୯୨ ବର୍ଷ ବୟସରେ ପୂର୍ବତନ ସାଂସଦ ଅନାଦି ଚରଣ ଦାସଙ୍କ ପରଲୋକ
ଭୁବନେଶ୍ୱର: ୯୨ ବର୍ଷ ବୟସରେ ପୂର୍ବତନ ସାଂସଦ ଅନାଦି ଚରଣ ଦାସଙ୍କ ପରଲୋକ ହୋଇଛି । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସେ ନିଶ୍ୱାସ ତ୍ୟାଗ କରିଛନ୍ତି । ଅନାଦି ଚରଣ ଦାସ ଯାଜପୁର ଲୋକସଭା ଆସନରୁ ୫ ଥର ନିର୍ବାଚିତ ହୋଇ ସଂସଦର ସଦସ୍ୟ ହୋଇଥିଲେ । ପୂର୍ବତନ ସାଂସଦ ଅନାଦି ଚରଣ ଦାସ ଦୀର୍ଘ ଦିନ ହେଲା ମଧୁମେହ ରୋଗରେ ପୀଡିତ ଥିଲେ ।
ଗତ ବର୍ଷ ଅଗଷ୍ଟରେ ତାଙ୍କ ଛାତିରେ ଯନ୍ତ୍ରଣା ହେବାରୁ ପରିବାର ଲୋକ ତାଙ୍କୁ ଡାକ୍ତରଖାନା ନେଇଥିଲେ । ଡାକ୍ତର ତାଙ୍କ ଛାତିରେ ଅସ୍ତ୍ରୋପଚାର କରି ପ୍ରେସମେକର ଲଗାଇଥିଲେ ।
ଯାଜପୁର ଲୋକସଭା ଆସନରୁ ୫ଥର ସାଂସଦ ଭାବେ ନିର୍ବାଚିତ ହୋଇଥିଲେ ଅନାଦି ଚରଣ ଦାସ। କଂଗ୍ରେସ ଟିକେଟରୁ ୧୯୭୧, ୧୯୮୦ ଓ ୧୯୮୪ ମସିହାରେ ଯାଜପୁର ନିର୍ବାଚନ ମଣ୍ଡଳୀରୁ ଲୋକସଭାକୁ ନିର୍ବାଚିତ ହୋଇଥିଲେ । ଏହାପରେ ୧୯୮୯ ଓ ୧୯୯୧ ମସିହାରେ ଜନତା ଦଳର ପ୍ରତିନିଧି ଭାବରେ ଲୋକସଭାକୁ ନିର୍ବାଚିତ ହୋଇଥିଲେ ।
ପୂର୍ବତନ ସାଂସଦ ଅନାଦି ଚରଣ ଦାସ ଅବିଭକ୍ତ କଟକ ଜିଲ୍ଲା ବିଜିପୁରରେ ୧୯୩୫ ମସିହା ଜାନୁଆରି ୪ ତାରିଖରେ ଜନ୍ମଗ୍ରହଣ କରିଥିଲେ। ସେ ନେତ୍ରମଣୀ ଦାସଙ୍କୁ ବିବାହ କରିଥିଲେ। ତାଙ୍କର ୪ ପୁଅ ଓ ଏକ ଝିଅ। ରାଜନୀତି ବ୍ୟତୀତ ସମାଜ ସେବାକୁ ସେ ଭଲ ପାଉଥିଲେ। ସେ ଦୀର୍ଘ ଦିନରୁ ମଧୁମେହ ରୋଗରେ ପୀଡିତ ଥିଲେ। ଗତବର୍ଷ ଅଗଷ୍ଟ ମାସରେ ତାଙ୍କ ଛାତିରେ ଅସହ୍ୟ ଯନ୍ତ୍ରଣା ହୋଇଥିଲା। ତାଙ୍କର ଛାତିରେ ଅସ୍ତ୍ରୋପଚାର କରି ପେସମେକର ଲଗାଯାଇଥିଲା।
