ଇୟରବଡ ପାଇଁ ଚାଲିଗଲା ଶ୍ରବଣ ଶକ୍ତି: ଘଣ୍ଟା ଘଣ୍ଟା ଧରି ଗୀତ ଶୁଣୁଥିଲେ ୧୮ ବର୍ଷୀୟ ଯୁବକ
ନୂଆଦିଲ୍ଲୀ: ଟେକ୍ନୋଲୋଜି ଯେତିକି ଯେତିକି ଆଗକୁ ବଢ଼ୁଛି, ଯୁବପୀଢ଼ିଙ୍କ ମଧ୍ୟରେ ତା’ର କୁପ୍ରଭାବ ସେହି ଅନୁପାତରେ ବଢ଼ିବାରେ ଲାଗିଛି । ଆଜିକାଲି ଅଳ୍ପ ବୟସର ପିଲାମାନେ ଘଣ୍ଟା ଘଣ୍ଟା ଧରି କାନରେ ଇୟରବଡ ଦେଇ ଗୀତ ଶୁଣିବା, ପୋଡକାଷ୍ଟ ଶୁଣିବା, ଭିଡିଓ ଗେମ୍ ଖେଳିବା, ଫିଲ୍ମ ଦେଖିବା, କଥାହେବା ଆଦି ସବୁ କାମ କରୁଛନ୍ତି । ତେବେ ନିଜର ଆବଶ୍ୟକତାଠାରୁ ଅଧିକ ବ୍ୟବହାର ଜଣଙ୍କର ପାଇଁ ମହଙ୍ଗା ସାବ୍ୟସ୍ତ ହୋଇଛି ।
ସୂଚନା ମୁତାବକ, ମାତ୍ରାଧିକ ଇୟରବଡ ବ୍ୟବହାର କରିବା କାରଣରୁ ଜଣେ ୧୮ ବର୍ଷୀୟ ଯୁବକ ନିଜର ଶ୍ରବଣ ଶକ୍ତି ହରାଇଛନ୍ତି । ଉତ୍ତରପ୍ରଦେଶର ଗୋରଖପୁରରୁ ଆସିଛି ଏପରି ଏକ ଭୟଙ୍କର ଘଟଣା । ଘଣ୍ଟା ଘଣ୍ଟା ଧରି ଇୟରବଡ ବ୍ୟବହାର କରୁଥିବାରୁ ଏହି ଯୁବକଙ୍କ କାନ ସଂକ୍ରମିତ ହେବା ସହ ସେ ଶ୍ରବଣ ଶକ୍ତି ହରାଇଥିଲେ । ତେବେ ପରବର୍ତ୍ତୀ ସମୟରେ ଡାକ୍ତରଙ୍କ ଅକ୍ଲାନ୍ତ ପରିଶ୍ରମ ପରେ ସର୍ଜରୀ କରାଯିବା ପରେ ଯୁବକଙ୍କ ଜଣଙ୍କ ଏବେ ନିଜର ଶ୍ରବଣ ଶକ୍ତି ଫେରି ପାଇଥିବା ଜଣାପଡ଼ିଛି ।
ଦିଲ୍ଲୀର ଏକ ଡାକ୍ତରୀ ଟିମ୍ ପୀଡ଼ିତ ଯୁବକଙ୍କ ଚିକିତ୍ସା ସଫଳତାର ସହିତ କରିଛନ୍ତି । ସର୍ଜରୀ କରାଯିବା ପରେ ଏବେ ଯୁବକ ଜଣଙ୍କ ଏବେ ପୂର୍ବ ପରି ସବୁକିଛି ଶୁଣିପାରୁଛନ୍ତି । ତେଣୁ ଏହି ଘଟଣା ସମସ୍ତ ଯୁବପୀଢ଼ିଙ୍କ ପାଇଁ ଏକ ବଡ଼ ଶିକ୍ଷା । ତେଣୁ ଆପଣଙ୍କ କାନ ଭିତରକୁ ବାୟୁ ଚଳାଚଳ କରିବା ନିହାତି ଜରୁରୀ । କାନରେ ଅଧିକ ସମୟ ପର୍ଯ୍ୟନ୍ତ ଡିଭାଇସ୍ ରଖିବା ଫଳରେ କାନ ଭିତରେ ଝାଳ ହୋଇ ମଇଳା ଜମି ଯାଇଥାଏ । ସେଥିପାଇଁ ଏହି ଯନ୍ତ୍ରକୁ ସଫାସୁତୁରା ରଖି ବ୍ୟବହାର କରିବାକୁ ଡାକ୍ତର ପରାମର୍ଶ ଦେଇଛନ୍ତି । ଅବହେଳା କଲେ ଅଯଥାରେ ଜଣେ ସାରା ଜୀବନ ପାଇଁ ନିଜର ଶ୍ରବଣ ଶକ୍ତି ହରାଇ ବସିବ ।
