ବଢ଼ିଲା ଭାରତର ଟେନସନ୍: ଦେଶରେ ହୁ ହୁ ହୋଇ ବଢ଼ିବ ପେଟ୍ରୋଲ, ଡିଜେଲ୍, ଏଲପିଜି ଗ୍ୟାସ୍

ନୂଆଦିଲ୍ଲୀ: ଇସ୍ରାଏଲରୁ ଇରାନ ମଧ୍ୟରେ ଲାଗିରହିଛି  ଯୁଦ୍ଧ ସ୍ଥିତି । ଏଥିରେ ଦୁଇ ଦେଶ କ୍ଷତିଗ୍ରସ୍ତ ହେଲା ସହ ବିଶ୍ୱ ଉପରେ ବଡ଼ ପ୍ରଭାବ ପଡ଼ିବ; ଅନ୍ୟପଟେ ଭାରତକୁ ମଧ୍ୟ ଏହାର ପରିଣାମ ଭୋଗିବାକୁ ପଡ଼ିବ।

ଯଦି ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧ ଜୋର ଧରେ ଓ ମଧ୍ୟପ୍ରାଚ୍ୟର ଅନ୍ୟାନ୍ୟ ଦେଶ ମଧ୍ୟ ଏଥିରେ ସାମିଲ ହୁଅନ୍ତି, ତେବେ ଡିଜେଲ, ପେଟ୍ରୋଲ ଏବଂ ଏଲପିଜି ଗ୍ୟାସ୍ ମୂଲ୍ୟ ଉପରେ ବଡ଼ ପ୍ରଭାବ ପଡ଼ିପାରେ।

ଭାରତ ତାର ତୈଳ ଆବଶ୍ୟକତାର 85 ପ୍ରତିଶତ ବିଶ୍ୱର ଅନ୍ୟ ଦେଶଗୁଡ଼ିକରୁ ଆମଦାନୀ କରେ। ଏହାର ଏକ ତୃତୀୟାଂଶ ମଧ୍ୟପ୍ରାଚ୍ୟ ଦେଶଗୁଡ଼ିକରୁ ଆସେ। ଅର୍ଥାତ୍, ଯଦି ସେଠାରୁ ଆସୁଥିବା ତୈଳ ଉପରେ ଯୁଦ୍ଧ ଯୋଗୁଁ କୌଣସି ସମସ୍ୟା ହୁଏ, ତେବେ ମୂଲ୍ୟ ବୃଦ୍ଧି ପାଇପାରେ।

ଅଶୋଧିତ ତୈଳ ମୂଲ୍ୟରେ ବୃଦ୍ଧି

ଇରାନ-ଇସ୍ରାଏଲ ଉତ୍ତେଜନା ଆରମ୍ଭ ହେବା ମାତ୍ରେ, ଅଶୋଧିତ ତୈଳ ପ୍ରତି ବ୍ୟାରେଲ 92 ଡଲାର ସ୍ତର ଅତିକ୍ରମ କରିସାରିଛି।

ଆମେରିକାର ପ୍ରସିଦ୍ଧ ଆର୍ଥିକ ସଂସ୍ଥା ଜେପି ମୋର୍ଗାନ୍ ଦାବି କରିଛି ଯେ ଏହି ମୂଲ୍ୟ 31 ପ୍ରତିଶତ ବୃଦ୍ଧି ପାଇ 120 ଡଲାର ପ୍ରତି ବ୍ୟାରେଲ ହୋଇପାରେ। ଯଦି ପେଟ୍ରୋଲର ମୂଲ୍ୟରେ ମଧ୍ୟ ଏପରି ବୃଦ୍ଧି ଘଟେ, ତେବେ ଆପଣ ଦିଲ୍ଲୀରେ ପ୍ରତି ଲିଟର 94 ଟଙ୍କା ଦରରେ କିଣୁଥିବା ପେଟ୍ରୋଲର ମୂଲ୍ୟ 123 ଟଙ୍କା ପ୍ରତି ଲିଟରକୁ ବୃଦ୍ଧି ପାଇପାରେ।

ସେୟାର ବଜାରରେ ପତନ

ଅର୍ଥାତ୍, ତୈଳ ଯୁଦ୍ଧର ସବୁଠାରୁ ବିପଦପୂର୍ଣ୍ଣ ପ୍ରଭାବ ଆପଣଙ୍କ ପକେଟ ଉପରେ ଦେଖାଯିବାର ସମ୍ଭାବନା ଅଛି। କିନ୍ତୁ, ସମସ୍ୟା କେବଳ ତେଲର ମୂଲ୍ୟ ସହିତ ନୁହେଁ। ଏହାର ପ୍ରଭାବ ସବୁଠି ଦେଖାଯିବ।

ଆଜି ମଧ୍ୟପ୍ରାଚ୍ୟରେ ଯୁଦ୍ଧ ଖବର ଆସିବା ମାତ୍ରେ ଆମର ଷ୍ଟକ୍ ବଜାର ଦେଢ଼ ପ୍ରତିଶତରୁ ଅଧିକ ହ୍ରାସ ପାଇଲା, ଯାହା ଫଳରେ ନିବେଶକମାନେ କ୍ଷତି ସହିଲେ। ତଥାପି,ଯେତେବେଳେ ବଜାର ବନ୍ଦ ହେଲା, ଏଥିରେ ବୃଦ୍ଧି ହେଲା। କିନ୍ତୁ ଯୁଦ୍ଧ ଏପର୍ଯ୍ୟନ୍ତ ଶେଷ ହୋଇନାହିଁ କାରଣ ଇସ୍ରାଏଲ ଦାବି କରୁଛି ଯେତେ ଦିନ ଲାଗିଲେ ମଧ୍ୟ ସେ ଇରାନ ସହିତ ଯୁଦ୍ଧ ଜାରି ରଖିବ।