ICC ଚାମ୍ପିଅନ୍ସ ଟ୍ରଫିରେ ଭାରତ ଏପର୍ଯ୍ୟନ୍ତ ଏହି ୫ ଦଳଠାରୁ କେବେ ହାରିନାହିଁ, ଜାଣନ୍ତୁ ପାକିସ୍ତାନ ବିପକ୍ଷରେ ରେକର୍ଡ…
ନୂଆଦିଲ୍ଲୀ,୧୮ା୨: ICC ଚାମ୍ପିଅନ୍ସ ଟ୍ରଫି ୨୦୨୫ ଆଉ ମାତ୍ର କିଛି ଘଣ୍ଟା ପରେ ଆରମ୍ଭ ହେବାକୁ ଯାଉଛି। ୮ ବର୍ଷ ପରେ ଫେରୁଥିବା ଏହି ଟୁର୍ଣ୍ଣାମେଣ୍ଟକୁ ପାକିସ୍ତାନ ଆୟୋଜନ କରୁଛି। ଚାମ୍ପିଅନ୍ସ ଟ୍ରଫି ଫେବୃଆରୀ ୧୯ରୁ ଆରମ୍ଭ ହେବ ଏବଂ ଏହାର ଫାଇନାଲ୍ ମାର୍ଚ୍ଚ ୯ରେ ଖେଳାଯିବ। ଭାରତ ଏପର୍ଯ୍ୟନ୍ତ ଦୁଇଥର ଏହି ଟାଇଟଲ ଜିତିଛି। ସୌରଭ ଗାଙ୍ଗୁଲିଙ୍କ ଅଧିନାୟକତ୍ୱରେ ପ୍ରଥମ ଥର ପାଇଁ ଏବଂ ମହେନ୍ଦ୍ର ସିଂ ଧୋନୀଙ୍କ ଅଧିନାୟକତ୍ୱରେ ଦ୍ୱିତୀୟ ଥର ପାଇଁ ଟିମ୍ ଇଣ୍ଡିଆ ଚାମ୍ପିଅନ୍ ହୋଇଥିଲା।
ରୋହିତ ଶର୍ମାଙ୍କ ଅଧିନାୟକତ୍ୱରେ ଏହି ଦଳକୁ ପୁଣି ଥରେ ବିଜୟର ଦାବିଦାର ବିବେଚନା କରାଯାଉଛି। ଏହା ଚାମ୍ପିଅନ୍ସ ଟ୍ରଫିର ୯ମ ସିଜିନ୍ ହେବାକୁ ଯାଉଛି। ଏପର୍ଯ୍ୟନ୍ତ କେବଳ ଭାରତ ଏବଂ ଅଷ୍ଟ୍ରେଲିଆ ଏହାକୁ ୨-୨ ଥର ଜିତିଛି। ଶ୍ରୀଲଙ୍କା ୨୦୨୨ରେ ଏହି ଟୁର୍ଣ୍ଣାମେଣ୍ଟ ଆୟୋଜନ କରିଥିଲା, ଯେଉଁଠାରେ ବର୍ଷା ଯୋଗୁ ଫାଇନାଲ୍ ମ୍ୟାଚ୍ ଅନୁଷ୍ଠିତ ହୋଇପାରିନଥିଲା। ଭାରତ ଏବଂ ଶ୍ରୀଲଙ୍କା ଉଭୟଙ୍କୁ ମିଳିତ ବିଜେତା ଘୋଷିତ କରାଯାଇଥିଲା। ୨୦୧୩ ସିଜିନରେ ଧୋନୀଙ୍କ ଅଧିନାୟକତ୍ୱରେ, ଭାରତ ଫାଇନାଲରେ ଇଂଲଣ୍ଡକୁ ପରାସ୍ତ କରି ଏକ ରୋମାଞ୍ଚକର ବିଜୟ ହାସଲ କରି ଟ୍ରଫି ଜିତିଥିଲା।
ଚାମ୍ପିଅନ୍ସ ଟ୍ରଫିରେ ୫ଟି ଦଳ ବିପକ୍ଷରେ ଭାରତର ରେକର୍ଡ ଏପର୍ଯ୍ୟନ୍ତ ଅତୁଳନୀୟ। ଟିମ୍ ଇଣ୍ଡିଆ ଏପର୍ଯ୍ୟନ୍ତ ମୋଟ ୨୯ଟି ମ୍ୟାଚ୍ ଖେଳିଛି, ଯେଉଁଥିରେ ଏହା ୧୮ଟିରେ ଜିତିଛି, ୮ଟିରେ ହାରିଛି ଏବଂ ୩ଟି ଅନିର୍ଣ୍ଣୟ ରହିଛି। ଭାରତୀୟ ଦଳ ଚାମ୍ପିଅନ୍ସ ଟ୍ରଫିରେ ସର୍ବାଧିକ ମ୍ୟାଚ୍ ଜିତିଛି। ଇଂଲଣ୍ଡ ୨୫ଟି ମ୍ୟାଚ୍ ଖେଳି ୧୪ଟିରେ ବିଜୟୀ ହୋଇଛି। ଟୁର୍ଣ୍ଣାମେଣ୍ଟର ଇତିହାସରେ, ଏପରି ୫ଟି ଦଳ ଅଛି ଯେଉଁମାନେ କେବେ ବି ଭାରତ ବିପକ୍ଷରେ ଜିତି ନାହାନ୍ତି। ଦକ୍ଷିଣ ଆଫ୍ରିକା, ଇଂଲଣ୍ଡ, ବାଂଲାଦେଶ, ଜିମ୍ବାୱେ ଏବଂ କେନିଆଠାରୁ ଭାରତ କେବେ ହାରିନାହିଁ।
ଭାରତ ଏବଂ ପାକିସ୍ତାନ ମଧ୍ୟରେ ରହିଛି ଏପରି ରେକର୍ଡ
ଯଦି ଆମେ ଚାମ୍ପିଅନ୍ସ ଟ୍ରଫିରେ ପାକିସ୍ତାନ ବିପକ୍ଷରେ ଭାରତର ରେକର୍ଡ ଦେଖିବା, ତେବେ ଏ କଥା ଆଶ୍ଚର୍ଯ୍ୟଜନକ। ଏହି ଟୁର୍ଣ୍ଣାମେଣ୍ଟରେ ଏପର୍ଯ୍ୟନ୍ତ ଦୁଇ ଦଳ ମଧ୍ୟରେ ମୋଟ ୫ଟି ମ୍ୟାଚ୍ ଖେଳାଯାଇଛି। ଏଥିରେ ଭାରତ କେବଳ ୨ଟି ମ୍ୟାଚ୍ ଜିତିଛି। ପାକିସ୍ତାନ ୩ଟି ବିଜୟ ହାସଲ କରିଛି। ଏଥିରେ ଗତ ଥର ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍ ମଧ୍ୟ ରହିଛି । ଭାରତକୁ ପରାସ୍ତ କରିବା ପରେ ହିଁ ପାକିସ୍ତାନ ଚାମ୍ପିଅନ୍ସ ଟ୍ରଫିର ଚାମ୍ପିଅନ୍ ହୋଇଥିଲା।