ବୁମରାହଙ୍କ ସ୍ଥାନରେ ଅଷ୍ଟ୍ରେଲିଆ ଯିବେ ୩ ବୋଲର: ବିକଳ୍ପ ଉପରେ ବିସିସିଆଇ ଅଧିକାରୀଙ୍କ ସଂକେତ
ନୂଆଦିଲ୍ଲୀ: ଆସନ୍ତା ବିଶ୍ୱକପ ପାଇଁ ବୁମରାହଙ୍କ ବିକଳ୍ପ ବାଛିଛି ବିସିସିଆଇ । ବୁମରାହଙ୍କ ସ୍ଥାନରେ ଏବେ ଅଷ୍ଟ୍ରେଲିଆ ଗସ୍ତ କରିବେ ୩ ଜଣ ପେସର । ଏ ନେଇ ଭାରତୀୟ କ୍ରିକେଟ ବୋର୍ଡ ଜଣେ ଅଧିକାରୀ ସଂକେତ ଦେଇଛନ୍ତି । ତେବେ ଯଦିଓ ବିସିସିଆଇ ତରଫରୁ ଏ ନେଇ କୌଣସି ଅଫିସିଆଲ ଘୋଷଣା କରାଯାଇନାହିଁ । ଏହି ଟି-୨୦ ବିଶ୍ୱକପ ଖେଳିବା ପାଇଁ ୩ ଜଣ ଖେଳାଳିଙ୍କୁ ଅଷ୍ଟ୍ରେଲିଆ ପଠାଯାଇପାରେ ବୋଲି ସେ ପ୍ରକାଶ କରିଛନ୍ତି । ତେବେ ଆସନ୍ତୁ ଜାଣିବା କିଏ ଏହି ଖେଳାଳି ।
ଭାରତର ଷ୍ଟାର ପେସ ବୋଲର ଜଶପ୍ରୀତ ବୁମରାହ ଦଳରୁ ବାଦ ପଡିବା ପରେ ତାଙ୍କ ବିକଳ୍ପ ଖୋଜୁଥିଲା ବିସିସିଆଇ । ଏ ଆଲୋଚନା ଚାଲିଥିବା ବେଳେ ଏବେ ଷ୍ଟାଣ୍ଡବାଏରେ ରହିଥିବା ଦୀପକ ଚହର ମଧ୍ୟ ଟୁର୍ଣ୍ଣାମେଣ୍ଟରୁ ବାଦ ପଡିଛନ୍ତି । ତେବେ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ସିରିଜରେ ଉମେଶ ଯାଦବ, ମହମ୍ମଦ ସିରାଜ, ଶାର୍ଦ୍ଦୁଳ ଠାକୁରଙ୍କୁ ପରୀକ୍ଷା କରିଥିଲା ବିସିସିଆଇ । କିନ୍ତୁ ଉମେଶ ଯାଦବଙ୍କ ପ୍ରଦର୍ଶନ ଖରାପ ରହିଥିଲା । ତେଣୁ ମହମ୍ମଦ ଶାମୀଙ୍କ ସହିତ ମହମ୍ମଦ ସିରାଜ ଏବଂ ଶାର୍ଦ୍ଦୁଳ ଠାକୁରଙ୍କୁ ଅଷ୍ଟ୍ରେଲିଆ ପଠାଇବାକୁ ନିଷ୍ପତ୍ତି ନେଉଛି ବିସିସିଆଇ । ଏ ନେଇ ବିସିସିଆଇର ଜଣେ ଅଧିକାରୀ ସୂଚନା ଦେଇଛନ୍ତି । ବୁମରାହ ଏବଂ ଦୀପକଙ୍କୁ ରିପ୍ଲେସ କରିବା ପାଇଁ ଏହି ୩ ଖେଳାଳି ଖୁବଶୀଘ୍ର ଟିମ ଇଣ୍ଡିଆ ସହ ବିଶ୍ୱକପ କ୍ୟାମ୍ପେନରେ ଯୋଗ ଦେବେ ।
ସୂଚନା ଅନୁସାରେ, ଦୀପକ ଚହର ସାଉଥ ଆଫ୍ରିକା ବିପକ୍ଷ ଦିନିକିଆ ସିରିଜରେ ମଧ୍ୟ ଚୟନ ହୋଇଥିବା ବେଳେ ପିଠି ଯନ୍ତ୍ରଣା ଯୋଗୁଁ ସେ ଖେଳି ପାରି ନାହାନ୍ତି । କିନ୍ତୁ ଟି-୨୦ ସିରିଜରେ ସୁନ୍ଦର ପ୍ରଦର୍ଶନ କରିଥିଲେ ଦୀପକ ଚହର । ତେଣୁ ଏହି ପିଠି ଯନ୍ତ୍ରଣା ତାଙ୍କୁ ଆଉ ଏକ ବଡ ଟୁର୍ଣ୍ଣାମେଣ୍ଟରୁ ବାଦ ପକାଇଛି । ତେବେ ତାଙ୍କ ଚିକିତ୍ସା ପାଇଁ ଅଧିକ ସମୟ ଲାଗିବ, ଯେଉଁଥିପାଇଁ ତାଙ୍କ ବିକଳ୍ପ ଭାବରେ ଶାର୍ଦ୍ଦୁଳ ଠାକୁରଙ୍କୁ ଦଳରେ ସାମିଲ କରିବ ଟିମ ଇଣ୍ଡିଆ ।
