ଓଡିଶାରେ ଅଛି ସୁନା ଓ ଗ୍ରାଫାଇଟ୍ ଖଣି: ଭୂ-ତାତ୍ତ୍ୱିକ ନିର୍ଦ୍ଦେଶାଳୟଙ୍କ ରିପୋର୍ଟ

ଭୁବନେଶ୍ୱର: ଓଡିଶାର ଅନୁଗୁଳ ମାଟିରେ ସୁନା ଖଣି ଓ ଢେଙ୍କାନାଳ ମାଟିରେ ଗ୍ରାଫାଇଟ୍ ଖଣି ଅଛି । ଯାହାର ତଥ୍ୟ ରାଜ୍ୟ ଭୂ-ତାତ୍ତ୍ୱିକ ନିର୍ଦ୍ଦେଶାଳୟ ଓ ଭାରତୀୟ ଭୂ-ତାତ୍ତ୍ୱିକ ଅନୁସନ୍ଧାନ ସଂସ୍ଥା ରିସର୍ଚ୍ଚ ସମୟରେ ଜାଣିବାକୁ ପାଇଛି । ତେବେ ଗତ ବିଧାନସଭାରେ ରାଜ୍ୟରେ ଥିବା ଖଣିକୁ ନେଇ ପ୍ରଶ୍ନ ହୋଇଥିଲା । ୨୦୨୦ – ୨୧ ଆର୍ଥିକ ବର୍ଷରେ ରାଜ୍ୟରେ ଭୂ-ତାତ୍ତ୍ୱିକ ନିର୍ଦ୍ଦେଶାଳୟ କେତୋଟି ଖଣିର ସନ୍ଧାନ ପାଇଛି ବୋଲି ପଚରା ଯାଇଥିବା ବେଳେ ଇସ୍ପାତ ଓ ଖଣି ବିଭାଗ ଏହର ଉତ୍ତର ରଖିଥିଲେ । ସେ କହିଥିଲେ ଯେ ଗତ ଆର୍ଥକ ବର୍ଷରେ ରାଜ୍ୟରେ ମୋଟ ୬ଟି ଖଣିର ସନ୍ଧାନ ମିଳିଛି । ଯେଉଁଥିରେ ଅନ୍ୟ ଖଣିଜ ପଦାର୍ଥ ସହିତ ଗ୍ରାଫାଇଟ୍ ଓ ସୁନା ଖଣି ମଧ୍ୟ ରହିଛି ।

ଢେଙ୍କାନାଳରେ ଗ୍ରାଫାଇଟ୍ ଥିବା ବେଳେ ମାଲକାନଗିରି ଓ ଗଜପତି ଜିଲ୍ଲାରେ ଡେକୋରେଟିଭ୍ ଷ୍ଟୋନ, ମୟୂରଭଞ୍ଜ ଜିଲ୍ଲାରେ କ୍ୱାର୍ଜାଇଟ୍ ଓ ଗଞ୍ଜାମ ଜିଲ୍ଲାରେ ସ୍ଥାପତ୍ୟ ଉପେଯାଗୀ ଶିଳା ରହିଛି । ସେହି ପରି ରାଜ୍ୟରେ ସୁନା ଖଣିର ଅବସ୍ଥିତିକୁ ନେଇ ମଧ୍ୟ ବିଧାନ ସଭାରେ ପ୍ରଶ୍ନ କରାଯାଇଥିଲା । ଯାହାର ଉତ୍ତରେ ଇସ୍ପାତ ଓ ଖଣି ବିଭାଗ କହିଛି ରାଜ୍ୟର ଅନୁଗୁଳ ଜିଲ୍ଲା ସମେତ ମୋଟ ୫ ଟି ଜିଲ୍ଲାର ମାଟି ତଳେ ସୁନା ପଥର ଠାବ କରାଯାଇଛି । ରାଜ୍ୟ ଭୂ-ତାତ୍ତ୍ୱିକ ନିର୍ଦ୍ଦେଶାଳୟ ଓ ଭାରତୀୟ ଭୂ-ତାତ୍ତ୍ୱିକ ଅନୁସନ୍ଧାନ ସଂସ୍ଥା ରିସର୍ଚ୍ଚ ସମୟରେ ଏହି ତଥ୍ୟ ଦେଇଛି । ତେବେ ମାଟିତଳେ ଥିବା ଏହି ସୁନା ପଥରର ପରିମାଣ ବହୁତ କମ୍ ଥିବା ବେଳେ ଏହା ବିକ୍ଷିପ୍ତ ଅବସ୍ଥାରେ ପଡି ରହିଥିବାରୁ ଏହାର ପରିମାଣ କେତେ ତାହା ଆକଳନ କରାଯାଇ ପାରିନାହିଁ।