ରାଜଧାନୀରେ ମିଳିଲା ଡେଙ୍ଗୁର ସବୁଠାରୁ ବିପଜ୍ଜନକ ଷ୍ଟ୍ରେନ୍, ଭୟଙ୍କର ହୋଇପାରେ ପରିସ୍ଥିତି!
ନୂଆଦିଲ୍ଲୀ: ବର୍ଷା ଓ ବନ୍ୟା ପରେ ଦିଲ୍ଲୀ ସମେତ ସମଗ୍ର ଏନସିଆରରେ ଡେଙ୍ଗୁ ରୋଗ ସାମ୍ନାକୁ ଆସୁଛି । ଏହି ସମୟରେ ରାଜଧାନୀ ଦିଲ୍ଲୀରେ ଡେଙ୍ଗୁ ରୋଗର ଏକ ବିପଜ୍ଜନକ ଷ୍ଟ୍ରେନ୍ ବ୍ୟାପିବାରେ ଲାଗିଛି । ଅବଶ୍ୟ ଏବେ ଏହାର ସ୍ଥିତି ଗମ୍ଭୀର ନାହିଁ, କିନ୍ତୁ ସତର୍କତା ଅବଲମ୍ବନ ନକଲେ ଏହା ଗୁରୁତର ହୋଇପାରେ । ତେବେ ଡେଙ୍ଗୁରେ ଚାରୋଟି ଭିନ୍ନ ଷ୍ଟ୍ରେନ୍ ଅଛି (ଡେନ୍ -୧, ଡେନ୍-୨, ଡେନ୍ -୩ ଏବଂ ଡେନ୍ -୪), ଯେଉଁଥିରୁ ଡେନ୍-୨ ଷ୍ଟ୍ରେନ୍ ବିପଜ୍ଜନକ । ଦିଲ୍ଲୀରେ ଯାଞ୍ଚ ସମୟରେ ଡେଙ୍ଗୁର ଡେନ୍-୨ ଷ୍ଟ୍ରେନ୍ ସଂକ୍ରମଣ ଚିହ୍ନଟ ହୋଇଛି । ଏହାରି ମଧ୍ୟରେ ରୋଗୀଙ୍କୁ ହେମୋରାଜିକ୍ ଜ୍ୱର ହେବା ବିପଜ୍ଜନକ ବୋଲି ବିବେଚନା କରାଯାଏ ।
ଡେନ୍ -୧ ଏବଂ ଡେନ୍ -୩ ଷ୍ଟ୍ରେନ୍ ସାମାନ୍ୟ ଲକ୍ଷଣ ଥିବାବେଳେ ଡେନ୍-୨ ଅଧିକ ଗୁରୁତର । ଅନ୍ୟପଟେ ଡେନ୍ -୪ ଦକ୍ଷିଣ ଭାରତର କିଛି ଅଂଶରେ ମିଳିଥାଏ । ଦିଲ୍ଲୀରେ ମିଳିଥିବା ଷ୍ଟ୍ରେନରେ ରୋଗୀକୁ ଜ୍ୱର, ଗଣ୍ଠି ଯନ୍ତ୍ରଣା, ଆଖି ତଳେ ଯନ୍ତ୍ରଣା, ମୁଣ୍ଡବିନ୍ଧା, କୁଞ୍ଚନ ଏବଂ ମାଂସପେଶୀ ଯନ୍ତ୍ରଣା ଅନୁଭବ ହେଉଛି । ଏହି ଲକ୍ଷଣଗୁଡ଼ିକ ଚିକୁଙ୍ଗୁନିଆ ସହିତ କିଛି ମାତ୍ରାରେ ସମାନ ।
ହେମୋରାଜିକ୍ ଜ୍ୱର ଅତ୍ୟନ୍ତ ବିପଜ୍ଜନକ :-
ଯଦି ହେମୋରାଜିକ୍ ଜ୍ୱର ହୁଏ ତେବେ ପରିସ୍ଥିତି ଭୟଙ୍କର ହୋଇପାରେ । ଏହି ଅବସ୍ଥାରେ ପ୍ଲେଟଲେଟର ଅଭାବ ହୋଇଥାଏ, ଯାହା ଶରୀର ଭିତରେ ଓ ବାହାରେ ରକ୍ତସ୍ରାବ ହେବାର ଆଶଙ୍କାକୁ ବଢ଼ାଇଥାଏ । ଏହା ସହିତ ପେଟରେ ଯନ୍ତ୍ରଣା ମଧ୍ୟ ବଢ଼ିଯାଏ ଏବଂ ନାକ, ଗୁଣ୍ଡ, ବାନ୍ତି ଏବଂ ଝାଡାରୁ ରକ୍ତ ଆସିବା ଆରମ୍ଭ କରେ । ଏଭଳି ପରିସ୍ଥିତିରେ ଡେଙ୍ଗୁ ର ଡେନ୍-୨ ଷ୍ଟ୍ରେନ୍ ମଧ୍ୟ ବିପଜ୍ଜନକ ଏବଂ ରୋଗୀ ଶକ୍ ସିଣ୍ଡ୍ରୋମ ଅବସ୍ଥାରେ ଚାଲିଯାଏ । ବ୍ଲଡ ପ୍ରେସର ଅତି ଶୀଘ୍ର ହ୍ରାସ ହେବାକୁ ଲାଗେ ।
ପୂର୍ବରୁ ଡେଙ୍ଗୁ ହୋଇଥିଲେ ତେବେ ଅଧିକ ସତର୍କ ରୁହନ୍ତୁ :-
ଯେଉଁ ଲୋକମାନଙ୍କୁ ୨-୩ ବର୍ଷ ପୂର୍ବରୁ ଡେଙ୍ଗୁ ହୋଇଥିଲା, ସେମାନେ ଅଧିକ ସଚେତନ ହେବା ଉଚିତ୍ । ଏହା ବ୍ୟତୀତ ଯେଉଁମାନଙ୍କର ପୂର୍ବରୁ ୨-୩ ଥର ଡେଙ୍ଗୁ ହୋଇଥିଲା, ସେମାନଙ୍କୁ ଚିନ୍ତା କରିବାର ଆବଶ୍ୟକତା ନାହିଁ । ଏହିପରି ଲୋକଙ୍କଠାରେ ସଂକ୍ରମଣ ସହ ଲଢ଼ିବା ପାଇଁ ଆଣ୍ଟିବଡି ପ୍ରସ୍ତୁତ ହୋଇସାରିଛି ।