୧ ବର୍ଷ ଧରି ମା’ଙ୍କ ମୃତଶରୀର ସହ ରହୁଥିଲେ ଦୁଇ ଝିଅ: କାରଣ ଜାଣି ହୋଇଯିବେ ଆଶ୍ଚର୍ଯ୍ୟ
ଉତ୍ତରପ୍ରଦେଶ: ମା’ଙ୍କ ମୃତଦେହ ସହ ୧ ବର୍ଷ ବିତାଇଛନ୍ତି ଦୁଇ ଝିଅ । ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଘଟଣାଟି ସତ । ଘଟଣାଟି ଘଟିଛି ଉତ୍ତରପ୍ରଦେଶର ବାରାଣାସୀ ଜିଲ୍ଲାରେ । ରିପୋର୍ଟ ଅନୁଯାୟୀ ସେମାନଙ୍କ ମା’ଙ୍କର ପ୍ରାୟ ଏକ ବର୍ଷ ପୂର୍ବେ ମୃତ୍ୟୁ ହୋଇଥିଲା । ତେବେ ଏତେ ଦିନ ଧରି ଏକ ମୃତଦେହ ସହ ଦୁହେଁ କିପରି ରହୁଥିଲେ ତାହା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଛି ।
ତେବେ ଅନେକ ଦିନ ଧରି ସେମାନଙ୍କ ପଡ଼ୋଶୀମାନେ ସେମାନଙ୍କୁ ଦେଖିବାକୁ ପାଇ ନଥିଲେ । ଏହା ସହିତ ଅନେକ ଦିନ ସେମାନଙ୍କ ଘରର କବାଟ ବନ୍ଦ ଥିବା ମଧ୍ୟ ଦେଖି ପଡ଼ୋଶୀମାନେ ସନ୍ଦେହ କରିଥିଲେ । ସେମାନେ ଦୁଇ ଭଉଣୀଙ୍କର ସମ୍ପର୍କୀୟଙ୍କୁ ସୂଚନା ଦେଇଥିଲେ । ତେବେ ସମ୍ପର୍କୀୟମାନେ ସେମାନଙ୍କ ଘରେ ପହଞ୍ଚି ସମସ୍ତ ଘଟଣା ଜାଣିବାକୁ ପାଇଥିଲେ । ଘଟଣା ବିଷୟରେ ପୋଲିସକୁ ସୂଚନା ଦେଇଥିଲେ। ପୋଲିସ ଘରେ ପହଞ୍ଚି ମହିଳାଙ୍କ ମୃତଦେହ ଉଦ୍ଧାର କରିଥିଲା । ଏଥି ସହିତ ଦୁଇ ଭଉଣୀ ପଲ୍ଲବୀ ତ୍ରିପାଠି (୨୭) ଏବଂ ବୈଷ୍ଣବୀ ତ୍ରିପାଠି (୧୭)ଙ୍କୁ ମଧ୍ୟ ସେଠାରୁ ଉଦ୍ଧାର କରିଥିଲା ।
ପୋଲିସର ସୂଚନାନୁସାରେ, ଉଷା ଦେବୀ (୫୨) ନାମକ ଉକ୍ତ ମହିଳାଙ୍କର ଡିସେମ୍ବର ୮, ୨୦୨୨ ରେ ମୃତ୍ୟୁ ଘଟିଥିଲା । କିନ୍ତୁ ଆର୍ଥିକ ପ୍ରତିବନ୍ଧକ କାରଣରୁ ଦୁଇ ଭଉଣୀ ମା’ଙ୍କର ଶୁଦ୍ଧିକ୍ରିୟା କରିପାରି ନଥିଲେ । ସେହି କାରଣରୁ ତାଙ୍କ ମୃତଦେହ ସହିତ ଗୋଟିଏ ଘରେ ସେମାନେ ରହୁଥିଲେ। ଏପରିକି ଶରୀରର ଦୁର୍ଗନ୍ଧକୁ କମ କରିବା ପାଇଁ ଧୂପକାଠି ଜାଳି ଦେଉଥିଲେ ବୋଲି ପୋଲିସ କହିଛି।
ଦୁଇ ବର୍ଷ ପୂର୍ବେ ମହିଳାଙ୍କ ସ୍ୱାମୀ ଘରୁ ବାହାରି ଯାଇଥିଲେ । ଏପରିକି ପତ୍ନୀଙ୍କ ମୃତ୍ୟୁ ପରେ ମଧ୍ୟ ସେ ଘରକୁ ଆସିନଥିଲେ ବୋଲି ପୋଲିସ ସୂଚନା ଦେଇଛି। ତେବେ ମୃତଦେହ ଉଦ୍ଧାର ହେବା ପରେ ପୋଲିସ ଦୁଇ ଭଉଣୀଙ୍କୁ ଗିରଫ କରି ଘଟଣାର ତଦନ୍ତ ଜାରି ରହିଛି।
