ଶିମଲାରେ ବେଆଇନ ମସଜିଦ ବିରୋଧରେ ରାସ୍ତାକୁ ଓହ୍ଲାଇଲେ ହଜାର ହଜାର ଲୋକ; ପୋଲିସର ଲାଠିଚାର୍ଜ-ପାଣି ସ୍ପ୍ରେ
ଶିମଲା: ଶିମଲାର ସଞ୍ଜୌଲିରେ ବେଆଇନ ଭାବେ ମସଜିଦ ନିର୍ମାଣ କୁ ବିରୋଧ କରି ହିନ୍ଦୁ ସଂଗଠନଗୁଡ଼ିକର ଆନ୍ଦୋଳନ ତୀବ୍ର ହୋଇଛି। ଜିଲ୍ଲା ପ୍ରଶାସନର ନିଷେଧାଦେଶ ସତ୍ତ୍ୱେ ହଜାର ହଜାର ଲୋକ ଆଜି ରାଜରାସ୍ତାକୁ ଓହ୍ଲାଇ ସୁଖୁ ସରକାରଙ୍କ ବିରୋଧରେ ତୀବ୍ର ବିକ୍ଷୋଭ ପ୍ରଦର୍ଶନ କରିଛନ୍ତି। ଲୋକେ ପୁଲିସ ଓ ପ୍ରଶାସନ ବିରୋଧରେ ନାରାବାଜି କରିବା ସହ ବେଆଇନ ନିର୍ମାଣ ଉଚ୍ଛେଦ ଦାବି କରିଥିଲେ। ସତର୍କତାମୂଳକ ପଦକ୍ଷେପ ସ୍ୱରୂପ ପ୍ରଶାସନ ଅନେକ ବିକ୍ଷୋଭକାରୀଙ୍କୁ ଅଟକ ରଖିଛି।
ମିଳିଥିବା ସୂଚନା ଅନୁଯାୟୀ, ବେଆଇନ ‘ଢାଞ୍ଚା’କୁ ଯାଉଥିବା ରାସ୍ତାକୁ ପୁଲିସ ବ୍ୟାରିକେଡ୍ କରିଛି। କେବଳ ସଞ୍ଜୌଲି ନୁହଁନ୍ତି, ସମଗ୍ର ଶିମଲାରେ ଭାରତୀୟ ନ୍ୟାୟ କୋଡ୍ (ବିଏନ୍ଏସ୍)ର ଧାରା ୧୬୩ ଲାଗୁ ହୋଇଥିବା ବେଳେ ୫ କିମ୍ବା ତା’ଠାରୁ ଅଧିକ ଲୋକଙ୍କ ସମାଗମ ଉପରେ ପ୍ରତିବନ୍ଧକ ଲଗାଯାଇଛି। ଆନ୍ଦୋଳନକୁ ଦୃଷ୍ଟିରେ ରଖି ଅତିରିକ୍ତ ପୁଲିସ ଫୋର୍ସ ମୁତୟନ କରାଯାଇଛି। ବିକ୍ଷୋଭକାରୀଙ୍କ କହିବା ଅନୁଯାୟୀ, ସଞ୍ଜୌଲିର କିଛି ଲୋକ ଗୋଟିଏ ସ୍ଥାନରେ ଏକ ବେଆଇନ ଏକ ମହଲା କୋଠା ନିର୍ମାଣ କରି ସେଠାରେ ବେଆଇନ ମସଜିଦ ଖୋଲିଥିଲେ।
ଏହାପରେ କରୋନା କାଳରେ ସୁଯୋଗର ଫାଇଦା ଉଠାଇ ମସଜିଦକୁ ଧୀରେ ଧୀରେ ୫ ମହଲା କରାଯାଇଥିଲା। ଏହି ଘଟଣାରେ ପୋଲିସ ପ୍ରଶାସନନିକଟରେ ଅନେକ ଅଭିଯୋଗ କରାଯାଇଥିଲେ ମଧ୍ୟ ସେମାନେ ବେଆଇନ ନିର୍ମାଣକୁ ବନ୍ଦ କରିନଥିବା ଲୋକେ କହିଛନ୍ତି। ଲୋକମାନେ କହନ୍ତି ଯେ ଯେତେବେଳେ ସଞ୍ଜୌଲିରେ ବେଆଇନ ମସଜିଦ ନିର୍ମାଣ ଆରମ୍ଭ ହୋଇଥିଲା, ତୁରନ୍ତ ଶିମଲା ମ୍ୟୁନିସିପାଲିଟି କର୍ପୋରେସନକୁ ଅଭିଯୋଗ ଦିଆଯାଇଥିଲା, କିନ୍ତୁ ନିଗମର ଅଧିକାରୀମାନେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲେ।
ଏହି ମାମଲାରେ ନିଗମ କର୍ତ୍ତୃପକ୍ଷ ଏପର୍ଯ୍ୟନ୍ତ ୩୫ ଥର ନୋଟିସ୍ ଜାରି କରିଛନ୍ତି। ଏହା ସହ ମହାନଗର ନିଗମର କମିସନରଙ୍କ କୋର୍ଟରେ ୪୫ଟି ଶୁଣାଣି ହୋଇଥିଲେ ମଧ୍ୟ ବେଆଇନ ନିର୍ମାଣ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ। ଲୋକମାନେ ଏହା ମଧ୍ୟ କହୁଛନ୍ତି ଯେ ମସଜିଦ ନିର୍ମାଣ ସହିତ ସଞ୍ଜୌଲିରେ ମୁସଲମାନ ଜନସଂଖ୍ୟା ମଧ୍ୟ ଦ୍ରୁତ ଗତିରେ ବୃଦ୍ଧି ପାଉଛି।