ପତିଙ୍କ ପ୍ରେମିକା ଉପରେ କ’ଣ ଚାଲିପାରିବ ଆଇପିସିର ଏହି ଧାରାରେ ମୋକଦ୍ଦମା, ହାଇକୋର୍ଟଙ୍କ କ’ଣ ରାୟ ରହିଛି ଆସନ୍ତୁ ଜାଣିନେବା

କୋଚି: କେରଳ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି । କୋର୍ଟ କହିଛନ୍ତି ପତିଙ୍କ ପ୍ରେମିକା କିମ୍ବା ବିବାହ ବାହାରେ ଯୌନ ସମ୍ବନ୍ଧ ରଖୁଥିବା ମହିଳାଙ୍କ ଉପରେ ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା ୪୯୮ ଏ ଆଧାରରେ ମୋକଦ୍ଦମା କରାଯାଇ ପାରିବ ନାହିଁ । କୋର୍ଟ କହିଛନ୍ତି ଆଇନରେ ଏହା ସ୍ପଷ୍ଟ ଭାବରେ ଉଲ୍ଲେଖ ରହିଛି ଯେ, ସଂପର୍କୀୟ ଶବ୍ଦରେ ସେହି ମହିଳା ସାମିଲ ହେବେ ନାହିଁ ଯାହା ସହିତ ପୁରୁଷ ବିବାହ ବାହାରେ ଯୌନ ସମ୍ବନ୍ଧ ରକ୍ଷା କରିଛି ।

କୋର୍ଟ କହିଛନ୍ତି ଜଣେ ପ୍ରେମିକା କିମ୍ବା ଜଣେ ମହିଳା ବିବାହ ବାହାରେ କୌଣସି ପୁରୁଷଙ୍କ ସହିତ ଯୌନ ସମ୍ବନ୍ଧ ରଖୁଥିଲେ ସେ ତାଙ୍କର ସଂପର୍କୀୟ ହୋଇପାରିବେ ନାହିଁ । ସଂପର୍କୀୟ ଶବ୍ଦର ଅର୍ଥ ଅଲଗା ବୋଲି କୋର୍ଟ କହିଛନ୍ତି । ଯାହା ସହ ରକ୍ତର ସଂପର୍କ ରହିଛି କିମ୍ବା କାହାକୁ ପୋଷ୍ୟ ସନ୍ତାନ ଭାବରେ ଗ୍ରହଣ କରାଯାଇଥିଲେ ସେ ସଂପର୍କୀୟ ହୋଇପାରିବେ । ଜଣେ ମହିଳାଙ୍କ ଯାଚିକା ଉପରେ ଶୁଣାଣୀ କରି କୋର୍ଟ ଏହି ଆଦେଶ ଦେଇଛନ୍ତି । ଏହି ମାମଲାରେ ଆଇପିସି ଧାରା ୪୯୮ଏ ଆଧାରରେ ଅଭିଯୋଗ ଲଗାଯାଇଥିଲା । ଯାଚିକାକର୍ତ୍ତା ଯୁକ୍ତି କରିଥିଲେ ଯେ, ତାଙ୍କ ସାଥିଙ୍କ ସହ ତାଙ୍କ ସଂପର୍କକୁ ନେଇ ତାଙ୍କ ଉପରେ ଆଇପିସି ଧାରା ୪୯୮ ଏ ଆଧାରରେ ମାମଲା ରୁଜୁ କରାଯାଇଛି । କୋର୍ଟ ଏହି ଯାଚିକା ଉପରେ ଶୁଣାଣୀ କରି କହିଛନ୍ତି ଏ କ୍ଷେତ୍ରରେ ମହିଳାଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ନିଆଯାଇପାରିବ ନାହିଁ । ଏଣୁ ଯାଚିକାକର୍ତ୍ତାଙ୍କ ବିରୁଦ୍ଧରେ ଏଫଆଇଆର ଓ ଅନ୍ତିମ ରିପୋର୍ଟକୁ ରଦ୍ଦ କରି ଦିଆଯିବ ।