ଯାନବାହନ ଉପରେ ଖର୍ଚ୍ଚ ରିପୋର୍ଟ କରିଛନ୍ତି
ନିର୍ବାଚନ ପ୍ରଚାର ପାଣ୍ଠି ଖର୍ଚ୍ଚ କ୍ଷେତ୍ରରେ, ୮୮ ଜଣ ବିଧାୟକ ଯାନବାହନ ଉପରେ ଖର୍ଚ୍ଚ ରିପୋର୍ଟ କରିଛନ୍ତି ଯାହା ସବୁଠାରୁ ସାଧାରଣ ବର୍ଗ। ଷ୍ଟାର ପ୍ରଚାରକଙ୍କ ସହିତ ସାଧାରଣ ସଭା ଏବଂ ରାଲି ଆୟୋଜନ ପରବର୍ତ୍ତୀ ସବୁଠାରୁ ଗୁରୁତ୍ୱପୂର୍ଣ୍ଣ ବର୍ଗ ଥିଲା, ଯେଉଁଥିରେ ୭୨ ପ୍ରତିଶତ ବିଧାୟକ ଏପରି ଖର୍ଚ୍ଚ କରିଥିଲେ। ରିପୋର୍ଟରେ କୁହାଯାଇଛି ଯେ, ଅନ୍ୟ କ୍ଷେତ୍ରରେ ଡିଜିଟାଲ ପହଞ୍ଚ ବୃଦ୍ଧି ସତ୍ତ୍ୱେ, ଡିଜିଟାଲ ପ୍ରଚାର ପ୍ରାୟ ସମ୍ପୂର୍ଣ୍ଣ ଅନୁପସ୍ଥିତ ଥିଲା। କେବଳ ଜଣେ ବିଧାୟକ (୧ ପ୍ରତିଶତ) ଏହି କ୍ଷେତ୍ରରେ (ଡିଜିଟାଲ ପ୍ରଚାର) ଖର୍ଚ୍ଚ ଘୋଷଣା କରିଥିଲେ। ଏହା ପାରମ୍ପରିକ ପଦ୍ଧତି ଉପରେ ଏକ ଦୃଢ଼ ନିର୍ଭରଶୀଳତା ଦର୍ଶାଏ।
ପାଣ୍ଠି ଦୃଷ୍ଟିରୁ, ରାଜନୈତିକ ଦଳଗୁଡ଼ିକ ନିର୍ବାଚନ ଖର୍ଚ୍ଚ ପାଇଁ ଅର୍ଥର ମୁଖ୍ୟ ଉତ୍ସ ଥିଲେ। ବିଧାୟକମାନଙ୍କ ଦ୍ୱାରା ସଂଗୃହୀତ ମୋଟ ପାଣ୍ଠିର ୭୫ ପ୍ରତିଶତ ଦଳଗୁଡ଼ିକରୁ ଆସିଥିଲା। ପ୍ରାୟ ୧୧ ପ୍ରତିଶତ ପ୍ରାର୍ଥୀଙ୍କ ବ୍ୟକ୍ତିଗତ ସମ୍ବଳରୁ ଆସିଥିଲା, ଯେତେବେଳେ ୧୪ ପ୍ରତିଶତ ବ୍ୟକ୍ତି, କମ୍ପାନୀ ଏବଂ ଅନ୍ୟାନ୍ୟ ସଂଗଠନରୁ ଆସିଥିଲା।
ଟଙ୍କା କେଉଁଠାରୁ ଆସିଲା
୬୯ ଜଣ ବିଧାୟକଙ୍କ ମଧ୍ୟରୁ, ୮୦ ପ୍ରତିଶତ କହିଛନ୍ତି ଯେ ସେମାନେ ସେମାନଙ୍କ ରାଜନୈତିକ ଦଳଗୁଡ଼ିକଠାରୁ ଆର୍ଥିକ ସହାୟତା ପାଇଛନ୍ତି, ୫୭ ପ୍ରତିଶତ ଦାନ କିମ୍ବା ଋଣ ମାଧ୍ୟମରେ ପାଣ୍ଠି ସଂଗ୍ରହ କରିଛନ୍ତି ଏବଂ ୯୧ ପ୍ରତିଶତ ସେମାନଙ୍କ ପ୍ରଚାର ସମୟରେ ବ୍ୟକ୍ତିଗତ ପାଣ୍ଠି ବ୍ୟବହାର କରିଛନ୍ତି। ରୋହିଣୀ ନିର୍ବାଚନମଣ୍ଡଳୀର ବିଧାୟକ ବିଜେନ୍ଦର ଗୁପ୍ତା (ବିଜେପି)ଙ୍କ ଖର୍ଚ୍ଚ ବିବରଣୀ ୱେବସାଇଟରେ ଉପଲବ୍ଧ ନଥିବାରୁ ତାହା ବିଶ୍ଳେଷଣ କରାଯାଇ ନଥିଲା।