ଏଠାରେ ନବଜାତଙ୍କୁ ନେଇ ପାଳନ ହୁଏ ବିପଦପୂର୍ଣ୍ଣ ପରମ୍ପରା, ଜାଣନ୍ତୁ କେଉଁଠି
ଦୁନିଆରେ ଅନେକ ସଂସ୍କୃତି ଏବଂ ପର୍ବ ଅଛି । ଏମିତି ଅନେକ ପରମ୍ପରା ରହିଛି ଯାହା କେବେଠାରୁ ପ୍ରଚଳିତ ଏବଂ ଏହା ପଛରେ କ’ଣ ତର୍କ ରହିଛି ତାହା କହିବା କଷ୍ଟ, ତଥାପି ଏହା ପିଢ଼ି ପିଢ଼ି ଚାଲିଆସୁଛି । ତେବେ ଆସନ୍ତୁ ଜାଣିବା ଏହିଭଳି ଏକ ପରମ୍ପରା ବିଷୟରେ ।
ଯେତେବେଳେ କାହା ଘରେ ଶିଶୁଟିଏ ଜନ୍ମ ନିଏ ଘରେ ଏକ ଉତ୍ସବର ମାହୋଲ ସୃଷ୍ଟି ହୋଇଥାଏ । ବିଭିନ୍ନ ରୀତିନୀତି ପାଳନ କରାଯାଇଥାଏ । ଏହିପରି ଛୋଟ ଶିଶୁଙ୍କୁ ନେଇ ସ୍ପେନରେ ଏକ ପର୍ବ ପାଳନ ହୋଇଥାଏ । ଏହି ପର୍ବର ନାମ ହେଉଛି ‘ଏଲ୍ କୋଲାଚୋ ଫେଷ୍ଟିଭାଲ୍’ । ବେବି ଜମ୍ପିଂ କିମ୍ବା ଡେଭିଲ୍ ଜମ୍ପିଂ ଫେଷ୍ଟିଭାଲ୍ ଭାବରେ ମଧ୍ୟ ଜଣାଶୁଣା । କୁହାଯାଏ ଏହି ପରମ୍ପରା ପ୍ରାୟ ୪୦୦ ବର୍ଷ ପୁରୁଣା । ପ୍ରତିବର୍ଷ ଜୁନ୍ ମଧ୍ୟଭାଗରେ ଏହି ପର୍ବ ଆୟୋଜିତ ହୋଇଥାଏ । ଏହି ପର୍ବରେ ନବଜାତ ଶିଶୁମାନଙ୍କୁ ସେମାନଙ୍କ ମା’ ମାନେ ରାସ୍ତାରେ ରଖାଯାଇଥିବା ଶଯ୍ୟା ଉପରେ ଶୁଆଇଦିଅନ୍ତି । ଏହା ପରେ, ଏକ ବିଶେଷ ପ୍ରକାରର ନାଲି ଏବଂ ହଳଦିଆ ରଙ୍ଗର ପୋଷାକ ପିନ୍ଧିଥିବା ଲୋକମାନେ ଏହି ପିଲାମାନଙ୍କ ଉପରେ ଡେଇଁଥାନ୍ତି । ଏହି ଲୋକମାନଙ୍କ ମଧ୍ୟରୁ ଜଣକୁ ସଇତାନ ବା ଡେଭିଲ ବୋଲି ବିବେଚନା କରାଯାଏ । ଏହି ପ୍ରକ୍ରିୟା ସେ ପର୍ଯ୍ୟନ୍ତ ଚାଲିଥାଏ ଯେ ପର୍ଯ୍ୟନ୍ତ ସେହି ଡେଭିଲ ପିଲାଙ୍କ ଉପରେ ଡେଇଁ ପଳାଇ ନଯାଇଛି ।
ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ ସେଠାରେ ଥିବା ଲୋକମାନେ ଏହି ପରମ୍ପରାକୁ ବହୁତ ବଡ଼ ଉତ୍ସବ ଭାବରେ ପାଳନ କରନ୍ତି । ଏହି ପରମ୍ପରା ସହିତ ଜଡ଼ିତ ଏକ ବିଶ୍ୱାସ ମଧ୍ୟ ଅଛି ଯେ ଯେତେବେଳେ ସଇତାନ ପିଲାମାନଙ୍କ ଉପରେ ଡେଇଁଥାଏ, ସେତେବେଳେ ସେ ପିଲାମାନଙ୍କର ସମସ୍ତ ପାପ ନଷ୍ଟ କରିଦିଏ ଏବଂ ଆଗାମୀ ସମୟରେ ସେମାନଙ୍କୁ ମନ୍ଦ କାର୍ଯ୍ୟ କରିବାରୁ ରକ୍ଷା କରେ ।
ଏହି ପାରମ୍ପରିକ ସ୍ପେନୀୟ ପର୍ବ ୧୬୦୦ ମସିହାରେ ଆରମ୍ଭ ହୋଇଥିବା କୁହାଯାଏ । ସ୍ପେନର ବରଗୋସ୍ ପ୍ରଦେଶର ସାସାମୋନ୍ ଗାଁର କାଷ୍ଟିଲୋ ଡି ମର୍ସିଆରେ କର୍ପସ୍ ଖ୍ରିଷ୍ଟୀଙ୍କ କ୍ୟାଥୋଲିକ୍ ପର୍ବ ପାଳନ କରିବା ପାଇଁ ଏହା ପ୍ରତିବର୍ଷ ପାଳନ କରାଯାଏ ।
ଯଦିଓ ଏଠାକାର ଲୋକଙ୍କର ଏହି ପ୍ରଥା ଉପରେ ଗଭୀର ବିଶ୍ୱାସ ଅଛି । ତଥାପି ଅନେକ ଏହାକୁ ଅନ୍ଧବିଶ୍ୱାସ ବୋଲି ଭାବନ୍ତି । ଏପରି ଲୋକମାନେ କୁହନ୍ତି ଯେ ଏଥିରେ ପିଲାମାନଙ୍କର ଆଘାତ ହେବାର ସମ୍ଭାବନା ଅଛି, ତେଣୁ ଏହା ବିପଦରୁ ମୁକ୍ତ ନୁହେଁ ।
