ହାତରେ ହାତକଡ଼ି, ତଳେ ପକାଇଲେ…ନ୍ୟୁଆର୍କ ବିମାନବନ୍ଦରରେ ଭାରତୀୟ ଛାତ୍ରଙ୍କ ସହ ଅମାନବୀୟ ବ୍ୟବହାର ? ଭାରତ ଦେଲା ଏପରି ପ୍ରତିକ୍ରିୟା
ଆମେରିକାର ନ୍ୟୁଆର୍କ ବିମାନବନ୍ଦରରେ ଜଣେ ଭାରତୀୟ ଛାତ୍ରଙ୍କ ସହ ଅମାନବୀୟ ବ୍ୟବହାରର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଭିଡିଓରେ ଦେଖାଯାଇଛି ଯେ, ଛାତ୍ରଙ୍କୁ ହାତକଡ଼ି ପକାଇ ତଳେ ପକାଯାଇଛି ଏବଂ ଅପରାଧୀ ଭଳି ବ୍ୟବହାର କରାଯାଇଛି। ଏହି ଘଟଣା ଆମେରିକାରେ ଭାରତୀୟମାନଙ୍କ ପ୍ରତି ବିଭେଦମୂଳକ ମନୋଭାବ ଉପରେ ପ୍ରଶ୍ନ ଉଠାଇଛି। ଭାରତୀୟ ଦୂତାବାସ ଏହି ମାମଲାରେ ହସ୍ତକ୍ଷେପ କରି ସ୍ଥାନୀୟ ଅଧିକାରୀଙ୍କ ସହ ଯୋଗାଯୋଗ କରୁଛି।
ଏହି ଘଟଣା ଆମେରିକାରେ କଡ଼ା ଇମିଗ୍ରେସନ ନୀତି ବିରୋଧରେ ଚାଲିଥିବା ବିକ୍ଷୋଭ ମଧ୍ୟରେ ଘଟିଛି, ଯାହା ଲୋକଙ୍କ ମଧ୍ୟରେ ଅସନ୍ତୋଷକୁ ଆହୁରି ବୃଦ୍ଧି କରିଛି। ଭାରତୀୟ-ଆମେରିକୀୟ ଉଦ୍ୟୋଗୀ କୁଣାଲ ଜୈନ ଏହି ଘଟଣାର ଭିଡିଓ ସୋସିଆଲ ମିଡିଆ ପ୍ଲାଟଫର୍ମ X ରେ ସେୟାର କରି ଭାରତୀୟ ଦୂତାବାସ ଓ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କରଙ୍କୁ ହସ୍ତକ୍ଷେପ କରିବାକୁ ଅନୁରୋଧ କରିଛନ୍ତି।
ଜୈନ କହିଛନ୍ତି, “ମୁଁ ଜଣେ ଯୁବ ଭାରତୀୟ ଛାତ୍ରଙ୍କୁ ନ୍ୟୁଆର୍କ ବିମାନବନ୍ଦରରୁ ନିର୍ବାସିତ ହେଉଥିବା ଦେଖିଲି। ତାଙ୍କୁ ହାତକଡ଼ି ପକାଯାଇଥିଲା, ସେ କାନ୍ଦୁଥିଲେ ଓ ଅପରାଧୀ ଭଳି ବ୍ୟବହାର କରାଯାଉଥିଲା। ସେ ସ୍ୱପ୍ନ ପୂରଣ କରିବାକୁ ଆସିଥିଲେ, କାହାରି କ୍ଷତି କରିବାକୁ ନୁହେଁ। ଜଣେ ଏନଆରଆଇ ଭାବେ ମୁଁ ନିଜକୁ ଅସହାୟ ଓ ଦୁଃଖୀ ଅନୁଭବ କଲି। ଏହା ଏକ ମାନବୀୟ ତ୍ରାସଦୀ।”
