ଜୁଲାଇ ୧୬ରୁ ୨୩ ପର୍ଯ୍ୟନ୍ତ ସ୍କୁଲ ଛୁଟି ନିର୍ଦ୍ଦେଶ, ନିୟମ ନମାନିଲେ କଡ଼ା କାର୍ଯ୍ୟାନୁଷ୍ଠାନ
ଲକ୍ଷ୍ନୌ,୧୪ା୭: ଉତ୍ତରପ୍ରଦେଶର ମୁଜାଫରନଗର ଜିଲ୍ଲାର ସମସ୍ତ ଶିକ୍ଷାନୁଷ୍ଠାନକୁ ଜୁଲାଇ ୧୬ରୁ ୨୩ ପର୍ଯ୍ୟନ୍ତ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି। ଜିଲ୍ଲାପାଳଙ୍କ ନିର୍ଦ୍ଦେଶରେ, ଡିଆଇଓଏସ ସମସ୍ତ ସ୍କୁଲକୁ ନିର୍ଦ୍ଦେଶ ପଠାଇଛନ୍ତି। ଏହି ନିର୍ଦ୍ଦେଶ ୟୁପି, ସିବିଏସଇ ଏବଂ ଆଇସିଏସଇ ବୋର୍ଡ ଦ୍ୱାରା ସ୍ୱୀକୃତିପ୍ରାପ୍ତ ସ୍କୁଲଗୁଡ଼ିକ ପାଇଁ ମଧ୍ୟ ପ୍ରଯୁଜ୍ୟ ହେବ। ଯଦି ସସରକାରୀ-ବେସରକାରୀ ସ୍କୁଲଗୁଡ଼ିକ ଖୋଲା ଥାଏ, ତେବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
କାଉଡ଼ି ଯାତ୍ରା ଯୋଗୁ ମୁଜାଫରନଗରରେ ରାସ୍ତା ବନ୍ଦ ଥିବାରୁ, ଡିଏମ ସମସ୍ତ ସରକାରୀ ଏବଂ ବେସରକାରୀ ସ୍କୁଲରେ ଛୁଟି ଘୋଷଣା କରିଛନ୍ତି। ଯାହା ଅଧୀନରେ ଜୁଲାଇ ୧୬ରୁ ୨୩ ପର୍ଯ୍ୟନ୍ତ ଜିଲ୍ଲାର ସମସ୍ତ ବୋର୍ଡ ସ୍କୁଲ ବନ୍ଦ ରହିବ। ଏହି ସମୟ ମଧ୍ୟରେ ମୌଳିକ ଶିକ୍ଷା ବିଭାଗ, ମାଧ୍ୟମିକ ଶିକ୍ଷା ବିଭାଗ ସହିତ ଡିଗ୍ରୀ କଲେଜଗୁଡ଼ିକ ମଧ୍ୟ ବନ୍ଦ ରହିବ।
ଜିଲ୍ଲାପାଳ ଉମେଶ ମିଶ୍ର ସୋମବାର ସାମ୍ବାଦିକମାନଙ୍କ ସହ ଆଲୋଚନା ସମୟରେ କହିଛନ୍ତି ଯେ, ଜିଲ୍ଲାର ସମସ୍ତ ଶିକ୍ଷାନୁଷ୍ଠାନ ୧୬ ଜୁଲାଇରୁ ୨୩ ତାରିଖ ପର୍ଯ୍ୟନ୍ତ ବନ୍ଦ ରହିବ। ସେ କହିଛନ୍ତି, କାଉଡ଼ି ଯାତ୍ରା ସୁପରିଚାଳନା ଏବଂ ମହୋତ୍ସବ ସମୟରେ ଛାତ୍ର ଏବଂ କର୍ମଚାରୀଙ୍କ ଅସୁବିଧାକୁ ଏଡାଇବା ପାଇଁ ଏହି ନିଷ୍ପତ୍ତି ନିଆଯାଇଛି। ମିଶ୍ର ଚେତାବନୀ ଦେଇଛନ୍ତି ଯେ, ଯଦି ଏହି ସମୟ ମଧ୍ୟରେ କୌଣସି ଅନୁଷ୍ଠାନ ଖୋଲା ଥାଏ, ତେବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଡିଆଇଓଏସ୍ ରାଜେଶ କୁମାର କହିଛନ୍ତି, ଡିଏମ୍ ୧୬ରୁ ୨୩ ଜୁଲାଇ ପର୍ଯ୍ୟନ୍ତ ସମସ୍ତ ସ୍କୁଲରେ ଛୁଟି ଘୋଷଣା କରିବାକୁ ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି, କାଉଡ଼ି ଯାତ୍ରା କୁ ଦୃଷ୍ଟିରେ ରଖି ପରିଷଦ, ମାଧ୍ୟମିକ, ଡିଗ୍ରୀ ଏବଂ ବୈଷୟିକ ବୋର୍ଡର ଶିକ୍ଷାନୁଷ୍ଠାନ ବନ୍ଦ ରହିବ। ଏହି ନିର୍ଦ୍ଦେଶ ୟୁପି, ସିବିଏସଇ ଏବଂ ଆଇସିଏସଇ ବୋର୍ଡ ଦ୍ୱାରା ସ୍ୱୀକୃତିପ୍ରାପ୍ତ ସ୍କୁଲଗୁଡ଼ିକରେ ମଧ୍ୟ ଲାଗୁ ହେବ। ଏଠାରେ ମୌଳିକ ଶିକ୍ଷା ଅଧିକାରୀ ସନ୍ଦୀପ କୁମାର ସମସ୍ତ ପରିଷଦ ସ୍କୁଲରେ ଛୁଟି ଘୋଷଣା କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।
ପ୍ରତିବର୍ଷ ଶ୍ରାବଣ ମାସରେ ଆୟୋଜିତ କାଉଡ଼ି ଯାତ୍ରାରେ ବହୁ ସଂଖ୍ୟକ କାଉଡ଼ିଆ ଗଙ୍ଗା ନଦୀରୁ ପବିତ୍ର ଜଳ ନେଇ ଶିବ ମନ୍ଦିରରେ ଅର୍ପଣ କରିବା ପାଇଁ ପାଦରେ ଯାତ୍ରା କରନ୍ତି। କାଉଡ଼ିଆମାନଙ୍କ ଭିଡ଼ ତଥା ସୁରକ୍ଷାକୁ ଦୃଷ୍ଟିରେ ରଖି ପଶ୍ଚିମ ଉତ୍ତରପ୍ରଦେଶରେ ସୁରକ୍ଷା ବ୍ୟବସ୍ଥା କରାଯାଇଛି।