କୂଅରେ ଗଳି ପଡିଲା ଚଳନ୍ତା ଭ୍ୟାନ, ଶ୍ବାସରୁଦ୍ଧ ହୋଇ ଚାଲିଗଲା 7 ଜୀବନ !

ନୂଆଦିଲ୍ଲୀ: ମଧ୍ୟପ୍ରଦେଶର ମନ୍ଦସୌର ଜିଲ୍ଲାର ସଞ୍ଜିତ ଅଞ୍ଚଳର କଚାରିଆ ଗାଁରେ ରବିବାର ଅପରାହ୍ନରେ ଏକ ବଡ଼ ଦୁର୍ଘଟଣା ଘଟିଛି । ନାରାୟଣଗଡ଼ ଥାନା ଅଞ୍ଚଳରେ ୧୧ ଜଣଙ୍କୁ ନେଇ ଯାଉଥିବା ଏକ ଭ୍ୟାନ ହଠାତ୍ ରାସ୍ତାରୁ ଖସି ଏକ କୂଅରେ ପଡ଼ିଗଲା। ଏହି ଦୁର୍ଘଟଣାରେ ୬ ରୁ ୭ ଜଣଙ୍କର ମୃତ୍ୟୁ ହୋଇଥିବା ଆଶଙ୍କା କରାଯାଉଛି ।

ଗାଡ଼ିରେ ଥିବା ଚାରି ଜଣ ଲୋକ ପହଁରି ବାହାରକୁ ଆସିଥିଲେ ଏବଂ ସେମାନଙ୍କୁ ତୁରନ୍ତ ଡାକ୍ତରଖାନା ପଠାଯାଇଥିଲା। ଏହି ସମୟରେ, ଲୋକଙ୍କୁ ବଞ୍ଚାଇବା ପାଇଁ କୂଅ ଭିତରକୁ ପଡ଼ିଥିବା ଜଣେ ବ୍ୟକ୍ତିଙ୍କ ମଧ୍ୟ ଶ୍ୱାସରୁଦ୍ଧ ହୋଇ ମୃତ୍ୟୁ ହୋଇଥିଲା।

କୁହାଯାଉଛି ଯେ କୂଅରେ ବିଷାକ୍ତ ଗ୍ୟାସ ମଧ୍ୟ ବ୍ୟାପିଛି, ଯାହା ଯୋଗୁଁ ରିଲିଫ୍ କାର୍ଯ୍ୟରେ ଅତିରିକ୍ତ ସତର୍କତା ଅବଲମ୍ବନ କରାଯାଉଛି । ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ରାଜ୍ୟର ଉପମୁଖ୍ୟମନ୍ତ୍ରୀ ଜଗଦୀଶ ଦେବଡ଼ା ଏବଂ କଲେକ୍ଟର ଅଦିତି ଗର୍ଗ ଘଟଣାସ୍ଥଳରେ ପହଞ୍ଚିଥିଲେ ।

ବର୍ତ୍ତମାନ ଏନଡିଆରଏଫ ଦଳ ଏବଂ ସ୍ଥାନୀୟ ପ୍ରଶାସନ ଦ୍ୱାରା ଉଦ୍ଧାର କାର୍ଯ୍ୟ ଜାରି ରହିଛି । କୂଅରେ ପଡ଼ିଥିବା ଗାଡ଼ିରେ ଏବେ ବି 6 ଜଣଙ୍କ ମୃତଦେହ ଫସି ରହିଥିବା ସମ୍ଭାବନା ରହିଛି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକାକୂଳ ପରିସ୍ଥିତି ଦେଖାଯାଇଛି ।