ଆସନ୍ତା ୩ଦିନ ଯାଏ ହାଡ଼ଭଙ୍ଗା ଶୀତ, ୨ରୁ ୩ ଡିଗ୍ରୀ ଖସିବ ତାପମାତ୍ରା
ଭୁବନେଶ୍ୱର (ଭାସ୍କର ନ୍ୟୁଜ୍): ସାରା ରାଜ୍ୟରେ ଜାରି ରହିଛି ଶୀତ ଲହରୀ । ଶୀତରେ ଥରୁଛି ଓଡ଼ିଶା । ପାରଦ ଖସିବା ଜାଡ଼ ବଢ଼ିବ। ଆସନ୍ତା ତିନି ଦିନ ରାଜ୍ୟର ସର୍ବନିମ୍ନ ତାପମାତ୍ରା ୩ଡିଗ୍ରୀ ପର୍ଯ୍ୟନ୍ତ କମିବ । ଭୁବନେଶ୍ୱର ସମେତ ଦକ୍ଷିଣ ଉପକୂଳରେ ରାତି ତାପମାତ୍ରା ୩ ଡିଗ୍ରୀ ଯାଏ କମିଯିବ । ୨୧ ତାରିଖ ଯାଏ ଏହା ଜାରି ରହିବ ।
ରବିବାର ରାଜ୍ୟର ୯ ସହର ୧୨ ଡିଗ୍ରୀ ତଳେ ରହିଛି । ୮.୫ ଡିଗ୍ରୀ ସେଲ୍ସିୟସ୍ ସହ ଦାରିଙ୍ଗିବାଡ଼ିରେ ସର୍ବନିମ୍ନ ତାପମାତ୍ରା ରେକର୍ଡ କରାଯାଇଛି । କେବଳ ଦାରିଙ୍ଗିବାଡ଼ି ନୁହେଁ ସାରା ଫୁଲବାଣୀ ଶୀତରେ ଥରିବାରେ ଲାଗିଛି । ଅନ୍ୟପକ୍ଷରେ ରାଜ୍ୟର ଆଉ ୮ ସହରରେ ତାପମାତ୍ରା ୧୦ ରୁ ୧୧ ଡିଗ୍ରୀ ଭିତରେ ରହିଛି । ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ ସୋନପୁର ଓ ଟିଟିଲାଗଡ଼ରେ ତାପମାତ୍ରା ୧୦.୮ ଡିଗ୍ରୀ ରହିଥିବାବେଳେ ସୁନ୍ଦରଗଡ଼ରେ ୧୦, ବଲାଙ୍ଗିରରେ ୯, କୋରାପୁଟ ଓ ଫୁଲବାଣୀରେ ୯.୫, ଝାରସୁଗୁଡ଼ାରେ ୧୧.୨ ଓ ଭବାନୀପାଟଣାରେ ୧୧.୬ ଡିଗ୍ରୀ ରହିଛି ।
ସେହିପରି କଟକ ସହରରେ ତାପମାତ୍ରା ୧୫ ଡିଗ୍ରୀ ରହିଥିବାବେଳେ ରାଜଧାନୀ ଭୁବନେଶ୍ୱରରେ ତାପମାତ୍ରା ୧୫.୧ଡିଗ୍ରୀ ରହିଥିବା ସୂଚନା ଦିଆଯାଇଛି । ଉପକୂଳରୁ ଆଭ୍ୟନ୍ତର ପର୍ଯ୍ୟନ୍ତ ସବୁଠି ଶୀତର ପ୍ରକୋପ ଦେଖିବାକୁ ମିଳୁଛି । ଉତ୍ତର ପଶ୍ଚିମ ଓ ଉତ୍ତର ଦିଗରୁ ଥଣ୍ଡା ପବନ ସହ ଶୁଷ୍କ ବାୟୁ ବହୁଥିବାରୁ ରାତିର ତାପମାତ୍ରାରେ ହ୍ରାସ ଘଟିବାରେ ଲାଗିଛି । ପାଣିପାଗ ବିଭାଗର ଆକଳନ ଅନୁଯାୟୀ ଆସନ୍ତା ୫ ଦିନ ଯାଏଁ ପାଗ ମୁଖ୍ୟତଃ ଶୁଖିଲା ରହିବ । ପାଗରେ କିଛି ବିଶେଷ ପରିବର୍ତ୍ତନ ହେବନାହିଁ । ସର୍ବନିମ୍ନ ତାପମାତ୍ରା ୨ ରୁ ୪ ଡିଗ୍ରୀ କମ୍ ରହିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି ।
