ସେପ୍ଟେମ୍ବର ୧ରୁ ବଦଳିଯିବ ଅନେକ ନିୟମ: ଆପଣଙ୍କ ପକେଟ୍ ଉପରେ ପଡ଼ିବ ସିଧା ପ୍ରଭାବ

ନୂଆଦିଲ୍ଲୀ: ଅଗଷ୍ଟ ମାସ ସରି ସରି ଆସୁଛି । ଆଉ ଦିନ କେଇଟା ପରେ ସେପ୍ଟେମ୍ବର ମାସ ଆରମ୍ଭ ହେବ । ସେପ୍େଟମ୍ବରରେ ଆପଣଙ୍କୁ ଅଧିକ ଟୋଲ ଟ୍ୟାକ୍ସ ଦେବାକୁ ପଡିବ । ପଞ୍ଜାବ ନ୍ୟାସନାଲ ବ୍ୟାଙ୍କ ଗ୍ରାହକ ଯେଉଁମାନେ ସେମାନଙ୍କର କେୱାଇସି କରିନାହାଁନ୍ତି,ସେମାନଙ୍କ ଆକାଉଣ୍ଟ ମ୍ୟାନେଜ କରିବା କଷ୍ଟକର ହେବ । ଆସନ୍ତୁ ଜାଣିବା ୧ ସେପ୍ଟେମ୍ବର ୨୦୨୨ ରୁ କେଉଁ ନିୟମ ପରିବର୍ତ୍ତନ ହେବାକୁ ଯାଉଛି ।

– ଗତ କିଛି ଦିନ ହେବ ପଞ୍ଜାବ ନ୍ୟାସନାଲ ବ୍ୟାଙ୍କ ନିଜ ଗ୍ରାହକଙ୍କୁ କେୱାଇସି ଅପଡେଟ୍ କରିବାକୁ କହିଛି । କେୱାଇସି କରିବାର ଶେଷ ତାରିଖ ହେଉଛି ୩୧ ଅଗଷ୍ଟ ୨୦୨୨ । ବ୍ୟାଙ୍କ କହିଛି ଯେ , ଯେଉଁ ଗ୍ରାହକମାନେ ଅଗଷ୍ଟ ୩୧ ସୁଦ୍ଧା କେୱାଇସି ନକରିବେ, ସେପ୍ଟେ୍ଟମ୍ବର ୧ ରୁ ସେମାନେ ନିଜ ଆକାଉଣ୍ଟ ବ୍ୟବହାର କରିବାରେ ଅନେକ ସମସ୍ୟାର ସମ୍ମୁଖୀନ ହୋଇପାରନ୍ତି ।

– ଯମୁନା ଏକ୍ସପ୍ରେସୱେ ଇଣ୍ଡଷ୍ଟ୍ରିଆଲ୍ ଡେଭଲପମେଣ୍ଟ ଅଥରିଟି ନିକଟରେ ଟୋଲ ଟ୍ୟାକ୍ସ ବୃଦ୍ଧି କରିବାକୁ ନିଷ୍ପତ୍ତି ନେଇଥିଲା । ସେପ୍ଟେମ୍ବର ୧ ରୁ ବର୍ଦ୍ଧିତ ଟୋଲ ଟ୍ୟାକ୍ସ ଲାଗୁ ହେବ । ବର୍ତ୍ତମାନ କାର ପରି ଛୋଟ ଯାନର ମାଲିକମାନଙ୍କୁ ଯମୁନା ଏକ୍ସପ୍ରେସୱେ ଦେଇ ଯାତ୍ରା କରିବା ପାଇଁ କିଲୋମିଟର ପିଛା ୧୦ ପଇସା ଅଧିକ ଦେବାକୁ ପଡିବ । ଅନ୍ୟପକ୍ଷରେ, ବଡ ବ୍ୟବସାୟିକ ଯାନଗୁଡିକୁ କିଲୋମିଟର ପ୍ରତି ୫୨ ପଇସା ଅଧିକ ଟୋଲ ଦେବାକୁ ପଡିବ ।

– ସେପ୍ଟେମ୍ବର ୧ ରୁ, ଆପଣଙ୍କର ବୀମା ପଲିସିର ପ୍ରିମିୟମ ହ୍ରାସ ହେବ । ଏହାର କାରଣ ହେଉଛି ବୀମା ନିୟାମକ ଆଇଆରଡିଏଆଇ ଦ୍ୱାରା ସାଧାରଣ ବୀମା ନିୟମରେ ପରିବର୍ତ୍ତନ କରାଯିବ । ବର୍ତ୍ତମାନ ଏଜେଣ୍ଟ ୩୦ ରୁ ୩୫ ପ୍ରତିଶତ ବଦଳରେ ବୀମା କମିଶନ ଉପରେ ମାତ୍ର ୨୦ ପ୍ରତିଶତ କମିଶନ ପାଇବେ । ଏହାଦ୍ୱାରା ଲୋକଙ୍କ ପ୍ରିମିୟମ ହ୍ରାସ ପାଇବ ।

– ସେପ୍ଟେମ୍ବର ୧ରୁ ଉତ୍ତରପ୍ରଦେଶର ଗାଜିଆବାଦରେ ଘର ଏବଂ ପ୍ଲଟ ସମେତ ସମସ୍ତ ସମ୍ପତ୍ତି କିଣିବା ମହଙ୍ଗା ହେବ । ଗାଜିଆବାଦର ସର୍କିଟ ହାର ବୃଦ୍ଧି କରିବାକୁ ସରକାର ନିଷ୍ପତ୍ତି ନେଇଛନ୍ତି । ସର୍କଲ୍ ହାର ୨ ରୁ ୪ ପ୍ରତିଶତକୁ ବୃଦ୍ଧି କରାଯାଇଛି । ବର୍ଦ୍ଧିତ ସର୍କଲ୍ ହାର ୧ ସେପ୍େଟମ୍ବର ୨୦୨୨ ଠାରୁ ଲାଗୁ ହେବ ।