୭୫ତମ ସ୍ଵାଧୀନତା ଦିବସରେ ସ୍ୱାବଲମ୍ବୀ ହେବାର ସ୍ୱପ୍ନ ସାକାର କଲା ସାଇଶକ୍ତି ମହାସଂଘ

ବିଗତ ଦିନରେ ଫିନାଇଲ,ପାମ୍ପଡ,ମସଲା, ପୂଜା ସାମଗ୍ରୀ ଆଦି ତିଆରି କରି ବଜାରରେ ଏକ ଭରସାଯୋଗ୍ୟ ବ୍ରାଣ୍ଡ ଭାବେ ପରିଚିତ ହେବା ପରେ ,ଏବେ ଏହି ଉଦ୍ୟୋଗକୁ ଭିନ୍ନ ଏକ ରୂପ ଦେଇଛନ୍ତି ଏହି ମହିଳା ସମୂହ । ସ୍ଵାଧୀନତା ଦିବସ ଅବସରରେ ଦୁଇଟି ସେମି ଅଟୋମେଟେଡ଼ ଧୂପ ତିଆରି  ମେସିନ ଓ ଖଲିପତ୍ର ତିଆରି ମେସିନ ନିଜ ସଞ୍ଚିତ ଅର୍ଥରେ କ୍ରୟ କରି ସ୍ଵବଲମୀ ହେବାର ସ୍ୱପ୍ନ କୁ ସାକାର କରିପାରିଛନ୍ତି ସାଇ ଶକ୍ତି ମହାସଂଘର ସଦସ୍ୟା ମାନେ ।

ମୁଖ୍ୟ ଅତିଥି ସମାଜସେବୀ ଡ. ଚିଦାତ୍ମିକା ଖଟୁଆ, ସମାଜସେବୀ ଆରାଧନା ମିଶ୍ର , ସଂଘର ସଭାପତି ସଶ୍ମିତା ମଙ୍ଗରାଜ ଏବଂ ସମସ୍ତ କାର୍ଯ୍ୟକର୍ତା ମାନେ ଜାତୀୟ ପତାକା ଉତ୍ତୋଳନ କରିବା ପରେ ଉକ୍ତ ଦୁଇ ମେସିନର ଉଦ୍ଘାଟନ କରିଛନ୍ତି । ସଂଘ ଗୃହରେ  ଉକ୍ତ ଦୁଇ ମେସିନକୁ ଇନଷ୍ଟଲ କରାଯାଇଅଛି । ଏନେଇ ସମସ୍ତ ସଦସ୍ୟା ଖୁବ ଉତ୍ସାହିତ ଥିବା ଦେଖିବାକୁ ମିଳିଛି ।

“ସରକାରୀ ଉଦାସୀନତା,ସହଯୋଗ ପାଇଁ ଚେଷ୍ଟା କରି ମଧ୍ୟ ବିଫଳ ହେବା ପରେ ନିଜ ସଞ୍ଚିତ ଅର୍ଥରେ  ଆମେ ଏହି ଉଦ୍ୟୋଗକୁ ଆଗେଇ ପାରିଛୁ । ସଂଗଠନର ଏବେ ୧୫ ରୁ ଉର୍ଦ୍ଧ୍ବ ମହିଳା ପରୋକ୍ଷରେ ସ୍ୱାବଲମ୍ବୀ ହେବା ସହ ପ୍ରତ୍ୟକ୍ଷ ରେ ସମସ୍ତ ମହିଳା ଏହାର ଲାଭ ପାଇପାରିବେ,ନିଜ ପରିବାର ପୋଷଣ କରିପାରିବେ । ଯଦି ସରକାର ଆମକୁ ସାହାଯ୍ୟ କରନ୍ତେ ଆମେ ରାଜଧାନୀର ୧୦୦୦ରୁ ଉର୍ଦ୍ଧ୍ବ ମହିଳାଙ୍କୁ ସ୍ୱାବଲମ୍ବୀ କରିପାରିବା ମୋର ବିଶ୍ୱାସ ” –  ସଂଗଠନର ସଭାପତି ସଶ୍ମିତା ମଙ୍ଗରାଜ କହିଛନ୍ତି ।

ସେହିପରିଭାବେ ମୁଖ୍ୟ ଅତିଥି ଚିଦାତ୍ମିକା ଖଟୁଆ ଉପସ୍ଥିତ ସମସ୍ତ ମହିଳା ମାନଙ୍କ ଉତ୍ସାହ କୁ ସ୍ୱାଗତ ଜଣାଇବା ସହ ସମସ୍ତ ସହଯୋଗ ଯୋଗାଇବା ପାଇଁ ପ୍ରତିଶୃତି ଦେଇଛନ୍ତି । ମହିଳା ମାନେ ସ୍ୱାବଲମୀ ହେବା ହିଁ ସ୍ବାଧୀନତାର ଗାରିମା, ଏବଂ ଏହାକୁ ପ୍ରୋତ୍ସାହନ ଦେବା ପ୍ରତେକ ନାଗରିକଙ୍କ କର୍ତ୍ତବ୍ୟ ବୋଲି ନିଜ ଉଦବୋଧନରେ କହିଛନ୍ତି । ଅନ୍ୟତମ ଅତିଥି ଯୁବ ସମାଜସେବୀ ଆରାଧନା ମିଶ୍ର ମଧ୍ୟ ଏହି ଅବସରେ ଯୋଗଦେଇ ସଂଗଠନର ସମସ୍ତ କର୍ମକର୍ତ୍ତା ମାନଙ୍କୁ ଧନ୍ୟବାଦ ଅର୍ପଣ କରିଛନ୍ତି । ଏବେ ଦେଶ ଯେଉଁ ଆର୍ଥିକ ବିପର୍ଯ୍ୟୟ ଭିତରେ ଗତିକରୁଛି ତାହାର ଏକମାତ୍ର ସମାଧାନ ମହିଳା ଶକ୍ତି ପାଖରେ ଅଛି । ଯଦି ଅଧିକରୁ ଅଧିକ ମହିଳା ଦେଶର ଆର୍ଥିକ ବ୍ୟାପାରରେ ନିଜର ସହଭାଗିତା ରଖନ୍ତି ତେବେ ଭାରତ ଦେଶ ଏକ ଆଦର୍ଶ ଦେଶ ଭାବେ ପରିଗଣିତ ହେବ ବୋଲି ସେ କହିଛନ୍ତି ।