TCS ର ସେୟାର ବିକ୍ରି କରିବ ଟାଟା ସନ୍ସ, ୯୩୦୦ କୋଟି ଟଙ୍କାର ହେବ ବିଗ୍ ଡିଲ୍
ନୂଆଦିଲ୍ଲୀ: ଟାଟା ସନ୍ସ ଦେଶର ସର୍ବବୃହତ ସଫ୍ଟୱେର୍ କମ୍ପାନୀ ଟାଟା କନ୍ସଲ୍ଟାନ୍ସ ସର୍ଭିସେସ୍ (ଟିସିଏସ୍) ର ସେୟାର ବିକ୍ରୟ କରିବାକୁ ନିଷ୍ପତ୍ତି ନେଇଛି। ଟାଟା ସନ୍ସ ବ୍ଲକ୍ ଡିଲ୍ ଅନ୍ତର୍ଗତ ପ୍ରାୟ ୯୩୦୦ କୋଟିରେ TCS ର ୨.୩୪ କୋଟି ସେୟାର ବିକ୍ରି କରିବାକୁ ନିଷ୍ପତ୍ତି ନେଇଛି। TCS ର ପ୍ୟାରେଣ୍ଟ୍ କମ୍ପାନୀ ଟାଟା ସନ୍ସ ସେୟାର ପ୍ରତି ୪୦୦୧ ଟଙ୍କା ହାରରେ ଏହି ବଡ ଡିଲ୍ କରିବେ ବୋଲି ନିଷ୍ପତ୍ତି ନେଇଛନ୍ତି। ସଫ୍ଟୱେର୍ ରପ୍ତାନିକାରୀ TCS ରେ ପ୍ୟାରେଣ୍ଟ କମ୍ପାନୀ ୭୨.୩୮ ପ୍ରତିଶତ ଅଂଶଧନ ଧାରଣ କରିଛି। ଗତ ଏକ ବର୍ଷରେ TCS ସେୟାର ୩୦ ପ୍ରତିଶତରୁ ଅଧିକ ବୃଦ୍ଧି ପାଇଛି।
ବ୍ଲୁମବର୍ଗ ରିପୋର୍ଟ ଅନୁଯାୟୀ, ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆର ନୂତନ ନିୟମ ଅନୁଯାୟୀ ଟାଟା ସନ୍ସ ଷ୍ଟକ୍ ଏକ୍ସଚେଞ୍ଜରେ ତାଲିକାଭୁକ୍ତ ହେବ। TCS ର ଏହି ବ୍ଲକ୍ ଡିଲ୍ ହେତୁ ଟାଟା ଗ୍ରୁପ୍ ପାଇଁ ଟାଟା ସନ୍ସର ସର୍ବସାଧାରଣ ବଜାର ତାଲିକାକୁ ଏଡ଼ାଇବା ସହଜ ହେବ। ଆରବିଆଇ ନିୟମ ଅନୁଯାୟୀ, ସମସ୍ତ ବଡ ଅଣ ବ୍ୟାଙ୍କିଙ୍ଗ ଫାଇନାନ୍ସ କମ୍ପାନୀଗୁଡିକ (NBFCs) କୁ ଷ୍ଟକ୍ ଏକ୍ସଚେଞ୍ଜରେ ତାଲିକାଭୁକ୍ତ କରିବାକୁ ପଡିବ। ଟାଟା ସନ୍ସ ମଧ୍ୟ ଏହି ବର୍ଗରେ ଅଛନ୍ତି।
ସୋମବାର, ବମ୍ବେ ଷ୍ଟକ୍ ଏକ୍ସଚେଞ୍ଜ (BSE) ରେ TCS ସେୟାରଗୁଡିକ ସେମାନଙ୍କର ସର୍ବକାଳୀନ ଉଚ୍ଚ ହାରରେ ୪୨୫୪.୪୫ ଟଙ୍କା ପହଞ୍ଚିଛି। ତେବେ ଦିନ ଶେଷରେ ଏହା ୧.୭ ପ୍ରତିଶତ ହ୍ରାସ ପାଇ ୪୧୪୪.୭୫ ଟଙ୍କା ରେ କ୍ଲୋଜିଂଗ ହୋଇଥିଲା। TCS ର ବଜାର ମୂଲ୍ୟ ୧୫ ଟ୍ରିଲିୟନ ଟଙ୍କା। ବଜାର ମୂଲ୍ୟ ଦୃଷ୍ଟିରୁ ଏହା କେବଳ ରିଲାଏନ୍ସ ଇଣ୍ଡଷ୍ଟ୍ରିଜ୍ ପଛରେ ଅଛି। ସୋମବାର କ୍ଲୋଜିଂଗ ହାର ଠାରୁ ଟାଟା ସନ୍ସ ୩.୬ ପ୍ରତିଶତ ରିହାତି ମୂଲ୍ୟରେ ଏହି ବଡ ଡିଲ୍ କରିବାକୁ ଯାଉଛି।
