୨୦୧୮ରୁ ଏବେ ସୁଦ୍ଧା ଏସଏଆଇକୁ ୧୭ଟି ଯୌନ ଉତ୍ପୀଡ଼ନ ଅଭିଯୋଗ ମିଳିଛି: କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର
ନୂଆଦିଲ୍ଲୀ: ୨୦୧୮ରୁ ଏବେ ସୁଦ୍ଧା ସ୍ପୋର୍ଟସ୍ ଅଥରିଟି ଅଫ୍ ଇଣ୍ଡିଆ(ଝଇଓ) କୁ ୧୭ଟି ଯୌନ ଉତ୍ପୀଡ଼ନ ଅଭିଯୋଗ ଆସିଛି ବୋଲି ମଙ୍ଗଳବାର ଦିନ ଲୋକସଭାରେ ପ୍ରଶ୍ନୋତ୍ତର ସମୟରେ କହିଛନ୍ତି କ୍ରୀଡ଼ାମନ୍ତ୍ରୀ ଅନୁରାଗ ଠାକୁର । ଭାରତୀୟ ଜନତା ଦଳର କିଛି ସଦସ୍ୟଙ୍କ ସମେତ ଗୃହର ସାତ ଜଣ ସଦସ୍ୟଙ୍କ ପ୍ରଶ୍ନର ଉତ୍ତରରେ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର କହିଛନ୍ତି ଯେ ଥିରୁବନନ୍ତପୁରମ୍, ବେଙ୍ଗାଲୁରୁ, କୋଲକାତା, ଗାନ୍ଧିନଗର, ଲଖନଉ ଏବଂ ଦିଲ୍ଲୀ ଏନସିଆରରେ ଥିବା ଏସଏଆଇ କେନ୍ଦ୍ରଗୁଡ଼ିକୁ ଯୌନ ଉତ୍ପୀଡ଼ନ ଅଭିଯୋଗ ଅଣାଯାଇଛି । ଏଥିମଧ୍ୟରୁ ୨୦୧୮ ରେ ସାତଟି ଅଭିଯୋଗ, ୨୦୧୯ ରେ ୬ ଟି, ୨୦୨୦ ରେ ଗୋଟିଏ ଏବଂ ଚଳିତ ବର୍ଷ ତିନୋଟି ଅଭିଯୋଗ ଗ୍ରହଣ କରାଯାଇଛି।
ଠାକୁର କହିଛନ୍ତି ଯେ ଏସଏଆଇ କର୍ମଚାରୀଙ୍କ ଦ୍ୱାରା ୧୬ ଟି ଅଭିଯୋଗ କରାଯାଇଥିଲା ଏବଂ ଯେଉଁଠାରେ ଏହି ଘଟଣା ଏସଏଆଇ କମ୍ପ୍ଲେକ୍ସ ଭିତରେ ଘଟିଛି । ସେହିପରି ଅନ୍ୟ ଏକ ମାମଲାରେ ସାଇର କୋଚଙ୍କ ଉପରେ ଯୌନ ଉତ୍ପୀଡ଼ନ ଅଭିଯୋଗ ହୋଇଛି ଯାହା ପାଇଁ ଅପରାଧିକ ମାମଲା ଚାଲିଛି।
ଗତ ବର୍ଷ ଇଣ୍ଡିଆନ୍ ଏକ୍ସପ୍ରେସ ରିପୋର୍ଟ କରିଥିଲା ଯେ ୨୦୧୦ ରୁ ୨୦୧୯ ମଧ୍ୟରେ ୪୫ ଟି ଯୌନ ଉତ୍ପୀଡ଼ନ ମାମଲା ସାଇ ଦ୍ୱାରା ପରିଚାଳିତ ୨୪ ଟି କେନ୍ଦ୍ରରେ ରୁଜୁ ହୋଇଥିଲା ଯାହା କ୍ରୀଡା ମନ୍ତ୍ରଣାଳୟ ଅଧୀନରେ ଆସିଥାଏ । ଏହି ରିପୋର୍ଟ ପରେ ସାଇର ପୂର୍ବତନ ମହାନିର୍ଦ୍ଦେଶକ କହିଛନ୍ତି ଯେ ସେମାନଙ୍କ ମଧ୍ୟରୁ ଅନେକ ଜଣ ଏନେଇ ରିପୋର୍ଟ କରିନଥିବାରୁ ପ୍ରକୃତ ନିର୍ୟ୍ୟାତନା ମାମଲା ଅଧିକ ହୋଇଥାଇପାରେ।
