(Video) ‘ପୁଷ୍ପା-୨’ରେ ଓଡ଼ିଆ ପୁଅ: ମିଥୁନଙ୍କ ଦମଦାର ଅଭିନୟ ଦେଖି ଅଲ୍ଲୁ ଅର୍ଜୁନ ଛାନିଆ

ଭୁବନେଶ୍ୱର(ଓଡ଼ିଶା ଭାସ୍କର): ସାଉଥ ସୁପରଷ୍ଟାର ଅଲ୍ଲୁ ଅର୍ଜୁନଙ୍କ ଅଭିନୀତ ‘ପୁଷ୍ପା’ ଫିଲ୍ମ ବକ୍ସ ଅଫିସରେ ସୁପରହିଟ୍ ହେବା ପରେ ଏବେ ‘ପୁଷ୍ପା-୨’କୁ ନେଇ ବେଶ୍ ଚର୍ଚ୍ଚା ଚାଲିଛି । ତେବେ ସବୁଠାରୁ ବଡ଼ କଥା ହେଉଛି ‘ପୁଷ୍ପା-୨’ର ଶୁଟିଂ ଓଡ଼ିଶାରେ ଚାଲିଛି । ରାଜ୍ୟର ମାଲକାନଗିରିର କିଛି ଅଞ୍ଚଳରେ ଏହି ଫିଲ୍ମର କିଛି ଦୃଶ୍ୟ ଶୁଟିଂ ଚାଲିଥିବାରୁ ସ୍ଥାନୀୟ ଅଞ୍ଚଳବାସୀଙ୍କ ଖୁସି କହିଲେ ନସରେ । ପ୍ରଶଂସକମାନେ ଅଲ୍ଲୁ ଅର୍ଜୁନଙ୍କୁ ଅତି ନିକଟରୁ ଦେଖିବାକୁ ବେଶ୍ ଭିଡ଼ ଜମାଉଛନ୍ତି ।

ତେବେ ‘ପୁଷ୍ପା-୨’ର ଶୁଟିଂ ଓଡ଼ିଶାରେ ଚାଲିଥିବା ବେଳେ ରାଜ୍ୟର ସମସ୍ତ ସିନେପ୍ରେମୀମାନେ ଓଡ଼ିଆ କଳାକାରଙ୍କୁ ଏଥିରେ ଦେଖିବାକୁ ପାଇବେ । ଓଲିଉଡର ଅନ୍ୟତମ ନିର୍ଦ୍ଦେଶକ ମିଟୁ ମିଥୁନ୍ ଏହି ଫିଲ୍ମରେ ପରଦାରେ ଆସିବେ । ଏହି ଫିଲ୍ମର ଶୁଟିଂ ପାଇଁ ମିଥୁନ ଏକ ଭଲ ସେଲୁନକୁ ଯାଇ ନିଜର କେଶ କାଟିଛନ୍ତି । ପୋଲିସ ପୋଷାକ ସାଙ୍ଗକୁ କଳା ଚଷମାରେ ମିଥୁନ ବେଶ୍ ସ୍ମାର୍ଟ ଲାଗୁଛନ୍ତି । ଜଣେ ଓଡ଼ିଅ।। ଭାବେ ସାଉଥ ଫିଲ୍ମରେ ଅଭିନୟ କରିବାର ସୁଯୋଗ ପାଇଥିବାରୁ ସେଥିପାଇଁ ମିଥୁନ୍ ବେଶ୍ ଉତ୍ସାହିତ ରହିଛନ୍ତି ।

ନିଜର ୨୫ ବର୍ଷର ଫିଲ୍ମ କ୍ୟାରିୟର ମଧ୍ୟରେ ମିଥୁନ ଜ୍ୟାକି ଶ୍ରଫଙ୍କ ଭଳି ଅନେକ ବଡ଼ ବଡ଼ ବଲିଉଡ ଅଭିନେତାଙ୍କ ସହିତ ଅଭିନୟ କରିଛନ୍ତି । ଏହି ଫିଲ୍ମ ଦେଖିବା ପରେ ମିଟୁ ମିଥୁନ ବୋଲି ଜଣେ ଉଚ୍ଚକୋଟୀର କଳାକାର ଅଛନ୍ତି ବୋଲି ଦର୍ଶକମାନେ ଜାଣିପାରିବେ । ଫିଲ୍ମରେ ଅଲ୍ଲୁ ଅର୍ଜୁନ ଓଡ଼ିଶା ମାଟିରୁ ରକ୍ତ ଚନ୍ଦନ କାଠ ଚୋରି କରି ନେଇଯାଉଥିବା ବେଳେ ଏହାକୁ ସହଜରେ ଗ୍ରହଣ କରିପାରି ନଥିଲେ ମିଥୁନ୍ । ହୋଇପାରେ ଏହା ଅଭିନୟ, ମାତ୍ର ଏହାକୁ ପରଦାରେ ବାସ୍ତବ ରୂପ ଦେବାକୁ ଚେଷ୍ଟା କରିଛନ୍ତି ମିଥୁନ୍ । ତେଣୁ ଦର୍ଶକମାନେ ନିଶ୍ଚିତ ଭାବେ ମିଥୁନଙ୍କର ଏହି ଅନ୍ଦାଜକୁ ଗ୍ରହଣ କରିବେ ବୋଲି ସେ ଆଶାବାଦୀ ରହିଛନ୍ତି । ତେବେ ସେ ଯାହା ହେଉ, ମିଥୁନ ଆମର ଓଡ଼ିଆ ପୁଅ ଏହି ଫିଲ୍ମ ମାଧ୍ୟମରେ ସାରା ଭାରତବର୍ଷରେ ସୁନାମ ଆଣନ୍ତୁ ଏହା ହିଁ ଆମର କାମନା ।