ଜୈନଙ୍କ ଅନୁଯାୟୀ, ଛାତ୍ରଜଣକ ହରିୟାଣାରୁ ଥିବା ସମ୍ଭବ ଓ ସେ ବାରମ୍ବାର କହୁଥିଲେ, “ମୁଁ ପାଗଳ ନୁହେଁ, ସେମାନେ ମୋତେ ପାଗଳ ବୋଲି ପ୍ରମାଣ କରିବାକୁ ଚେଷ୍ଟା କରୁଛନ୍ତି।” ସେ ଦାବି କରିଛନ୍ତି ଯେ ଏଭଳି ଘଟଣା ଏବେ ସାଧାରଣ ହୋଇପଡ଼ିଛି, ଯେଉଁଠାରେ ଛାତ୍ରମାନେ ଭିଜା ନେଇ ଆମେରିକା ଆସୁଛନ୍ତି, କିନ୍ତୁ ଇମିଗ୍ରେସନ ଅଧିକାରୀଙ୍କୁ ନିଜ ଯାତ୍ରାର କାରଣ ବୁଝାଇ ପାରୁନାହାନ୍ତି। ଫଳରେ, ସେମାନଙ୍କୁ ଅପରାଧୀ ଭଳି ହାତକଡ଼ି ପକାଇ ସନ୍ଧ୍ୟାର ଉଡ଼ାଣରେ ଭାରତକୁ ଫେରାଇ ଦିଆଯାଉଛି। ଜୈନ କହିଛନ୍ତି ଯେ ପ୍ରତିଦିନ ୩-୪ଟି ଏଭଳି ମାମଲା ଘଟୁଛି।
ନ୍ୟୁୟର୍କରେ ଥିବା ଭାରତୀୟ କନସୁଲେଟ ଏହି ଘଟଣାକୁ ଗମ୍ଭୀରତାର ସହ ନେଇଛି। ସେମାନେ ଜଣାଇଛନ୍ତି ଯେ, ସୋସିଆଲ ମିଡିଆରେ ଏକ ଭାରତୀୟ ନାଗରିକଙ୍କୁ ନ୍ୟୁଆର୍କ ଲିବର୍ଟି ଇଂଟରନ୍ୟାସନାଲ ବିମାନବନ୍ଦରରେ ଅସୁବିଧାର ସମ୍ମୁଖୀନ ହେବା ସମ୍ପର୍କିତ ପୋଷ୍ଟ ଦେଖିଛନ୍ତି। କନସୁଲେଟ ସ୍ଥାନୀୟ ଅଧିକାରୀଙ୍କ ସହ ଯୋଗାଯୋଗରେ ରହିଛି ଏବଂ ଭାରତୀୟ ନାଗରିକଙ୍କ କଲ୍ୟାଣ ପାଇଁ ସବୁବେଳେ ପ୍ରତିବଦ୍ଧ ଅଛି।
ଏହି ଘଟଣା ଆମେରିକାରେ କଡ଼ା ଇମିଗ୍ରେସନ ନୀତି ଏବଂ ନିର୍ବାସନ ନୀତିକୁ ନେଇ ଚର୍ଚ୍ଚାକୁ ଜୋରଦାର କରିଛି। ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ବାସନ ନୀତି ଅଧୀନରେ ଅନେକ ଭାରତୀୟଙ୍କୁ ଅପରାଧୀ ଭଳି ହାତକଡ଼ି ଓ ଗୋଡ଼ରେ ବେଢ଼ି ପକାଇ ଫେରାଇ ଦିଆଯାଉଥିବା ଅଭିଯୋଗ ଉଠିଛି। ୨୦୨୪ରେ ପ୍ରାୟ ୧୫୦୦ରୁ ଅଧିକ ଭାରତୀୟଙ୍କୁ ଆମେରିକାରୁ ନିର୍ବାସିତ କରାଯାଇଥିବା ଅନୁମାନ କରାଯାଉଛି।
ଭାରତୀୟ-ଆମେରିକୀୟ ଉଦ୍ୟୋଗୀ କୁଣାଲ ଜୈନ ଏହି ଘଟଣାର ଭିଡିଓ ସୋସିଆଲ ମିଡିଆ ପ୍ଲାଟଫର୍ମ X ରେ ସେୟାର କରିବା ପରେ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଅନେକ ବ୍ୟବହାରକାରୀ ମନ୍ତବ୍ୟ କରି କହିଛନ୍ତି ଯେ ଏଭଳି ଅମାନବୀୟ ବ୍ୟବହାର ଆମେରିକାର ବିଭିନ୍ନ ସ୍ଥାନରେ ସାଧାରଣ ହୋଇପଡ଼ିଛି। ଅଧିକାରୀମାନେ ନାଗରିକଙ୍କ କଥା ନ ଶୁଣି ଅଯଥା ଦୁର୍ବ୍ୟବହାର କରୁଛନ୍ତି। ଜଣେ ବ୍ୟବହାରକାରୀ ଲେଖିଛନ୍ତି, “ଏହା କେବଳ ନ୍ୟୁଆର୍କରେ ନୁହେଁ, ଅନେକ ବିମାନବନ୍ଦରରେ ଭାରତୀୟଙ୍କୁ ଅପମାନିତ କରାଯାଉଛି।”