ଗଗନଯାନ ମିଶନ ଆଡ଼କୁ ମାଇଲଖୁଣ୍ଟ: ଶୁଭାଂଶୁ ଶୁକ୍ଳାଙ୍କୁ ପ୍ରଧାନମନ୍ତ୍ରୀଙ୍କ ସ୍ୱାଗତ
ନୂଆଦିଲ୍ଲୀ: ଭାରତୀୟ ମହାକାଶଚାରୀ ଗ୍ରୁପ କ୍ୟାପଟେନ ଶୁଭାଂଶୁ ଶୁକ୍ଳା ଅକ୍ସିଅମ-୪ (Ax-4) ମିଶନର ପାଇଲଟ ଭାବେ ସ୍ପେସଏକ୍ସର ଡ୍ରାଗନ ମହାକାଶ ଯାନରେ ପ୍ରଶାନ୍ତ ମହାସାଗରରେ ଅବତରଣ କରି ଅନ୍ତର୍ଜାତୀୟ ମହାକାଶ କେନ୍ଦ୍ରରୁ ମଙ୍ଗଳବାର ପୃଥିବୀକୁ ଫେରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ସ୍ୱାଗତ ଜଣାଇ କହିଛନ୍ତି ଯେ, ଏହି ଐତିହାସିକ ମହାକାଶ ଯାତ୍ରା ଭାରତର ଗଗନଯାନ ମିଶନ ଆଡ଼କୁ ଏକ ମାଇଲଖୁଣ୍ଟ ସାବ୍ୟସ୍ତ ହେବ।
ଅନ୍ତର୍ଜାତୀୟ ମହାକାଶ କେନ୍ଦ୍ରରେ ରହି କାମ କରିଥିବା ପ୍ରଥମ ଭାରତୀୟ ମହାକାଶଚାରୀ ଶୁଭାଂଶୁ ଶୁକ୍ଳା ଅକ୍ସିଅମ-୪ ଦଳର ଅନ୍ୟ ସଦସ୍ୟଙ୍କ ସହ ମହାକାଶ କେନ୍ଦ୍ରରେ ୧୮ ଦିନ ବିତାଇ ଫେରିଛନ୍ତି। ସେ ସାନ ଡିଏଗୋ ନିକଟରେ ଭାରତୀୟ ସମୟ ଅପରାହ୍ନ ସମୟରେ ଅବତରଣ କରି ଐତିହାସିକ ଅକ୍ସିଅମ-୪ ମିଶନ ସମାପ୍ତ କରିଛନ୍ତି।
ପ୍ରଧାନମନ୍ତ୍ରୀ ମୋଦୀ ଏକ୍ସରେ ଲେଖିଛନ୍ତି, “ମୁଁ ଦେଶବାସୀଙ୍କ ସହ ଗ୍ରୁପ କ୍ୟାପଟେନ ଶୁଭାଂଶୁ ଶୁକ୍ଳାଙ୍କୁ ତାଙ୍କ ଐତିହାସିକ ମହାକାଶ ମିଶନରୁ ପୃଥିବୀକୁ ଫେରିବାରେ ସ୍ୱାଗତ କରୁଛି। ଅନ୍ତର୍ଜାତୀୟ ମହାକାଶ କେନ୍ଦ୍ର ପରିଦର୍ଶନ କରିଥିବା ପ୍ରଥମ ଭାରତୀୟ ମହାକାଶଚାରୀ ଭାବେ ସେ ନିଷ୍ଠା, ସାହସ ଓ ଅଗ୍ରଣୀ ମନୋଭାବ ଦ୍ୱାରା ଏକ ବିଲିୟନ ସ୍ୱପ୍ନକୁ ପ୍ରେରଣା ଦେଇଛନ୍ତି। ଏହା ଆମେ ନିଜର ମାନବ ମହାକାଶ ଯାତ୍ରା ମିଶନ – ଗଗନଯାନ ଆଡ଼କୁ ଆଉ ଏକ ମାଇଲଖୁଣ୍ଟ ଚିହ୍ନିତ କରେ।”
ଶୁଭାଂଶୁ, ଯାହାଙ୍କୁ ତାଙ୍କ ଦଳର ସଦସ୍ୟମାନେ ସ୍ନେହରେ ‘ଶକ୍ସ’ ବୋଲି ଡାକନ୍ତି, ସୋମବାର ଅପରାହ୍ନ (ଭାରତୀୟ ସମୟ) ମହାକାଶ କେନ୍ଦ୍ରରୁ ବିଚ୍ଛିନ୍ନ ହୋଇ ଡ୍ରାଗନ ମହାକାଶ ଯାନରେ ୨୨ ଘଣ୍ଟାର ଯାତ୍ରା ପରେ ଘରକୁ ଫେରିଛନ୍ତି। ୧୯୮୪ରେ ସୋଭିଏତ ମିଶନରେ ରାକେଶ ଶର୍ମାଙ୍କ ପରେ ସେ ମହାକାଶରେ ପହଞ୍ଚିଥିବା ଦ୍ୱିତୀୟ ଭାରତୀୟ ହୋଇଛନ୍ତି।
ଡ୍ରାଗନ ମହାକାଶ ଯାନ ପୃଥିବୀର ବାୟୁମଣ୍ଡଳ ଦେଇ ଘଣ୍ଟା ପ୍ରତି ୨୭,୦୦୦ କିଲୋମିଟରରୁ ଅଧିକ ବେଗରେ ଗତି କରୁଥିବା ବେଳେ, ଶୁଭାଂଶୁ ଏବଂ ତାଙ୍କ ଦଳର ସଦସ୍ୟମାନେ — କମାଣ୍ଡର ପେଗି ହ୍ୱିଟସନ (ଯୁକ୍ତରାଷ୍ଟ୍ର), ସ୍ଲାୱୋସଜ ଉଜନାନସ୍କି (ପୋଲାଣ୍ଡ), ଏବଂ ଟିବୋର କାପୁ (ହଙ୍ଗେରୀ) — ଅତ୍ୟଧିକ ତାପମାତ୍ରା ଏବଂ ଗୁରୁତ୍ୱାକର୍ଷଣ ବଳ ଅନୁଭବ କରିଥିଲେ। ପାରାଚ୍ୟୁଟର ସଫଳ ପ୍ରୟୋଗ ପରେ ମହାସାଗରରେ ନରମ ଅବତରଣ ହୋଇଥିଲା।