ବ୍ୟକ୍ତିଗତ ଭାବରେ ଚାଇଲ୍ଡ ପୋର୍ଣ୍ଣୋଗ୍ରାଫୀ ଦେଖିବା ଡାଉନଲୋଡ୍ କରିବା ଅପରାଧ ନୁହେଁ: ହାଇକୋର୍ଟ କହିଲେ କେବେ ଧରାଯିବ ଅପରାଧ
ନୂଆଦିଲ୍ଲୀ: ମାଡ୍ରାସ ହାଇକୋର୍ଟ ନିକଟରେ ହୋଇଥିବା ଏକ ନିଷ୍ପତ୍ତିରେ କହିଛନ୍ତି ଯେ, ଯଦି ଜଣେ ବ୍ୟକ୍ତି ତାଙ୍କ ମୋବାଇଲ୍, ଲାପଟପ୍ କିମ୍ବା କୌଣସି ବ୍ୟକ୍ତିଗତ ଇଲେକ୍ଟ୍ରୋନିକ୍ ଉପକରଣରେ ଚାଇଲ୍ଡ ପୋର୍ଣ୍ଣୋଗ୍ରାଫୀ ଡାଉନଲୋଡ୍ କରନ୍ତି କିମ୍ବା ଦେଖନ୍ତି, ତେବେ ସେହି କାର୍ଯ୍ୟ ପୋକ୍ସୋ ଆକ୍ଟ କିମ୍ବା ଆଇଟି ଆକ୍ଟ ଅନୁଯାୟୀ ଅପରାଧ ଭାବରେ ବିବେଚନା କରାଯିବ ନାହିଁ ।
ଜଷ୍ଟିସ୍ ଏନ ଆନନ୍ଦ ଭେଙ୍କଟେଶ ଏହି ମନ୍ତବ୍ୟ ସହିତ ହରିଶ ନାମକ ବ୍ୟକ୍ତିଙ୍କ ବିରୋଧରେ ପୋକ୍ସୋ ଆକ୍ଟ ଏବଂ ଆଇଟି ଆକ୍ଟ ଅନୁଯାୟୀ ଆରମ୍ଭ ହୋଇଥିବା ପ୍ରକ୍ରିୟାକୁ ରଦ୍ଧ କରିଛନ୍ତି । ନିଜ ମୋବାଇଲ୍ ଫୋନରେ ଦୁଇଟି ଚାଇଲ୍ଡ ପୋର୍ଣ୍ଣୋଗ୍ରାଫୀ ଭିଡିଓ ଡାଉନଲୋଡ୍ ଏବଂ ଦେଖିବାକୁ ନେଇ ହରିଶଙ୍କ ଉପରେ ଅଭିଯୋଗ ହୋଇଥିଲା ଏବଂ ଏହି ମାମଲାରେ ତାଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା । ଜଷ୍ଟିସ ଭେଙ୍କଟେଶ ତାଙ୍କ ନିଷ୍ପତ୍ତିରେ ସ୍ପଷ୍ଟ ଭାବରେ କହିଛନ୍ତି ଯେ, କେବଳ ପିଲାମାନଙ୍କ ସହ ଜଡିତ ଅଶ୍ଳୀଳ ଭିଡିଓ ଡାଉନଲୋଡ୍ କରିବା ଏବଂ ବ୍ୟକ୍ତିଗତ ଭାବରେ ଦେଖିବା ଅପରାଧ ହୋଇପାରିବ ନାହିଁ ।
ତେବେ ବିଚାର ଶେଷ ହେବା ପରେ ଯୁବପିଢ଼଼ିଙ୍କ ମଧ୍ୟରେ ଅଶ୍ଳୀଳ ନିଶା ବୃଦ୍ଧି ପାଇ କୋର୍ଟ ଚିନ୍ତା ପ୍ରକଟ କରିଛନ୍ତି । ଏହି ସମସ୍ୟାର ମୁକାବିଲା ପାଇଁ ଜଷ୍ଟିସ ଭେଙ୍କଟେଶ ଏକ ସ୍ପଷ୍ଟ ଦୃଷ୍ଟିକୋଣ ପାଇଁ ଆହ୍ୱାନ ଦେଇଛନ୍ତି । ସେ ଲେଖିଛନ୍ତି, ” ଜେନେରେସନ୍ ଜେଡର ପିଲାମାନେ ଏହି ଗୁରୁତର ସମସ୍ୟା ସହ ସଂଘର୍ଷ କରୁଛନ୍ତି । ସେମାନଙ୍କୁ ଦଣ୍ଡ ଦେବା ପରିବର୍ତ୍ତେ ସମାଜ ସେମାନଙ୍କୁ ଉପଯୁକ୍ତ ଶିକ୍ଷା ଏବଂ ସଚେତନତା ଦେବାରେ ପରିପକ୍ୱତା ପ୍ରଦର୍ଶନ କରିବା ଉଚିତ ଯାହା ଦ୍ୱାରା ସେମାନେ ଏହି ଖରାପ ନିଶା ରୁ ବାହାରି ପାରିବେ ।”
ହାଇକୋର୍ଟ କହିଛନ୍ତି ଯେ ହରିଶ ସ୍ୱୀକାର କରିଛନ୍ତି ଯେ ତାଙ୍କୁ ପୋର୍ଣ୍ଣୋଗ୍ରାଫୀର ଅଭ୍ୟାସ ପଡ଼ିଯାଇଛି, କିନ୍ତୁ ସେ କେବେବି ଚାଇଲ୍ଡ ପୋର୍ଣ୍ଣୋଗ୍ରାଫୀ ଦେଖି ନାହାଁନ୍ତି । କୋର୍ଟ କହିଛନ୍ତି ଯେ ହରିଶ ଅନ୍ୟ କାହାକୁ ଅଶ୍ଳୀଳ ଭିଡିଓ ସେୟାର କରିନାହାଁନ୍ତି । ଅଦାଲତ ଏହା ସ୍ପଷ୍ଟ କରିଛନ୍ତି ଯେ, ଯେପର୍ଯ୍ୟନ୍ତ କୌଣସି ବ୍ୟକ୍ତି ଅନଲାଇନରେ କିମ୍ବା ଅନ୍ୟ ଉପାୟରେ ଏହିପରି ଭିଡିଓ ସେୟାର ନକରନ୍ତି କିମ୍ବା ଅନ୍ୟ କାହାକୁ ନଦିଅନ୍ତି , ସେ ଏହି ଦୁଇଟି କାର୍ଯ୍ୟ ଅନୁଯାୟୀ ଅପରାଧୀ ଘୋଷିତ ହୋଇପାରିବେ ନାହିଁ ।
