ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରି ଅଭିଯୁକ୍ତଙ୍କୁ ଜେଲରେ ରଖିପାରିବ ନାହିଁ ED: ସୁପ୍ରିମ୍ କୋର୍ଟ

ନୂଆଦିଲ୍ଲୀ: ବୁଧବାର ଏକ ମାମଲାର ଶୁଣାଣି ବେଳେ ସୁପ୍ରିମ୍ କୋର୍ଟ ପ୍ରବର୍ତ୍ତନ ନିର୍ଦ୍ଦେଶାଳୟ ଉପରେ ଏକ ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରି ତଦନ୍ତକୁ ଟାଣିବା ପାଇଁ କଡ଼ା ମନ୍ତବ୍ୟ ଦେଇଛନ୍ତି।ଜଷ୍ଟିସ୍ ସଞ୍ଜୀବ ଖାନ୍ନା ଏବଂ ଜଷ୍ଟିସ୍ ଦୀପଙ୍କର ଦତ୍ତଙ୍କୁ ନେଇ ଗଠିତ ଖଣ୍ଡପୀଠ ପ୍ରେମ ପ୍ରକାଶଙ୍କ ଜାମିନ ଆବେଦନର ଶୁଣାଣି କରିଥିଲେ। ପ୍ରେମ ପ୍ରକାଶ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଘନିଷ୍ଠ ସହଯୋଗୀ ବୋଲି ଅଭିଯୋଗ ହୋଇଛି।

ପ୍ରେମ ପ୍ରକାଶ ଅଗଷ୍ଟ ୨୦୨୨ରୁ ହେପାଜତରେ ଅଛନ୍ତି। ସେହି ସମୟରେ ରାଞ୍ଚିସ୍ଥିତ ତାଙ୍କ ବାସଭବନରୁ ଅସ୍ତ୍ରଶସ୍ତ୍ର ଜବତ ହୋଇଥିଲା। ତାଙ୍କ ବିରୋଧରେ ଅସ୍ତ୍ରଶସ୍ତ୍ର ଆଇନ ଏବଂ ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (ପିଏମ୍ଏଲ୍ଏ) ଅନୁଯାୟୀ ମାମଲା ରୁଜୁ ହୋଇଥିଲା। ଏହି ମାମଲାରେ ବର୍ତ୍ତମାନ ସୁଦ୍ଧା ୪ଟି ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରାଯାଇଛି। ଜଷ୍ଟିସ ଖାନ୍ନା କହିଛନ୍ତି, ଆମେ ଆପଣଙ୍କ (ଇଡି) ଦୃଷ୍ଟିଆକର୍ଷଣ କରିବାକୁ ଚାହୁଁଛୁ ଯେ ଆଇନ ଅନୁଯାୟୀ ଆପଣ ତଦନ୍ତ ଶେଷ ହେବା ପୂର୍ବରୁ ଜଣେ ବ୍ୟକ୍ତିଙ୍କୁ ଗିରଫ କରିପାରିବେ ନାହିଁ। ଶୁଣାଣି ଆରମ୍ଭ ହେବା ପୂର୍ବରୁ ଜଣେ ବ୍ୟକ୍ତିଙ୍କୁ ଅଟକ ରଖାଯାଇପାରିବ ନାହିଁ।

ବିଚାରପତି ଖାନ୍ନା କହିଛନ୍ତି ଯେ ଯଦି ପୁଲିସ ନିର୍ଦ୍ଧାରିତ ସମୟ ମଧ୍ୟରେ ଚାର୍ଜସିଟ୍ ଦାଖଲ ନ କରେ, ତେବେ ଅଭିଯୁକ୍ତଙ୍କୁ ଜେଲରୁ ମୁକ୍ତ କରିବା ପାଇଁ ଡିଫଲ୍ଟ ଜାମିନର ବ୍ୟବସ୍ଥା କରାଯାଇଛି। ତେବେ ଏହି ମାମଲାରେ ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରିବା ପରେ ତଦନ୍ତ ଜାରି ରହିଛି। ଜଷ୍ଟିସ ଖାନ୍ନା କହିଛନ୍ତି, ବିନା ଶୁଣାଣିରେ ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରି ଆପଣ ଜଣେ ବ୍ୟକ୍ତିଙ୍କୁ ଜେଲରେ ରଖିପାରିବେ ନାହିଁ। ସେ କହିଛନ୍ତି ଯେ ଯଦି ଶୁଣାଣି ଅତ୍ୟଧିକ କିମ୍ବା ଅସ୍ୱାଭାବିକ ଭାବରେ ବିଳମ୍ବ ହୁଏ, ତେବେ ପିଏମଏଲଏ ଅଧୀନରେ କଠୋର ବ୍ୟବସ୍ଥା ସତ୍ତ୍ୱେ ଅଦାଲତ ଅଭିଯୁକ୍ତଙ୍କୁ ଜାମିନ ଦେଇପାରିବେ। ମାମଲାର ପରବର୍ତ୍ତୀ ଶୁଣାଣି ଏପ୍ରିଲ ୨୯ରେ ହେବ।