TV Serialରୁ ମିଳିଲା ହତ୍ୟାର ଫର୍ମୁଲା: ଗଙ୍ଗାଜଳ ଦେଇ ଜୀବନ ନେଇଗଲା ତାନ୍ତ୍ରିକ

ନୂଆଦିଲ୍ଲୀ: ମଣିଷର ମୃତ୍ୟୁ ସମୟରେ ଗଙ୍ଗାଜଳ ଦେଲେ ଆତ୍ମା ଶାନ୍ତି ପାଏ ବୋଲି କୁହାଯାଏ । କିନ୍ତୁ ବର୍ତ୍ତମାନ ଏହି ଗଙ୍ଗାଜଳ ହିଁ ସାଜିଛି ମୃତ୍ୟୁର କାରଣ ।

ଟିଭି ସିରିଏଲରୁ ମର୍ଡର ଫର୍ମୁଲା ପାଇ ୨ ଜଣଙ୍କୁ ହତ୍ୟା କରିଛି ତାନ୍ତ୍ରିକ । କିନ୍ତୁ ତୃତୀୟ ଶିକାର କରିବା ପୂର୍ବରୁ ଧରା ପଡ଼ିଛି ସିରିଏଲ କିଲର । ଗଙ୍ଗାଜଳରେ ଜହର ମିଶାଇ ଜୀବନ ନେଇ ଯାଉଥିଲା ସୁଖୱନ୍ତ ସାହୁ ।

କ’ଣ ଥିଲା ପୂରା ମାମଲା?

ଟିଭି ସିରିଏଲ ଦେଖି ଭୟଙ୍କର ଜହର ସାଇନାଇଡର ବ୍ୟବହାର ବିଷୟରେ ଜାଣିବାକୁ ପାଇଥିଲା ତାନ୍ତ୍ରିକ ସୁଖୱନ୍ତ ସାହୁ । ଏହାପରେ ଲୋକଙ୍କ ସମସ୍ୟା ଦୂର କରିବାର ଲୋଭ ଦେଖାଇ ସେମାନଙ୍କଠୁ ଟଙ୍କା ହଡ଼ପ କରିବା ଆରମ୍ଭ କରିଥିଲା ।

ଟଙ୍କା ପାଇସାରିବା ପରେ ନକଲି ପୂଜା-ପାଠ କରି ପ୍ରସାଦରେ ସାଇନାଇଡ ମିଶା ଗଙ୍ଗାଜଳ ଦେଉଥିଲା । ଫଳରେ ପୂଜା କରିବାକୁ ଆସିଥିବା ଲୋକ ପ୍ରାଣ ହରାଇଛନ୍ତି ।

୨ ଜଣଙ୍କୁ ହତ୍ୟା: ଅଭିଯୁକ୍ତ ତାନ୍ତ୍ରିକ ହଂସରାଜ ନାମକ ଜଣେ ବ୍ୟକ୍ତିଙ୍କ ଘରେ ପୂଜା ପାଇଁ ପହଞ୍ଚିଥିଲା । ପୂଜା ପାଠ ପରେ ଗଙ୍ଗାଜଳରେ ସାଇନାଇଡ ମିଶାଇ ପିଇବାକୁ ଦେଇଥିଲା ସୁଖୱନ୍ତ ସାହୁ । ଫଳରେ ହଂସରାଜଙ୍କର ମୃତ୍ୟୁ ହୋଇଥିଲା । କିନ୍ତୁ ପୋଷ୍ଟମର୍ଟମରେ ମୃତ୍ୟୁର କାରଣ ହୃଦଘାତ ବୋଲି ଜାଣିବାକୁ ମିଳିଛି । ଏହାପରେ ନରେନ୍ଦ୍ର ନାମକ ଜଣେ ବ୍ୟକ୍ତି ମଧ୍ୟ ତାନ୍ତ୍ରିକର ଶିକାର ପାଲଟିଛନ୍ତି ।

ଧରା ପକାଇ ଦେଲା ମତଭେଦ: ତାନ୍ତ୍ରିକ ସୁଖୱନ୍ତ ସାହୁ ଏବଂ ସାଥୀ ବିରେନ୍ଦ୍ରଙ୍କ ମଧ୍ୟରେ ଟଙ୍କା ଭାଗବଣ୍ଟାକୁ ନେଇ ବିବାଦ ହେବାରୁ ମାମଲା ସାମନାକୁ ଆସିଛି ।

ଉଭୟଙ୍କ ମଧ୍ୟରେ ପାଟିତୁଣ୍ଡ ପରେ ସୁଖୱନ୍ତ ସାଥୀ ବିରେନ୍ଦ୍ରଙ୍କୁ ପଥରରେ ଛେଚି ହତ୍ୟା କରିଛି । ତେବେ ପୋଲିସ ମାମଲାର ଛାନଭିନ କରୁଥିବା ବେଳେ ସମସ୍ତ ମାମଲା ସାମନାକୁ ଆସିଛି । ପଚରାଉଚରା ପରେ ନକଲି ତାନ୍ତ୍ରିକ ସୁଖୱନ୍ତ ଦୋଷ ସ୍ୱୀକାର କରିବା ସହ ସମସ୍ତ ମାମଲା ଉପରୁ ପରଦା ଉଠାଇଛି ପୋଲିସ ।