ପ୍ରଥମେ ଟଙ୍କା ସରିଲା, ପରେ ବିଦ୍ୟୁତ୍ ଦେଲା ଧୋକା: ପାକିସ୍ତାନ ମୁଣ୍ଡରେ ଚଡକ
ଇସଲାମାବାଦ: ପାକିସ୍ତାନର ଆର୍ଥିକ ଅବସ୍ଥା ଖରାପ ହେବା ମଧ୍ୟରେ ବିଜୁଳି ସଙ୍କଟ ଆହୁରି ବଢିଯାଇଛି । ରାଜଧାନୀ ଇସଲାମାବାଦ ସହିତ ଲାହୋର ଏବଂ କରାଚିରେ ଘଣ୍ଟା ଘଣ୍ଟା ଧରି ବିଦ୍ୟୁତ କଟୁଛି ଦେଖାଦେଇଛି ।
ଗତ କିଛି ଦିନ ହେବ ପାକିସ୍ତାନରେ ଶକ୍ତି ସଙ୍କଟ ଦେଖାଦେଇଥିଲା । ସରକାର ମଧ୍ୟ ଲୋକଙ୍କୁ ପାୱାର ବଞ୍ଚାଇବାକୁ ଅନୁରୋଧ କରିଥିଲେ । ଏଠାରେ ମଲ୍, ବାହାଘର ମଣ୍ଡପ, ମୁଖ୍ୟ ବଜାରର ସମସ୍ତଙ୍କୁ ସମୟ ପୂର୍ବରୁ ବନ୍ଦ କରିବାକୁ ଅନୁରୋଧ କରାଯାଇଥିଲା । ଆଜି ସକାଳେ ଲୋକମାନେ ଲାଇଟକୁ ଅନେକ ସମୟ ଧରି ଅପେକ୍ଷା କରିଥିଲେ, କିନ୍ତୁ କରେଣ୍ଟ ନଆସିବାରୁ ସେମାନେ ଆଖପାଖର ଲୋକଙ୍କୁ ପଚାରିଥିଲେ । ସୋସିଆଲ ମିଡିଆରେ ଲୋକଙ୍କ କ୍ରୋଧ ବଢ଼ିବାରେ ଲାଗିଛି ।
ପାକିସ୍ତାନ ସରକାର ଶକ୍ତି ମନ୍ତ୍ରଣାଳୟ କହିଛି ଯେ, ପ୍ରାଥମିକ ରିପୋର୍ଟ ଅନୁଯାୟୀ ନ୍ୟାସନାଲ ଗ୍ରୀଡର ସିଷ୍ଟମ ଫ୍ରିକ୍ୱେନ୍ସି ଆଜି ସକାଳ ୭:୩୪ ରେ ହ୍ରାସ ପାଇ ବିଦ୍ୟୁତ ବ୍ୟବସ୍ଥାରେ ବ୍ୟାପକ ତ୍ରୁଟି ଦେଖାଦେଇଛି । ସିଷ୍ଟମ୍ ରକ୍ଷଣାବେକ୍ଷଣ କାର୍ଯ୍ୟ ଦ୍ରୁତଗତିରେ ଅଗ୍ରଗତି କରୁଛି । ସୂଚନାନୁସାରେ, କ୍ୱେଟା ଏବଂ ଗୁଡଡୁ ମଧ୍ୟରେ ଉଚ୍ଚ-ଟେନସନ୍ ଟ୍ରାନ୍ସମିସନ୍ ଲାଇନରେ ତ୍ରୁଟି ଥିବାରୁ ଦେଶର ବିଭିନ୍ନ ସ୍ଥାନରେ ବିଦ୍ୟୁତ୍ କଟିଯାଇଥିଲା । ପାକିସ୍ତାନ ପୂର୍ବରୁ ହିଁ ବିଦ୍ୟୁତ ଅଭାବ ଏବଂ ଦୀର୍ଘ ସମୟ କାଟିବା ସମସ୍ୟାର ସାମ୍ନା କରୁଛି ।
