ଯମଜ ସନ୍ତାନ ଜନ୍ମ କରୁଥିବା ମହିଳାଙ୍କ ହୃଦରୋଗର ଆଶଙ୍କା ଦ୍ୱିଗୁଣିତ, ଷ୍ଟଡିରୁ ଖୁଲାସା
ଯମଜ ସନ୍ତାନଙ୍କୁ ଜନ୍ମ ଦେବାକୁ ଥିବା ମହିଳାଙ୍କ ପାଇଁ ଏକ ବଡ ଖବର । ରିପୋର୍ଟରୁ ଜଣାପଡିଲା ଏକ ଆଶ୍ଚର୍ଯ୍ୟ ଜନକ ତଥ୍ୟ । ଗୋଟିଏ ସନ୍ତାନକୁ ଜନ୍ମ ଦେଉଥିବା ମହିଳାମାନଙ୍କ ଅପେକ୍ଷା ଯମଜ ସନ୍ତାନ ଜନ୍ମ କରୁଥିବା ମହିଳାମାନଙ୍କ ଠାରେ ହୃଦରୋଗର ଆଶଙ୍କା ଦ୍ୱିଗୁଣ ଅଧିକ ଥାଏ। ୟୁରୋପୀୟ ହାର୍ଟ ଜର୍ଣ୍ଣାଲରେ ପ୍ରକାଶିତ ଏହି ଅଧ୍ୟୟନରୁ ଜଣାପଡିଛି ଯେ ଯେଉଁ ମହିଳାମାନେ ଯମଜ ସନ୍ତାନ ଜନ୍ମ ଦେଇଛନ୍ତି, ସେମାନେ ମା ହେବାର ଗୋଟିଏ ବର୍ଷ ମଧ୍ୟରେ ହୃଦରୋଗ ଯୋଗୁଁ ହସ୍ପିଟାଲରେ ଭର୍ତ୍ତି ହେବାର ସମ୍ଭାବନା ଅଧିକ ରହିଛି ।
ଅଧ୍ୟୟନରୁ ଜଣାପଡିଛି ଯେ ଯଦି ଗର୍ଭାବସ୍ଥାରେ ଏପରି ମହିଳାମାନଙ୍କର ଉଚ୍ଚ ରକ୍ତଚାପ ସମସ୍ୟା ଥାଏ, ତେବେ ଯମଜ ସନ୍ତାନ ଜନ୍ମ ପରେ ହୃଦରୋଗର ଆଶଙ୍କା ଆହୁରି ବଢ଼ିଯାଏ। ଏହି ଅଧ୍ୟୟନ ଆମେରିକାର ରୁଟଗର୍ସ ବିଶ୍ୱବିଦ୍ୟାଳୟର ବୈଜ୍ଞାନିକମାନଙ୍କ ଦ୍ୱାରା କରାଯାଇଛି। ପ୍ରକାଶ ପାଇଛି ଯେ ଗତ କିଛି ଦଶନ୍ଧି ମଧ୍ୟରେ ସାରା ବିଶ୍ୱରେ ଯମଜ ଗର୍ଭଧାରଣର ମାମଲା ବୃଦ୍ଧି ପାଇଛି। ଏହାର ମୁଖ୍ୟ କାରଣ ହେଉଛି ପ୍ରଜନନ ଚିକିତ୍ସା ଏବଂ ଅଧିକ ବୟସରେ ଗର୍ଭଧାରଣ।
ମୁଖ୍ୟ ଗବେଷକ ଡକ୍ଟର ରୁବି ଲିନ୍ କହିଛନ୍ତି ଯେ ଯମଜ ଗର୍ଭଧାରଣ ସମୟରେ, ମାଆର ହୃଦୟ ଅଧିକ କାମ କରିଥାଏ ଏବଂ ପ୍ରସବ ପରେ ହୃଦୟକୁ ସ୍ୱାଭାବିକ ଅବସ୍ଥାକୁ ଫେରିବାକୁ କିଛି ସପ୍ତାହ ସମୟ ଲାଗେ । ଯେଉଁଥି ପାଇଁ ହୃଦରୋଗର ଆଶଙ୍କା ବୃଦ୍ଧି ପାଏ । ସେ ଆହୁରି ମଧ୍ୟ କହିଛନ୍ତି ଯେ ଯେଉଁ ମହିଳାମାନଙ୍କର ଗର୍ଭାବସ୍ଥାରେ ରକ୍ତଚାପ ସମସ୍ୟା ନଥାଏ, ସେମାନଙ୍କଠାରେ ମଧ୍ୟ ସନ୍ତାନ ପ୍ରସବର ଗୋଟିଏ ବର୍ଷ ପର୍ଯ୍ୟନ୍ତ ହୃଦରୋଗର ଆଶଙ୍କା ରହିଥାଏ। ଏହି ଅଧ୍ୟୟନ କରୁଥିବା ଟିମ୍ ୨୦୧୦ ରୁ ୨୦୨୦ ମଧ୍ୟରେ ଆମେରିକାରେ ୩୬ ନିୟୁତ ପ୍ରସବ ମାମଲାର ତଥ୍ୟ ଅଧ୍ୟୟନ କରିଥିଲେ। ଯେଉଁଥିରୁ ଜଣା ପଡିଥିଲା ଯେ, ଯମଜ ସନ୍ତାନ ଜନ୍ମ କରିଥିବା ମା’ମାନଙ୍କର ହୃଦରୋଗ ଯୋଗୁଁ ହସ୍ପିଟାଲରେ ଭର୍ତ୍ତି ହେବାର ହାର ପ୍ରତି ୧ ଲକ୍ଷରେ ୧,୧୦୫.୪ ଥିଲା।
ସେହିପରି ଗୋଟିଏ ସନ୍ତାନ ଜନ୍ମ କରୁଥିବା ମହିଳାମାନଙ୍କ ମଧ୍ୟରେ, ଏହି ହାର ପ୍ରତି ୧ ଲକ୍ଷରେ ୭୩୪.୧ । ଗର୍ଭାବସ୍ଥାରେ ଯଦି ଜଣେ ମହିଳାଙ୍କର ଉଚ୍ଚ ରକ୍ତଚାପ ନଥାଏ, ତଥାପି ଯଦି ସେ ଯମଜ ସନ୍ତାନର ମାଆ ହୁଅନ୍ତି, ତେବେ ହୃଦରୋଗ ଯୋଗୁଁ ଡାକ୍ତରଖାନାରେ ଭର୍ତ୍ତି ହେବାର ଆଶଙ୍କା ଥାଏ। କିନ୍ତୁ ଉଚ୍ଚ ରକ୍ତଚାପ କ୍ଷେତ୍ରରେ, ବିପଦ ଆଠ ଗୁଣ ବୃଦ୍ଧି ପାଇଥାଏ। ଏହି ଅଧ୍ୟୟନରୁ ଏହା ମଧ୍ୟ ଜଣାପଡିଛି ଯେ ଯଦି ଗର୍ଭାବସ୍ଥାରେ ଗୋଟିଏ ସନ୍ତାନକୁ ଜନ୍ମ ଦେଇଥିବା ମହିଳାମାନଙ୍କର ଉଚ୍ଚ ରକ୍ତଚାପ ଥାଏ, ତେବେ ପ୍ରସବ ପରେ ଏପରି ମହିଳାଙ୍କ ମୃତ୍ୟୁହାର ଅଧିକ ଥାଏ। କିନ୍ତୁ ଯମଜ ସନ୍ତାନର ମା’ମାନଙ୍କଠାରେ ଏହି ବିପଦ କମ୍ ଦେଖାଦିଏ ।