ଆଜି ଭୁବନେଶ୍ୱରରେ ଆୟୋଜିତ ହେବ ନିଯୁକ୍ତି ମେଳା, ପ୍ରାର୍ଥୀଙ୍କ ପାଇଁ ବଡ଼ ସୁଯୋଗ
ଭୁବନେଶ୍ୱର(ଓଡ଼ିଶା ଭାସ୍କର): ସମସ୍ତ ଚାକିରି ଆଶାୟୀଙ୍କ ପାଇଁ ଏକ ଖୁସି ଖବର । ଆଜି ଭୁବନେଶ୍ୱରଠାରେ ଆୟୋଜିତ ହେବ ନିଯୁକ୍ତି ମେଳା । ଦିବ୍ୟାଙ୍ଗଙ୍କ ପାଇଁ ଜାତୀୟ କ୍ୟାରିୟର ସେବା କେନ୍ଦ୍ର (ଏନସିଏସସିଡିଏ), ଭୁବନେଶ୍ୱରଠାରେ ସକାଳ ୯ଟାରୁ ଦିନ ୨ଟା ପର୍ଯ୍ୟନ୍ତ ଏହି ନିଯୁକ୍ତି ମେଳା ଚାଲିବ । ଏହି ନିଯୁକ୍ତି ମେଳାରେ ୧୮ରୁ ୩୫ ବର୍ଷର ପ୍ରାର୍ଥୀମାନେ ଭାଗନେଇପାରିବେ । ଦଶମରୁ କମ୍ ଓ ତା’ଠାରୁ ଅଧିକ ଶିକ୍ଷାଗତ ଯୋଗ୍ୟତା ଥିବା ଭିନ୍ନକ୍ଷମମାନେ ଏଥିରେ ସାମିଲ ହୋଇପାରିବେ ।
ବିକ୍ରୟ କାର୍ଯ୍ୟନିର୍ବାହୀ, ପରୀକ୍ଷା ନିୟନ୍ତ୍ରଣକାରୀ, ବିତରଣ କାର୍ଯ୍ୟନିର୍ବାହୀ, ଫ୍ରଣ୍ଟ ଲାଇନ୍ ଅଧିକାରୀ, ଟେକ୍ନିସିଆନ ଆଦି ପଦବୀ ପାଇଁ ଅଷ୍ଟମ ଶ୍ରେଣୀ ଠାରୁ ଅଧିକ ଯୋଗ୍ୟ ଥିବା ପ୍ରାର୍ଥୀମାନେ ଏଥିରେ ଭାଗ ନେଇପାରିବେ । ପ୍ରାର୍ଥୀଙ୍କର ବୟସ ୧୮ରୁ ୩୫ ବର୍ଷ ମଧ୍ୟରେ ଥିବା ଆବଶ୍ୟକ । ପ୍ରାର୍ଥୀମାନେ ବାୟୋଡାଟା, ଆଧାର କାର୍ଡ, ଫଟୋଗ୍ରାଫ, ଭିନ୍ନକ୍ଷମ ପ୍ରମାଣପତ୍ର ସାଙ୍ଗରେ ନେଇ ଆସିବାକୁ କୁହାଯାଇଛି ।
ସୂଚନା ଯୋଗ୍ୟ ଯେ, ଏହା ପୂର୍ବରୁ ମଧ୍ୟ ରାଜଧାନୀରେ ଅନେକ ଥର ନିଯୁକ୍ତି ମେଳାର ଆୟୋଜନ କରାଯାଇଥିଲା । ଗତ ବର୍ଷ ନଭେମ୍ବର ମାସ ୨୨ ତାରିଖରେ ମଧ୍ୟ ଏକ ନିଯୁକ୍ତି ମେଳାର ଆୟୋଜନ ହୋଇଥିଲା । ସେ ସମୟରେ ୩ ଶହରୁ ଅଧିକ ଆଶାୟୀଙ୍କୁ ନିଯୁକ୍ତି ମିଳିଥିଲା । ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନିଯୁକ୍ତି ମେଳା ବାଧ୍ୟମରେ ଦେଶରେ ଲକ୍ଷ ଲକ୍ଷ ଆଶାୟୀଙ୍କୁ ଚାକିରି ଦେବାକୁ ଲକ୍ଷ୍ୟ ରଖିଛନ୍ତି ।
