‘ମତଭେଦ ବିବାଦରେ ପରିଣତ ହେବା ଉଚିତ୍ ନୁହେଁ’
ନୂଆଦିଲ୍ଲୀ,୧୪ା୭: ସାଂଘାଇ ସହଯୋଗ ସଂଗଠନ (SCO) ସମ୍ମିଳନୀ ପୂର୍ବରୁ ସୋମବାର ବୈଦେଶିକ ମନ୍ତ୍ରୀ ଏସ ଜୟଶଙ୍କର ତାଙ୍କ ଚୀନ୍ ପ୍ରତିପକ୍ଷ ୱାଙ୍ଗ ୟିଙ୍କ ସହ ଏକ ବ୍ୟାପକ ବୈଠକରେ କହିଥିଲେ ଯେ, ଭାରତ-ଚୀନ୍ ସମ୍ପର୍କକୁ ସ୍ୱାଭାବିକ କରିବା ଦିଗରେ ଗତ ନଅ ମାସରେ ‘ଭଲ ପ୍ରଗତି’ ହୋଇଛି। ବର୍ତ୍ତମାନ ଉଭୟ ଦେଶ ପ୍ରକୃତ ନିୟନ୍ତ୍ରଣ ରେଖା (LAC) ରେ ଉତ୍ତେଜନା ହ୍ରାସ କରିବା ଉପରେ ଧ୍ୟାନ ଦେବା ଉଚିତ।
ଜୟଶଙ୍କର ଆଲୋଚନାରେ ସ୍ପଷ୍ଟ ଭାବରେ କହିଥିଲେ ଯେ, ଯଦି ଭାରତ ଏବଂ ଚୀନ୍ ମଧ୍ୟରେ ସମ୍ପର୍କକୁ ‘ସକାରାତ୍ମକ ଦିଗରେ’ ଆଗକୁ ନେବାକୁ ହୁଏ, ତେବେ ଏହା ଗୁରୁତ୍ୱପୂର୍ଣ୍ଣ ଯେ ପାରସ୍ପରିକ ମତଭେଦ ବିବାଦରେ ପରିଣତ ନହୁଏ ଏବଂ ପ୍ରତିଯୋଗିତା ସଂଘର୍ଷର ରୂପ ନନିଏ।
‘ପ୍ରତିବନ୍ଧକ ବାଣିଜ୍ୟ ପଦକ୍ଷେପ’ ଏବଂ ‘ବାଧା’କୁ ଏଡାଇବା ବିଷୟରେ ଜୟଶଙ୍କର କଥା ହୋଇଥିଲେ, ଯାହା ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ରପ୍ତାନି ଉପରେ ଚୀନ୍ ଦ୍ୱାରା ଲଗାଯାଇଥିବା ପ୍ରତିବନ୍ଧକକୁ ଇଙ୍ଗିତ କରେ। ସେ ଜୋର ଦେଇଥିଲେ ଯେ, ପାରସ୍ପରିକ ସହଯୋଗ ପାଇଁ ଏହି ପ୍ରତିବନ୍ଧକଗୁଡ଼ିକୁ ଦୂର କରିବା ଆବଶ୍ୟକ।
୨୦୨୪ ଅକ୍ଟୋବରରେ ରୁଷର କାଜାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ହୋଇଥିବା ବୈଠକକୁ ଉଲ୍ଲେଖ କରି ଜୟଶଙ୍କର କହିଛନ୍ତି, ଏହା ପରେ ଭାରତ-ଚୀନ୍ ସମ୍ପର୍କ ଧିରେ ଧିରେ ସଠିକ୍ ଦିଗରେ ଗତି କରିଛି। ବର୍ତ୍ତମାନ ଦାୟିତ୍ୱ ହେଉଛି ଏହି ଗତିକୁ ବଜାୟ ରଖିବା।
ଜୟଶଙ୍କର ଏହା ମଧ୍ୟ କହିଛନ୍ତି ଯେ, ଭାରତ ଏବଂ ଚୀନ୍ ମଧ୍ୟରେ ସ୍ଥିର ଏବଂ ଗଠନମୂଳକ ସମ୍ପର୍କ କେବଳ ଏହି ଦୁଇ ଦେଶ ପାଇଁ ନୁହେଁ ବରଂ ସମଗ୍ର ବିଶ୍ୱ ପାଇଁ ଲାଭଦାୟକ। ଏଥିପାଇଁ ପାରସ୍ପରିକ ସମ୍ମାନ, ଆଗ୍ରହ ଏବଂ ସମ୍ବେଦନଶୀଳତାକୁ ପ୍ରାଥମିକତା ଦିଆଯିବା ଉଚିତ।
ବୈଦେଶିକ ମନ୍ତ୍ରୀ ଆଲୋଚନାରେ ପୁଣି ଥରେ ମନେ ପକାଇ ଦେଇଥିଲେ ଯେ, ପୂର୍ବରୁ ସହମତ ହୋଇଥିଲା ଯେ ମତଭେଦକୁ ବିବାଦ ଏବଂ ପ୍ରତିଯୋଗିତାକୁ ସଂଘର୍ଷରେ ପରିଣତ ହେବାକୁ ଦିଆଯିବା ଉଚିତ୍ ନୁହେଁ। ଏହି ନୀତି ଆଧାରରେ, ଉଭୟ ଦେଶ ସେମାନଙ୍କର ସମ୍ପର୍କକୁ ଆଗକୁ ନେଇପାରିବେ।