‘ଧାରା ୩୭୦ ପୁନଃ ସ୍ଥାପିତ ନହେବା ପର୍ଯ୍ୟନ୍ତ ନିର୍ବାଚନ ଲଢ଼ିବି ନାହିଁ’ : ଘୋଷଣା କଲେ ଜାମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ
ବାଙ୍ଗାଲୋର: ଜାମ୍ମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତି ଆଜି କହିଛନ୍ତି ଯେ, ସମ୍ବିଧାନର ଧାରା ୩୭୦ ପୁନଃ ସ୍ଥାପିତ ନହେବା ପର୍ଯ୍ୟନ୍ତ ସେ ଜାମ୍ମୁ କାଶ୍ମୀର ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ। ତେବେ ତାଙ୍କ ଦଳ ନିଶ୍ଚିତ ଭାବେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ ବୋଲି ସେ କହିଛନ୍ତି।
ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି) ର ସଭାପତି ମେହବୁବା ମୁଫତି କହିଛନ୍ତି ଯେ ଚୀନ୍ ବର୍ତ୍ତମାନ ଜାମ୍ମୁ କାଶ୍ମୀରର କାର୍ଯ୍ୟରେ ହସ୍ତକ୍ଷେପ କରୁଛି, ପୂର୍ବରୁ କେବଳ ପାକିସ୍ତାନ ଏହା କରୁଥିଲା। ବିଜେପି ଦ୍ୱାରା ଧାରା ୩୭୦ ରଦ୍ଦ ହେବାର ଏହା ହେଉଛି ଫଳାଫଳ।
ସୂଚନାଯୋଗ୍ୟ ଯେ, ଅଗଷ୍ଟ ୨୦୧୯ ରେ କେନ୍ଦ୍ର ସରକାର ଜାମ୍ମୁ କାଶ୍ମୀରର ସ୍ଵତନ୍ତ୍ର ମାନ୍ୟତାକୁ ସମ୍ବିଧାନର ଧାରା ୩୭୦ ର ନିୟମାବଳୀକୁ ରଦ୍ଦ କରି ଦେଇଛନ୍ତି। ଆହୁରି ମଧ୍ୟ ଜାମ୍ମୁ କାଶ୍ମୀର ରାଜ୍ୟ ଜାମ୍ମୁ କାଶ୍ମୀର ଏବଂ ଲଦାଖର ଦୁଇଟି ୟୁନିଅନ୍ ଅଞ୍ଚଳରେ ବିଭକ୍ତ ହୋଇଥିଲା। ପୂର୍ବତନ ମୁଖ୍ୟମନ୍ତ୍ରୀ ଜାମ୍ମୁ କାଶ୍ମୀରକୁ ବର୍ତ୍ତମାନର ପରିସ୍ଥିତିରେ ଏକ ଖୋଲା ଜେଲ ବୋଲି ବର୍ଣ୍ଣନା କରି କହିଛନ୍ତି ଯେ, ଆମର ସମସ୍ତ ପାସପୋର୍ଟ ଜବତ କରାଯାଇଛି। ଯଦି ଏହା ଜଣେ ପୂର୍ବତନ ମୁଖ୍ୟମନ୍ତ୍ରୀଙ୍କ ପରିବାର ସହିତ ହେଉଛି, ତେବେ ଏହା କାହା ସହିତ ନ ହୋଇପାରେ ବୋଲି ବିଶ୍ୱାସ କରାଯାଉନାହିଁ।
