“ସାପ ଭଗବାନ ଶିବଙ୍କ ବେକକୁ ଶୋଭା ଦେଇଥାଏ”: ଖଡ଼ଗେଙ୍କ ସାପ ବୟାନର ଜବାବ ଦେଲେ ପ୍ରଧାନମନ୍ତ୍ରୀ
ନୂଆଦିଲ୍ଲୀ: କର୍ଣ୍ଣାଟକ ନିର୍ବାଚନ ପୂର୍ବରୁ ରାଜନୈତିକ ଦଳ ଜୋରଦାର ପ୍ରଚାର କରୁଛନ୍ତି। ପ୍ରଚାରରେ ପରସ୍ପର ବିରୁଦ୍ଧରେ ବୟାନବାଜି ଧରିଛି। କଂଗ୍ରେସ ସଭାପତି ମଲ୍ଲୀକାର୍ଜୁନ ଖଡ଼ଗେଙ୍କ ପ୍ରଧାନମନ୍ତ୍ରୀଙ୍କୁ ବିଷାକ୍ତ ସାପ କହିବା ପରେ ପକ୍ଷରୁ ଏହାର ଜୋରଦାର ବିରୋଧ କରାଯାଇଥିଲା। ଏହାରି ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି କର୍ଣ୍ଣାଟକର ନିର୍ବାଚନ ରାଜ୍ୟ କୋଲାରରେ ଏକ ସାଧାରଣ ସଭାରେ ସମ୍ବୋଧିତ କରିଛନ୍ତି। ଏଠାରେ ପ୍ରଧାନମନ୍ତ୍ରୀ ମୋଦୀ କଂଗ୍ରେସକୁ ତୀବ୍ର ଟାର୍ଗେଟ କରିଛନ୍ତି।
ମଲ୍ଲିକାର୍ଜୁନ ଖଡ଼ଗେଙ୍କ ‘ବିଷାକ୍ତ ସାପ’ ବୟାନରେ ପ୍ରଧାନମନ୍ତ୍ରୀ ନାଁ ନନେଇ କହିଛନ୍ତି, ‘ସାପ ହେଉଛି ଭଗବାନ ଶିବଙ୍କ ବେକରେ ଅଳଙ୍କାର। ମୋ ପାଇଁ ଦେଶର ଲୋକମାନେ ଭଗବାନ ଶିବଙ୍କ ପରି। ପ୍ରଧାନମନ୍ତ୍ରୀ କହିଛନ୍ତି ଯେ କର୍ଣ୍ଣାଟକର ଏହି ନିର୍ବାଚନ କେବଳ ୫ ବର୍ଷ ପାଇଁ ବିଧାୟକ, ମନ୍ତ୍ରୀ କିମ୍ବା ମୁଖ୍ୟମନ୍ତ୍ରୀ କରିବା ପାଇଁ ଏକ ନିର୍ବାଚନ ନୁହେଁ। ଆସନ୍ତା ୨୫ ବର୍ଷ ମଧ୍ୟରେ ଏକ ବିକଶିତ ଭାରତର ରୋଡମ୍ୟାପର ମୂଳଦୁଆକୁ ଦୃଢ କରିବା ପାଇଁ ଏହି ନିର୍ବାଚନ।
ପ୍ରଧାନମନ୍ତ୍ରୀ କହିଛନ୍ତି, ‘୨୦୧୪ପୂର୍ବରୁ, କଂଗ୍ରେସ ସରକାରରେ ଦୁର୍ନୀତି ସମୟରେ ବିଶ୍ୱ ଭାରତରୁ ସମସ୍ତ ଆଶା ଛାଡି ଦେଇଥିଲା। କିନ୍ତୁ ଆଜି ଭାରତର ପ୍ରତିଷ୍ଠା ଅଧିକ, ଅର୍ଥନୀତିର ଗତି ଦ୍ରୁତ ଏବଂ ବିଶ୍ୱ ଭାରତକୁ ଏକ ଉଜ୍ଜ୍ୱଳ ସ୍ଥାନ ବୋଲି କହୁଛି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ କର୍ଣ୍ଣାଟକର ବିକାଶରେ ଜେଡିଏସ ଏବଂ କଂଗ୍ରେସ ସବୁଠାରୁ ବଡ ପ୍ରତିବନ୍ଧକ। ଆଜି ଏଠାରେ ଏକତ୍ରିତ ହୋଇଥିବା ଜନତା ଏହି ଦୁଇ ପାର୍ଟିର ନିଦ ହଜାଇଦେବେ, ଏବଂ କର୍ଣ୍ଣାଟକର ଲୋକମାନେ ସେମାନଙ୍କୁ ଉଚିତ ଜବାବ ଦେବେ।
ପ୍ରଧାନମନ୍ତ୍ରୀ ତାଙ୍କର ଏହି ପ୍ରଚାର ସମୟରେ କର୍ଣାଟକବାସୀଙ୍କୁ ସୁନେଲି ସ୍ବପ୍ନ ଦେଖାଇବାକୁ ମଧ୍ୟ ଚେଷ୍ଟା କରିଥିଲେ। ଏବଂ ‘ଆଧୁନିକ ସଂଯୋଗୀକରଣ ପାଇଁ କାର୍ଯ୍ୟ କରୁଥିବା ଡବଲ ଇଞ୍ଜିନ ସରକାର ଏହି ସମଗ୍ର ଅଞ୍ଚଳରେ ନୂତନ ସମ୍ଭାବନା ସୃଷ୍ଟି କରିବ ବୋଲି କହିଥିଲେ। ସେହିପରି ବାଙ୍ଗାଲୋର-ଚେନ୍ନାଇ ଏକ୍ସପ୍ରେସୱେ ଉଭୟ କୃଷକ ଏବଂ ଶିଳ୍ପ ପାଇଁ ନୂତନ ସୁଯୋଗ ସୃଷ୍ଟି କରିବ, ବର୍ତ୍ତମାନ ଏହା ଉପରେ କାର୍ଯ୍ୟ ଚାଲିଥିବା ସେ କହିଛନ୍ତି।
