ଅଜା ହେଲେ ଶିଳ୍ପପତି ମୁକେଶ ଅମ୍ବାନୀ, ଯାଆଁଳା ସନ୍ତାନ ଜନ୍ମ ଦେଲେ ଝିଅ ଇଶା
ମୁମ୍ବାଇ: ଶିଳ୍ପପତି ମୁକେଶ ଅମ୍ବାନୀ ଅଜା ହୋଇଛନ୍ତି। ତେବେ ଏହି ଖୁସି ତାଙ୍କ ପାଇଁ ଦ୍ଵିଗୁଣିତ ହୋଇ ଆସିଛି, କାରଣ ତାଙ୍କ ଝିଅ ଇଶା ଯାଆଁଳା ସନ୍ତାନ ଜନ୍ମ ଦେଇଛନ୍ତି। ଅମ୍ବାନୀ ପରିବାର ଏବଂ ପିରାମଲ ପରିବାର ଦ୍ୱାରା ଜାରି କରାଯାଇଥିବା ସୂଚନାରେ କୁହାଯାଇଛି ଯେ, ଇଶା ଅମ୍ବାନୀ ୧୯ ନଭେମ୍ବର ୨୦୨୨ ରେ ଯାଆଁଳା ଶିଶୁ ଜନ୍ମ ଦେଇଛନ୍ତି, ଯେଉଁଥିରେ ଏକ ପୁଅ ଏବଂ ଗୋଟିଏ ଝିଅ ଅଛନ୍ତି। ଏହି ଖୁସିକୁ ଲୋକଙ୍କ ସହ ବାଣ୍ଟିବା ପାଇଁ ଅମ୍ବାନୀ ପରିବାର ମଧ୍ୟ ଏକ ପ୍ରେସ ବିଜ୍ଞପ୍ତି ଜାରି କରିଛନ୍ତି।
ଯେଉଁଥିରେ ଏହା କୁହାଯାଇଛି ଯେ ଆମେ ସୂଚନା ଦେଇ ଖୁସି ଯେ, ଆମ ପିଲାମାନେ ଇଶା ଏବଂ ଆନନ୍ଦଙ୍କୁ ୧୯ ନଭେମ୍ବର ୨୦୨୨ ରେ ଭଗବାନଙ୍କ ଦ୍ୱାରା ଆଶୀର୍ବାଦ ପ୍ରାପ୍ତ ହୋଇଛି। ଇଶା ଏବଂ ପିଲାମାନେ, ଶିଶୁ କନ୍ୟା ଆଦିୟା ଏବଂ ଶିଶୁପୁତ୍ର କୃଷ୍ଣ ସୁସ୍ଥ ଅଛନ୍ତି। ସେମାନଙ୍କ ଜୀବନର ଏହି ଗୁରୁତ୍ୱପୂର୍ଣ୍ଣ ସମୟରେ ଆମେ ଆଦିୟା, କୃଷ୍ଣ, ଇଶା ଏବଂ ଆନନ୍ଦଙ୍କ ପାଇଁ ଆପଣଙ୍କ ଆଶୀର୍ବାଦ ଏବଂ ଶୁଭେଚ୍ଛା ଆଶା କରୁଛୁ।
ରିଲାଏନ୍ସ ଅଧ୍ୟକ୍ଷ ମୁକେଶ ଅମ୍ବାନୀ ଏବଂ ନୀତା ଅମ୍ବାନୀଙ୍କ ଝିଅ ଇଶା ଅମ୍ବାନୀ ଏବଂ ଶିଳ୍ପପତି ଅଜୟ ପିରାମଲ ଏବଂ ସ୍ଵାତି ପିରାମଲଙ୍କ ପୁଅ ଆନନ୍ଦ ପିରାମଲ ୨୦୧୮ରେ ମୁମ୍ବାଇରେ ଅନୁଷ୍ଠିତ ଏକ ଗ୍ରାଣ୍ଡ ସମାରୋହରେ ବିବାହ କରିଥିଲେ।
