ଭାରତର ଏହି ପ୍ରାଚୀନ ମନ୍ଦିରରେ ଭକ୍ତଙ୍କର ସମସ୍ତ ମନସ୍କାମନା ହୋଇଥାଏ ପୂରଣ: ଜାଣନ୍ତୁ କ’ଣ ରହିଛି ଇତିହାସ
ନୂଆଦିଲ୍ଲୀ: ଭାରତ ନିଜର ସନାତନ ଧର୍ମ ସହିତ ଏହାର ମନ୍ଦିର ଏବଂ ଏଠାକାର କଳାକୃତି ଓ ଅଲୌକିକତା ପାଇଁ ପୃଥିବୀରେ ପ୍ରସିଦ୍ଧି ଲାଭ କରିଛି । ତେବେ ଭାରତରେ ଅନେକ ପ୍ରାଚୀନ ମନ୍ଦିର ରହିଛି ଯାହାର ବେଶ ରୋଚକ ଇତିହାସ ରହିଛି । ତେବେ ଆଜି ଆମେ ଆପଣଙ୍କୁ ଏପରି ଏକ ମନ୍ଦିର ବିଷୟରେ କହିବୁ ଯେଉଁଠାରେ ଦର୍ଶନ କରି ଆପଣଙ୍କର ସମସ୍ତ ଇଚ୍ଛା ନିଶ୍ଚିତ ପୂରଣ ହେବ । ଆ୍ଜଞା ହଁ, ଏପରି ଏକ ମନ୍ଦିର ରହିଛି ହରିୟାଣାର ଗୁରୁଗ୍ରାମ ସହରରେ । ଏଠାକାର ଭୁତେଶ୍ୱର ମନ୍ଦିର ସବୁଠାରୁ ପ୍ରାଚୀନ ମନ୍ଦିର ମଧ୍ୟରେ ଗଣାଯାଇଥାଏ ।
ଏହି ମନ୍ଦିରର ପୁରୋହିତ ପ୍ରେମଚାନ୍ଦ କହିଛନ୍ତି ଯେ ଗୁରୁଗ୍ରାମ ସହରର ମଧ୍ୟଭାଗରେ ଥିବା ଏହି ମନ୍ଦିର ୩୦୦ ରୁ ୪୦୦ ବର୍ଷ ପୁରୁଣା । ଗୁରୁଗ୍ରାମରେ ଚାରୋଟି ପ୍ରାଚୀନ ମନ୍ଦିର ରହିଛି । ତେବେ ଭୁତେଶ୍ୱର ମନ୍ଦିର ସମସ୍ତଙ୍କ ମଧ୍ୟରେ ଭିନ୍ନ । ପ୍ରେମଚାନ୍ଦ କହିଛନ୍ତି ଯେ ଭକ୍ତମାନେ ଏହି ମନ୍ଦିରକୁ ଯାହା ଇଚ୍ଛା ବା ମନସ୍କାମନା ନେଇ ଆସନ୍ତି ବାବା ଭୋଲେନାଥ ତାଙ୍କର ସମସ୍ତ ଇଚ୍ଛା ପୂରଣ କରନ୍ତି।
ଏହି ମନ୍ଦିରଟି ଅନେକ ବର୍ଷ ପୁରୁଣା ହେବା ସହିତ ଏହାର ଇତିହାସ ମଧ୍ୟ ବେଶ ପୁରୁଣା । କୁହାଯାଏ ଯେ ଯେତେବେଳେ ଏହି ସହରର ନିର୍ମାଣ ହୋଇନଥିଲା ସେବେଠାରୁ ଲୋକମାନେ ଏଠାରେ ଥିବା ଶିବ ମନ୍ଦିରରେ ପୂଜା କରିବାକୁ ଆସୁଥିଲେ। ତେବେ ସହରର ବିକାଶ ହେବା ସହିତ ଧୀରେ ଧୀରେ ଅନ୍ୟ ମନ୍ଦିରଗୁଡ଼ିକ ମଧ୍ୟ ନିର୍ମାଣ କରାଯାଇଥିଲା । ତେବେ ଆଖପାଖ ଅଞ୍ଚଳର ଲୋକମାନେ ମଧ୍ୟ ଏଠାରେ ପୂଜାପାଠ କରିବାକୁ ଆସୁଥିଲେ। ଏହି ସ୍ଥାନଗୁଡିକର ବାସିନ୍ଦାମାନଙ୍କ ପାଇଁ ମନ୍ଦିର ହେଉଛି ବିଶ୍ୱାସର କେନ୍ଦ୍ର । ଏହା ବ୍ୟତୀତ ପ୍ରେମଚାନ୍ଦ କହିଛନ୍ତି ଯେ ବର୍ତ୍ତମାନ ଅନ୍ୟ ସହରର ଲୋକମାନଙ୍କ ସହିତ ବହୁ ଦୂରରୁ ଲୋକମାନେ ମଧ୍ୟ ନିଜ ଇଚ୍ଛା ପୂରଣ କରିବା ପାଇଁ ଏଠାକୁ ଆସନ୍ତି।
ଭୁତେଶ୍ୱର ମନ୍ଦିରରେ ୧୪ ଟି ପ୍ରାଙ୍ଗଣ ରହିଛି, ଯେଉଁଠାରେ ଭଗବାନ ଶିବ, ଶ୍ୟାମ ବାବା, ଭଗବାନ ଶ୍ରୀ ରାମଙ୍କ ସହିତ ଅନ୍ୟ ଦେବ ଦେବୀଙ୍କ ଦରବାର ବସିଥାଏ। ତେବେ ନବରାତ୍ରିରେ ଏହି ମନ୍ଦିରରେ ନବକୁଣ୍ଡ ଯଜ୍ଞ କରାଯାଇଥାଏ । ଏହା ବ୍ୟତୀତ ଶ୍ରାବଣ ମାସରେ କାଉଡ଼ିଆମାନଙ୍କୁ ଏହି ମନ୍ଦିରରେ ଏକ ସ୍ୱାଗତ କରାଯାଇଥାଏ । ମହାଶିବରାତ୍ରୀରେ ମନ୍ଦିରରେ ପୂଜାର୍ଚ୍ଚନା କରାଯାଇଥାଏ । ତେବେ ମନ୍ଦିରକୁ ମିଳୁଥିବା ଦାନ ଦ୍ୱାରା ଏଠାରେ ଏକ ଡିସପେନସାରୀ ମଧ୍ୟ ଚାଲିଥାଏ । ଏହି ଡିସପେନସାରୀ ଦୀର୍ଘ ଦିନ ଧରି ସେବା ଯୋଗାଇ ଦିଆଯାଉଛି । ସ୍ଥାନୀୟ ଲୋକ ଏବଂ ଗାଁର ଲୋକମାନେ ମଧ୍ୟ ଚିକିତ୍ସା ପାଇଁ ଏଠାକୁ ଆସନ୍ତି ।
