ଆଇପିଏଲ ୨୦୨୬: ଗ୍ରୁପ ବିଭାଜନ ଓ ସୂଚୀରେ ବଡ଼ ପରିବର୍ତ୍ତନ, ଅଧିକ ମ୍ୟାଚ ଖେଳିବେ ଦଳ

ମୁମ୍ବାଇ: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ୨୦୨୬ ସଂସ୍କରଣ ପାଇଁ ବଡ଼ ଖବର ସାମ୍ନାକୁ ଆସିଛି। ଗ୍ରୁପ ବିଭାଜନ ଓ ଟୁର୍ଣ୍ଣାମେଣ୍ଟର ସୂଚୀରେ ପରିବର୍ତ୍ତନ ଆସିବାକୁ ଯାଉଛି। ଆଇପିଏଲ ପରିଚାଳନା ପରିଷଦ ପୁରୁଣା ଢାଞ୍ଚାକୁ ଫେରିବାକୁ ଚିନ୍ତାକରୁଛି, ଯେଉଁଥିରେ ୧୦ଟି ଦଳ ଏକ ଗ୍ରୁପରେ ରହି ପରସ୍ପର ବିପକ୍ଷରେ ଦୁଇଥର ମୁହାଁମୁହିଁ ହେବେ। ୨୦୨୫ ସଂସ୍କରଣରେ ୫ଟି ଦଳ ବିଶିଷ୍ଟ ଦୁଇଟି ଗ୍ରୁପରେ ବିଭାଜିତ ହୋଇ ୭୦ଟି ଲିଗ୍ ମ୍ୟାଚ ଖେଳାଯାଇଥିଲା।

କିନ୍ତୁ ଆଇପିଏଲ ୨୦୨୬ରେ ଗ୍ରୁପ ବିଭାଜନ ଉଠାଇ ସମସ୍ତ ୧୦ଟି ଦଳକୁ ଏକ ଗ୍ରୁପରେ ରଖିବା ପାଇଁ ଆଲୋଚନା ଚାଲିଛି। ଏହା ହେଲେ ପ୍ରତ୍ୟେକ ଦଳ ୧୮ଟି ଲିଗ୍ ମ୍ୟାଚ ଖେଳିବ, ଯାହା ଟୁର୍ଣ୍ଣାମେଣ୍ଟର ଅବଧିକୁ ଆହୁରି ତିନି ସପ୍ତାହ ବଢ଼ାଇବ। ଏହା ଦୁନିଆର ଆଇପିଏଲ ପ୍ରେମୀଙ୍କ ପାଇଁ ଉତ୍ସାହ ବଢ଼ାଇବ, କାରଣ ସେମାନେ ନିଜର ପସନ୍ଦର ଖେଳାଳି ଓ ତାରକାଙ୍କୁ ଅଧିକ ସମୟ ପର୍ଦାରେ ଦେଖିପାରିବେ। କିନ୍ତୁ, ଏହି ବର୍ଦ୍ଧିତ ସୂଚୀ ଭାରତୀୟ କ୍ରିକେଟ ଦଳର ଇଂଲଣ୍ଡ ଗସ୍ତ ପାଇଁ ଚାପ ସୃଷ୍ଟି କରିପାରେ। ଜାତୀୟ ଦଳର ଖେଳାଳିମାନଙ୍କୁ ଟେଷ୍ଟ ସିରିଜ ପାଇଁ ପ୍ରସ୍ତୁତି ନେବାକୁ ସମୟ କମ ମିଳିପାରେ।

ଆଇପିଏଲର ବ୍ରାଣ୍ଡ ମୂଲ୍ୟ ବୃଦ୍ଧି, ଆରସିବି ଶୀର୍ଷରେ

ହୁଲିହାନ ଲୋକୀ ପକ୍ଷରୁ କରାଯାଇଥିବା ଏକ ଅଧ୍ୟୟନ ଅନୁଯାୟୀ, ଆଇପିଏଲର ବ୍ୟବସାୟିକ ମୂଲ୍ୟ ୧୮.୫ ବିଲିୟନ ଡଲାରକୁ ବୃଦ୍ଧି ପାଇଛି, ଯାହା ଗତ ବର୍ଷଠାରୁ ୧୨.୯% ଅଧିକ। ବର୍ତ୍ତମାନର ଚାମ୍ପିୟନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ୨୬୯ ମିଲିୟନ ଡଲାର ବ୍ରାଣ୍ଡ ମୂଲ୍ୟ ସହ ଶୀର୍ଷ ସ୍ଥାନରେ ରହିଛି, ଯାହା ଗତ ବର୍ଷ ୨୨୭ ମିଲିୟନ ଡଲାର ଥିଲା। ମୁମ୍ବାଇ ଇଣ୍ଡିଆନ୍ସ (ଏମଆଇ) ୨୪୨ ମିଲିୟନ ଡଲାର ସହ ଦ୍ୱିତୀୟ ସ୍ଥାନରେ ଥିବା ବେଳେ ପାଞ୍ଚଥର ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସକେ) ୨୩୫ ମିଲିୟନ ଡଲାର ସହ ତୃତୀୟ ସ୍ଥାନକୁ ଖସିଛି। ସିଏସକେର ଏହି ଅବନତିର କାରଣ ଗତ ସିଜନରେ ପଏଣ୍ଟ ତାଲିକାରେ ତଳେ ରହିବା ହୋଇପାରେ। ଆରସିବି ଗତ ସିଜନରେ ପାୱାରପ୍ଲେ ଓ ଡେଥ ଓଭରରେ ଚମତ୍କାର ବୋଲିଂ ପ୍ରଦର୍ଶନ କରି ପ୍ରଥମ ଥର ପାଇଁ ଆଇପିଏଲ ଟାଇଟଲ ଜିତିଥିଲା। ଏହି ସଫଳତା ସେମାନଙ୍କ ବ୍ରାଣ୍ଡ ମୂଲ୍ୟ ବୃଦ୍ଧିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି।