ମହଙ୍ଗା ପିଆଜରୁ ମିଳିବ ମୁକ୍ତି: କାଲିଠୁ ୨୫ ଟଙ୍କାରେ ପିଆଜ ବିକ୍ରି ପାଇଁ ସରକାର ନେଲେ ବଡ଼ ପଦକ୍ଷେପ, ଓଡ଼ିଶାରେ ମଧ୍ୟ…

ନୂଆଦିଲ୍ଲୀ: ପିଆଜର ବଢ଼ୁଥିବା ମୂଲ୍ୟକୁ ନିୟନ୍ତ୍ରଣ କରିବା ପାଇଁ ସରକାର ଏକ ବଡ ପଦକ୍ଷେପ ନେଇଛନ୍ତି । ବଫର୍ ଷ୍ଟକରୁ ଗତ ତିନି ସପ୍ତାହ ମଧ୍ୟରେ ୧୨ ଟି ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ହୋଲସେଲ ବଜାରରେ ବିକ୍ରୟ ପାଇଁ ସରକାର ୩୬,୨୫୦ ଟନ୍ ପିଆଜ ଜାରି କରିଛନ୍ତି । ନ୍ୟାସନାଲ କୋଅପରେଟିଭ୍ କଞ୍ଜ୍ୟୁମର ଫେଡେରେସନ୍ ଅଫ୍ ଇଣ୍ଡିଆ ଲିମିଟେଡ୍ (ଏନସିସିଏଫ୍) ଏବଂ ନ୍ୟାସନାଲ ଏଗ୍ରିକଲ୍ଚର କୋଅପରେଟିଭ ମାର୍କେଟିଂ ଫେଡେରେସନ୍ ଅଫ୍ ଇଣ୍ଡିଆ ଲିମିଟେଡ୍ (ଏନଇଏଫଇଡି) କୁ ହୋଲସେଲ ଏବଂ ଖୁଚୁରା ବଜାରରେ ବଫର ପିଆଜ ବିକ୍ରି କରିବାକୁ ନିର୍ଦ୍ଦେଶ ଦିଆଯାଇଛି ।

ଏନସିସିଏଫ ଏବଂ ଏନଇଏଫଇଡିରୁ ବଫର ଷ୍ଟକର ତିନି ଲକ୍ଷ ଟନରୁ ୫ ଲକ୍ଷ ଟନକୁ ବୃଦ୍ଧି କରିବା ପାଇଁ ମଧ୍ୟ କୃଷକମାନଙ୍କଠାରୁ ଅତିରିକ୍ତ ପିଆଜ କିଣିବାକୁ କୁହାଯାଇଥିଲା । ଗ୍ରାହକ ବ୍ୟାପାର ସଚିବ ରୋହିତ କୁମାର ସିଂ କହିଛନ୍ତି ଯେ, ହୋଲସେଲ ଏବଂ ଖୁଚୁରା ବଜାରରେ ବଫର ଷ୍ଟକରୁ ପିଆଜ ଛାଡି ସରକାର ମୂଲ୍ୟ ବୃଦ୍ଧିକୁ ବନ୍ଦ କରିବାକୁ ଚାହୁଁଛନ୍ତି । ସେ କହିଛନ୍ତି ଯେ, ଅଗଷ୍ଟ ୧୧ ତାରିଖରୁ ହୋଲସେଲ ବଜାରରେ ମୋଟ ୩୫,୨୫୦ ଟନ୍ ବଫର ପିଆଜ ଜାରି କରାଯାଇଛି । ଏନସିସିଏଫ୍ ୧୨ ଟି ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ (ୟୁଟି) କୁ ୨୧,୭୫୦ ଟନ୍ ପିଆଜ ଜାରି କରିଛି ।

ସେ କହିଛନ୍ତି ଯେ, ଏହି ୧୨ ଟି ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ମଧ୍ୟରେ ଦିଲ୍ଲୀ, ଆନ୍ଧ୍ରପ୍ରଦେଶ, ଆସାମ, ତେଲେଙ୍ଗାନା, ହିମାଚଳ ପ୍ରଦେଶ, ଓଡ଼ିଶା, ପଞ୍ଜାବ, ପଶ୍ଚିମବଙ୍ଗ, କର୍ଣ୍ଣାଟକ, ତାମିଲନାଡୁ, ଚଣ୍ଡିଗଡ଼ ଏବଂ କେରଳ ସାମିଲ ରହିଛି । ଖୁଚୁରା ବଜାରରେ ପ୍ରଚଳିତ ହାରରେ ବଫର ଷ୍ଟକରୁ ପିଆଜ ମୁକ୍ତ କରାଯାଉଥିବାବେଳେ ଖୁଚୁରା ବଜାରରେ କିଲୋଗ୍ରାମ ପିଛା ୨୫ ଟଙ୍କା ମୂଲ୍ୟରେ ରିହାତି ଦିଆଯାଉଛି । ସଚିବ କହିଛନ୍ତି ଯେ, ଏହି ଦୁଇଟି ସମବାୟ ସମିତି ଆଗାମୀ ଦିନରେ ଦିଲ୍ଲୀର ମୋବାଇଲ୍ ଭ୍ୟାନ୍ ଏବଂ ମନୋନୀତ ସ୍ଥାନ ମାଧ୍ୟମରେ ବଫର୍ ପିଆଜର ଖୁଚୁରା ବିକ୍ରି ବୃଦ୍ଧି କରିବ ।